Israel IDF Manpower Crisis 2026: એકસાથે અનેક મોરચે જંગ લડી રહેલી ઈઝરાયેલની સેના (IDF) એક મોટા સંકટનો સામનો કરી રહી છે અને જો આનો ઉકેલ ન લાવવામાં આવ્યો તો તે ટૂંક સમયમાં ધરાશાયી થઈ શકે છે. ઈઝરાયેલી સેનાના ચીફ લેફ્ટનન્ટ જનરલ એયાલ જમીરે આ જ અઠવાડિયે બુધવારે મળેલી સુરક્ષા કેબિનેટમાં મેનપાવરની અછત અંગે ચેતવણી આપી હતી. કેબિનેટની બેઠક દરમિયાન જમીરે કહ્યું કે, IDF પોતાની અંદરથી જ ધરાશાયી થાય તે પહેલાં હું 10 ‘રેડ ફ્લેગ’ (ચેતવણીના સંકેતો) ઉઠાવી રહ્યો છું.
900 દિવસથી જંગ લડી રહી છે IDF
ઈઝરાયેલી સેના 900 દિવસથી વધુ સમયથી સતત લશ્કરી અભિયાનોમાં ગૂંચવાયેલી છે. તાજેતરમાં ઈરાન અને લેબનોન સામેના યુદ્ધને કારણે અનેક મોરચા ખુલી ગયા છે, જેનાથી મેનપાવરની ભારે અછતે ચિંતા વધારી દીધી છે. તેમણે કહ્યું કે જો સરકાર સૈનિકોની સંખ્યા નહીં વધારે, તો કેટલીક જગ્યાએ સુરક્ષામાં મોટું ગાબડું રહી જશે.
ઈઝરાયેલને માત્ર અત્યારે જ નહીં, પરંતુ શાંતિના સમયમાં પણ ગાઝા, લેબનોન, સીરિયા અને વેસ્ટ બેંકની સરહદો પર વધુ સૈનિકોની જરૂર પડશે. ઈઝરાયેલી સેનામાં હરેદી (અતિ-રૂઢિચુસ્ત યહૂદીઓ) ની ભરતી વધારવા માટે હજુ સુધી કોઈ કાયદો બનાવવામાં આવ્યો નથી, જેના કારણે દેશમાં હજારો લોકો અનિવાર્ય સેનામાંથી મુક્તિ મેળવી રહ્યા છે. આનું મુખ્ય કારણ હરેદી સમુદાયને આપવામાં આવેલી છૂટ સાથે જોડાયેલું રાજકીય દબાણ છે.
ઈઝરાયેલી સેના પ્રમુખે જણાવેલ જોખમો
રિઝર્વ સૈનિકો પર એક જ સમયે અનેક સક્રિય મોરચા પર એટલું બધું દબાણ આવી રહ્યું છે કે તેઓ તૂટી શકે છે. આ મોરચા છે- ગાઝા, લેબનોન, સીરિયા, વેસ્ટ બેંક અને ઈરાન.
અતિ-રૂઢિચુસ્ત યહૂદીઓની અનિવાર્ય ભરતી માટે કોઈ કાયદો પસાર કરવામાં આવ્યો નથી, જેના કારણે હજારો લોકો અનિવાર્ય સેવા થી દૂર છે.
કેબિનેટે વેસ્ટ બેંકમાં ડઝનબંધ ચોકીઓ અને ફાર્મને કાનૂની દરજ્જો આપવાની મંજૂરી આપી દીધી છે, જેની સુરક્ષા માટે વધારાના સૈનિકોની જરૂર પડશે.
વેસ્ટ બેંકમાં યહૂદી રાષ્ટ્રવાદી હિંસા ઝડપથી વધી રહી છે, જેના કારણે ત્યાં વધારાની બટાલિયન તૈનાત કરવી પડી છે. ટૂંક સમયમાં વધુ એક બટાલિયનની જરૂર પડી શકે છે.
જાન્યુઆરી 2027 થી અનિવાર્ય સેવાની અવધિ ઘટાડીને 30 મહિના કરવાની છે, જે IDFની માંગથી ઉલટું છે, જેમાં તેને વધારીને 36 મહિના કરવાની માંગ કરવામાં આવી છે.
સરકાર જરૂરી કાયદાઓ (અનિવાર્ય ભરતી, રિઝર્વ સૈનિક, સેવા વિસ્તરણ) પસાર કરવાનું ટાળી રહી છે, જેનું મુખ્ય કારણ હરેદી સમુદાયને આપવામાં આવેલી છૂટને લઈને ચાલતું રાજકારણ છે.
