Anthropic IPO: આર્ટિફિશિયલ ઇન્ટેલિજન્સ (AI) કંપની એન્થ્રોપિકે અમેરિકાના શેરબજારમાં લિસ્ટિંગ સાથે નવો રેકોર્ડ બનાવ્યો છે. કંપનીએ IPO દ્વારા 81.3 અબજ ડૉલર એટલે કે આશરે ₹7 લાખ કરોડ એકત્ર કર્યા છે. આ સાથે તે અત્યાર સુધીનો દુનિયાનો સૌથી મોટો IPO બની ગયો છે. એન્થ્રોપિકે આ મામલે એલન મસ્કની કંપની સ્પેસએક્સનો રેકોર્ડ પણ તોડી નાખ્યો છે. જોકે, શુક્રવારે બજાર ખુલતાં જ કંપનીના શેરમાં મોટો ઘટાડો જોવા મળ્યો હતો. IPO પછી કંપનીના 5,000થી વધુ કર્મચારીઓ કરોડપતિ બની ગયા છે. જ્યારે 400થી વધુ કર્મચારીઓની સંપત્તિ 100 મિલિયન ડૉલર એટલે કે ₹900 કરોડથી વધુ થઈ ગઈ છે.
5,100 કર્મચારીઓ પર પૈસાનો વરસાદ
એન્થ્રોપિકના શેરબજારમાં શાનદાર પ્રવેશથી તેના કર્મચારીઓનું નસીબ બદલાઈ ગયું છે. કંપનીના શેર લિસ્ટ થતાં જ આશરે 5,100 કર્મચારીઓ કાગળ પર કરોડપતિ બની ગયા છે. અહેવાલો અનુસાર, કંપનીના કુલ કર્મચારીઓમાંથી આશરે 96% પાસે હવે 10 લાખ ડૉલર એટલે કે લગભગ ₹9.26 કરોડથી વધુ કિંમતના શેર છે.
આમાંથી આશરે 2,800 કર્મચારીઓના શેરની કિંમત 1 કરોડ ડૉલર એટલે કે લગભગ ₹92 કરોડથી વધુ છે. જ્યારે આશરે 600 કર્મચારીઓ પાસે 10 કરોડ ડૉલર એટલે કે લગભગ ₹926 કરોડથી વધુ કિંમતના શેર છે.
IPOનું લિસ્ટિંગ કેવું રહ્યું?
એન્થ્રોપિકે પોતાનો IPO પ્રતિ શેર 83 ડૉલરના ભાવે રજૂ કર્યો હતો. કંપનીના શેર 19 નવેમ્બર 2026ના રોજ અમેરિકાના શેરબજાર Nasdaq પર લિસ્ટ થયા હતા. પ્રથમ દિવસે શેર 111.50 ડૉલર પર ખુલ્યા અને કારોબાર દરમિયાન 115.10 ડૉલર સુધી પહોંચી ગયા હતા.
જોકે, કારોબારના અંતે શેર 97.17 ડૉલર પર બંધ થયા હતા. આ રીતે પ્રથમ દિવસે રોકાણકારોને IPOની કિંમતની સરખામણીએ આશરે 17% વળતર મળ્યું હતું.
અમેરિકાની સાતમી સૌથી મોટી કંપની બની
એન્થ્રોપિકની સ્થાપના 2021માં થઈ હતી. વર્ષ 2024ના અંત સુધીમાં કંપનીમાં 1,000થી પણ ઓછા કર્મચારીઓ હતા. AI પ્રોડક્ટ્સની માંગ વધવાની સાથે કંપનીએ ઝડપથી પોતાનો વ્યવસાય અને કર્મચારીઓની સંખ્યા વધારી હતી.
ગુરુવારે બજાર બંધ થયું ત્યાં સુધીમાં એન્થ્રોપિકનું માર્કેટ મૂલ્ય આશરે 1.8 ટ્રિલિયન ડૉલર હતું. કારોબાર દરમિયાન એક સમયે તેનું મૂલ્ય 2 ટ્રિલિયન ડૉલરને પણ પાર પહોંચી ગયું હતું. આ સાથે પાંચ વર્ષ જૂની એન્થ્રોપિક અમેરિકાની સાતમી સૌથી મોટી કંપની બની ગઈ.
IPOના બીજા દિવસે શેરમાં 9% સુધીનો ઘટાડો
પ્રથમ દિવસે શાનદાર પ્રદર્શન કર્યા પછી બીજા દિવસે એન્થ્રોપિકના શેરમાં ઘટાડો જોવા મળ્યો હતો. 20 નવેમ્બરે શેર આશરે 8.77% ઘટીને 88.65 ડૉલર પર આવી ગયા હતા. જોકે, આ ભાવ પણ કંપનીના 83 ડૉલરના IPO ભાવ કરતાં આશરે 6.8% વધુ હતો.
શેરમાં ઘટાડાનું કારણ ટેક્નોલોજી કંપનીઓમાં વધેલી વેચવાલી અને AI કંપનીઓના ઊંચા મૂલ્યાંકન અંગે વધતી ચિંતા રહી હતી. શુક્રવારે અમેરિકાના શેરબજારોમાં પણ દબાણ જોવા મળ્યું હતું.
Amazon અને Googleને પણ ફાયદો
- એન્થ્રોપિકના IPOથી માત્ર તેના કર્મચારીઓને જ ફાયદો થયો નથી. કંપનીમાં રોકાણ કરનારી દુનિયાની મોટી ટેક્નોલોજી કંપનીઓને પણ મોટો નફો થયો છે. તેમાં Amazon અને Google મુખ્ય છે.
- એન્થ્રોપિકની IPO ફાઇલિંગ અનુસાર, Amazon પાસે કંપનીનો આશરે 14.7% હિસ્સો છે. પ્રતિ શેર 83 ડૉલરના IPO ભાવ પ્રમાણે તેની કિંમત આશરે 225 અબજ ડૉલર થાય છે.
- એન્થ્રોપિકમાં Googleનો પણ મોટો હિસ્સો છે. કંપનીની IPO ફાઇલિંગ અનુસાર, Google પાસે એન્થ્રોપિકનો આશરે 13.7% હિસ્સો છે. IPOના ભાવ પ્રમાણે તેની કિંમત આશરે 200 અબજ ડૉલર થાય છે.

