Honda EV Wireless Charging: ઇલેક્ટ્રિક વાહનોમાં સૌથી મોટી સમસ્યા ચાર્જિંગને લઈને હોય છે. EVને ચાર્જ કરવામાં ઘણાં કલાકો લાગે છે અને ત્યાં સુધી તેમને ચાર્જિંગ સ્ટેશન પર ઊભાં રાખવાં પડે છે. જાપાનની ઓટોમોબાઇલ કંપની હોન્ડાએ એક અનોખી ટેક્નોલોજી રજૂ કરી છે, જે આ સમસ્યાને સંપૂર્ણપણે દૂર કરી શકે છે. આ ટેક્નોલોજીને ડાયનેમિક વાયરલેસ પાવર ટ્રાન્સફર (DWPT) નામ આપવામાં આવ્યું છે. હોન્ડા 2021થી આના પર કામ કરી રહી હતી અને તેને કન્સ્ટ્રક્શન કંપની તેઝેઈ કોર્પોરેશન અને તેઝેઈ રોટેક સાથે મળીને બનાવવામાં આવી છે. આનાથી EV માલિકોને વાહન ચાર્જ કરવા માટે ચાર્જિંગ સ્ટેશન પર રોકાવાની જરૂર નહીં પડે. શરૂઆતમાં તેનો ઉપયોગ લોજિસ્ટિક્સ અને કોમર્શિયલ વાહનો માટે કરવામાં આવશે. ચાલો જાણીએ કે આ ટેક્નોલોજી કેવી રીતે કામ કરશે.
EV ચાર્જ કરવા માટે રોકાવાની જરૂર નહીં પડે
આ ટેક્નોલોજી કન્સ્ટ્રક્શન કંપની તેઝેઈ કોર્પોરેશન અને તેઝેઈ રોટેક સાથે મળીને બનાવવામાં આવી છે. આનાથી EV માલિકોને વાહન ચાર્જ કરવા માટે ચાર્જિંગ સ્ટેશન પર રોકાવાની જરૂર નહીં પડે. શરૂઆતમાં તેનો ઉપયોગ લોજિસ્ટિક્સ અને કોમર્શિયલ વાહનો માટે કરવામાં આવશે.
આ વાયરલેસ ચાર્જર કેવી રીતે કામ કરશે?
આ ટેક્નોલોજી સ્માર્ટફોનનું વાયરલેસ ચાર્જર જે રીતે કામ કરે છે, બરાબર એ જ રીતે કામ કરે છે. ચાલતી વખતે ઇલેક્ટ્રિક વાહનોને ચાર્જ કરતી આ ટેક્નોલોજીને મુખ્યત્વે ત્રણ ભાગમાં વહેંચવામાં આવી છે.
- ગ્રાઉન્ડ-બેઝ્ડ DC પાવર સપ્લાય – આ રસ્તાની નીચે પાથરેલા સમગ્ર ચાર્જિંગ નેટવર્કને વીજળી પૂરી પાડે છે.
- ગ્રાઉન્ડ એસેમ્બલી (GA) – રસ્તાની સપાટીની બરાબર નીચે વાયરલેસ ચાર્જિંગ પેડ્સની શ્રેણી પાથરવામાં આવે છે અને તેમને DC પાવર કેબલ્સ સાથે જોડવામાં આવે છે. જ્યારે કોઈ EV આના ઉપરથી પસાર થાય છે, ત્યારે આ પેડ્સ ચુંબકીય ક્ષેત્ર ઉત્પન્ન કરે છે.
- વ્હીકલ એસેમ્બલી (VA) – ઇલેક્ટ્રિક વાહનના નીચેના ભાગમાં પાવર રિસીવર લગાવવામાં આવે છે. તે રસ્તામાંથી ઉત્પન્ન થતા ચુંબકીય ક્ષેત્રમાંથી વીજળી મેળવીને સીધી વાહનની બેટરીને ચાર્જ કરે છે.
2027માં પરીક્ષણ કરવામાં આવશે
હોન્ડા 2027થી આ વાયરલેસ ચાર્જિંગ સિસ્ટમનું રસ્તાઓ પર પરીક્ષણ કરવાની તૈયારી કરી રહી છે.
- 150 kW સુધી પાવર ટ્રાન્સફર – પરીક્ષણમાં એન્જિનિયરો તપાસશે કે આ સિસ્ટમ કોમર્શિયલ ઇલેક્ટ્રિક વાહનોને ચાલતી વખતે 150 kW સુધી પાવર ટ્રાન્સફર કરી શકે છે કે નહીં.
- 10 લાખ વખત વ્હીલ પાસ ટેસ્ટ – રસ્તાની ટકાઉપણું અને મજબૂતી તપાસવા માટે વાહનોનાં પૈડાંને આ રસ્તા પર આશરે 10 લાખ વખત ચલાવીને પરીક્ષણ કરવામાં આવશે.
- ઇલેક્ટ્રોમેગ્નેટિક સુરક્ષા – પરીક્ષણ દરમિયાન એ પણ સુનિશ્ચિત કરવામાં આવશે કે આ ચુંબકીય ક્ષેત્રથી સુરક્ષા સંબંધિત કોઈ જોખમ ઊભું ન થાય.
આ પહેલાં પણ આવાં પરીક્ષણો થઈ ચૂક્યાં છે
ઇલેક્ટ્રિક કારને રસ્તા પર ચાલતી વખતે ચાર્જ કરવાની આ પહેલી કસોટી નથી. એન્જિનિયરો લાંબા સમયથી એવી ટેક્નોલોજી પર કામ કરી રહ્યા છે, જેનાથી ઇલેક્ટ્રિક વાહનોને ચાલતી વખતે ચાર્જ કરી શકાય. આ પહેલાં પણ આવાં પરીક્ષણો કરવામાં આવ્યાં છે. યુરોપના ફ્રાન્સ, ઇટાલી અને યુકેમાં પણ આવાં પરીક્ષણો થઈ ચૂક્યાં છે. પેરિસ નજીક ઇઝરાયેલી સ્ટાર્ટઅપ ઇલેક્ટ્રેઓન અને ફ્રેન્ચ હાઇવે ઓપરેટર VINCIએ 0.9 માઇલ લાંબા હાઇવે પર 300 kWથી વધુ પાવર ટ્રાન્સફર કરવાનું પરીક્ષણ કર્યું હતું.
