Gujarat Police Liquor Seizure: ગુજરાતના જામનગર જિલ્લામાં લોકલ ક્રાઈમ બ્રાન્ચ (LCB) એ જામનગર-રાજકોટ હાઈવે પર એક ગાડીને રોકીને અંદાજે 1.4 કરોડ રૂપિયાની કિંમતનો ‘ઈન્ડિયન મેડ ફોરેન લિકર’ (IMFL) નો એક મોટો જથ્થો જપ્ત કરીને ટ્રક ડ્રાઈવરની ધરપકડ કરી છે. એલસીબીએ મોડી રાત્રે જામબુડા ગામના જંક્શન પાસે ખાસ ગુપ્ત માહિતી મળ્યા બાદ આ ઓપરેશન હાથ ધર્યું હતું. અધિકારીઓએ એક બંધ બોડીવાળા ભારત બેન્ઝ ટ્રકને રોકીને તલાશી લીધી, જે દરમિયાન અલગ-અલગ સાઈઝની દારૂની ૨૯,૨૪૩ બોટલો મળી આવી હતી. આ જથ્થાની કિંમત આશરે ૧,૩૯,૭૯,૮૦૦ રૂપિયા આંકવામાં આવી છે.
આરોપી ડ્રાઈવરની ધરપકડ
ડ્રાઈવરની ઓળખ રાજુ ઉર્ફે દેવો મોરી (૩૦) તરીકે થઈ છે, જે પોરબંદર જિલ્લાના આદિત્યાણા ગામનો રહેવાસી છે. ક્રાઈમ બ્રાન્ચે સ્થળ પર જ તેની ધરપકડ કરી લીધી હતી. પોલીસે જણાવ્યું કે પ્રાથમિક પૂછપરછમાં જાણવા મળ્યું છે કે આ જથ્થો રાણાવાવના કરશન કોડિયાતર અને ભાણવડના દુડાભાઈ કોડિયાતરે મંગાવ્યો હતો. આ બંને વ્યક્તિઓની સાથે એક અજાણ્યા સપ્લાયરને પણ આરોપી બનાવવામાં આવ્યો છે, જે હાલમાં ફરાર છે. અધિકારીઓએ જણાવ્યું કે અજાણ્યો સપ્લાયર કરશનનો જાણકાર છે. અમે તેને ટ્રેક કરવાની કોશિશ કરી રહ્યા છીએ.
“અમે ગુપ્ત માહિતીના આધારે ટ્રકને તલાશી માટે રોક્યો હતો. ટ્રકની અંદરથી દારૂનો મોટો જથ્થો મળી આવ્યો છે.” – ગુજરાત પોલીસ
જપ્ત કરાયેલી વસ્તુઓની કુલ કિંમત 1,59,84,800 રૂપિયા
અધિકારીઓના જણાવ્યા અનુસાર, જપ્ત કરાયેલી વસ્તુઓની કુલ કિંમત ૧,૫૯,૮૪,૮૦૦ રૂપિયા છે. જેમાં દારૂ, ૨૦ લાખનો અંદાજિત ટ્રક અને ૫ હજારનો એક મોબાઈલ ફોન સામેલ છે. પંચકોશી એ-ડિવિઝન પોલીસ સ્ટેશનમાં પ્રોહિબિશન એક્ટની સંબંધિત કલમો હેઠળ ગુનો નોંધવામાં આવ્યો છે અને વધુ તપાસ હાથ ધરવામાં આવી છે. અધિકારીઓએ જણાવ્યું કે ચોક્કસ માહિતીના આધારે વાહનને રોકવામાં આવ્યું હતું અને મોટી માત્રામાં IMFL (ભારતીય બનાવટનો વિદેશી દારૂ) મળી આવ્યો હતો. એક વ્યક્તિની ધરપકડ કરવામાં આવી છે અને અન્ય આરોપીઓને પકડવાના પ્રયાસો ચાલુ છે.
