AI Model Social Media: AI ના યુગમાં સોશિયલ મીડિયા પર પોતાની ઓળખ છુપાવવી ઘણી મુશ્કેલ બની ગઈ છે. જો કોઈ યુઝર એવું વિચારી રહ્યો હોય કે તે પોતાની ઓળખ છુપાવીને સોશિયલ મીડિયા વાપરી શકે છે, તો તે દિવસો હવે ગયા. એક નવા સંશોધનમાં જાણવા મળ્યું છે કે AI મોડેલ યુઝરના ઓનલાઈન પોસ્ટ કરેલા કન્ટેન્ટ પરથી જ તેની ઓળખ કરી શકે છે. આ માટે તેને કોઈ પર્સનલ આઈડેન્ટિફાયરની જરૂર નથી. હવે AI મોડેલ્સ એટલા પાવરફુલ થઈ ગયા છે કે તેઓ કોઈ ખોટા નામે બનેલા એકાઉન્ટ પાછળની વ્યક્તિ અને તેના બીજા સોશિયલ મીડિયા એકાઉન્ટ્સની સરળતાથી ઓળખ કરી શકે છે.
AI મોડેલ ચોકસાઈથી કરી શકે છે ઓળખ
એન્થ્રોપિક અને ETH ઝુરિચના આ અભ્યાસમાં સંશોધકોએ એક ઓટોમેટેડ સિસ્ટમ બનાવી છે, જે પોસ્ટ, કોમેન્ટ અને વાતચીતનું વિશ્લેષણ કરે છે. આ પદ્ધતિ સંપૂર્ણપણે યુઝર જનરેટેડ કન્ટેન્ટ પર કામ કરે છે. આ સિસ્ટમ મલ્ટી-સ્ટેપ પ્રોસેસને ફોલો કરતા ટેક્સ્ટમાંથી ઓળખ સાથે જોડાયેલા સિગ્નલ્સ કાઢીને સંભવિત મેચો શોધે છે. ત્યારબાદ પોતાના લોજિકનો ઉપયોગ કરીને એ જાણવાનો પ્રયાસ કરે છે કે શું બે અલગ-અલગ એકાઉન્ટ એક જ વ્યક્તિ સાથે જોડાયેલા છે. ટેસ્ટિંગ દરમિયાન આ મોડેલ Reddit અને LinkedIn જેવા પ્લેટફોર્મ્સ પર બનેલા એકાઉન્ટ્સને લિંક કરવામાં સફળ રહ્યું હતું.
યુઝરની ઓળખ કેવી રીતે કરે છે AI સિસ્ટમ?
અભ્યાસ મુજબ, પોસ્ટની નાની નાની વિગતો ઓળખ જણાવવાનું કામ કરી શકે છે. રાઈટિંગ સ્ટાઈલ, રસના વિષયો, લોકેશન હિન્ટ, એજ્યુકેશન અને ટોપિક્સ વગેરેની મદદથી યુઝરને ઓળખી શકાય છે. ઉદાહરણ તરીકે, આ મોડેલ કોઈ વાતચીતનું વિશ્લેષણ કરી પ્રોફેશન, લોકેશન, વપરાયેલા સાધનો અને બેકગ્રાઉન્ડ વગેરેની માહિતી એકઠી કરીને પબ્લિકલી ઉપલબ્ધ માહિતી સાથે મેચ કરી તેની પાછળની વ્યક્તિને શોધી કાઢે છે. કોઈ યુઝરની જેટલી વધુ પોસ્ટ હશે, તેની ઓળખ સાબિત કરવી આ AI મોડેલ માટે તેટલી જ સરળ બની જશે.
આ અભ્યાસ કેમ જરૂરી છે?
આ અભ્યાસે સાબિત કરી દીધું છે કે હવે સોશિયલ મીડિયા પર ખોટા નામે એકાઉન્ટ બનાવીને પ્રાઈવેટ રહી શકાતું નથી. આનાથી એક્ટિવિસ્ટ્સ, પત્રકારો અને બીજી સંવેદનશીલ માહિતી ધરાવતા તે લોકો પર વધુ અસર પડશે, જેઓ સોશિયલ મીડિયા પર અન્ય નામે એકાઉન્ટ બનાવીને ઉપયોગ કરે છે. જોકે, આ અભ્યાસના કેટલાક જોખમો પણ છે. સંશોધકોનું કહેવું છે કે સરકારો આ પદ્ધતિથી સર્વેલન્સ (દેખરેખ) કરી શકે છે અને સાયબર એટેકર્સ કોઈ યુઝરને ટાર્ગેટ કરવા માટે તેની ડિટેલ પ્રોફાઇલિંગ કરી શકે છે.
