Kia India Sales October 2026: કિઆએ વેચાણનો બનાવ્યો નવો રેકોર્ડ, સેલ્ટોસની સૌથી વધુ માંગ

Arati Parmar
5 Min Read
Kia India Sales October 2026

ઓક્ટોબરમાં કિઆની કારનું ઐતિહાસિક વેચાણ, સેલ્ટોસ પ્રથમ તો સોનેટ બીજા સ્થાને

Kia India Sales October 2026: કિઆ ઇન્ડિયા માટે તહેવારોની આ મોસમ અને વીતેલો ઓક્ટોબર 2026નો મહિનો ખૂબ જ ઐતિહાસિક સાબિત થયો છે. આ દક્ષિણ કોરિયાની કંપનીએ ઓક્ટોબર 2026માં સ્થાનિક બજારમાં કુલ 33,462 કારનું જથ્થાબંધ વેચાણ નોંધાવ્યું છે, જે કંપનીના ભારતીય ઇતિહાસમાં અત્યાર સુધીનો સૌથી મોટો માસિક વેચાણનો આંકડો છે. ગયા વર્ષના ઓક્ટોબરમાં વેચાયેલી 29,555 યુનિટ્સની સરખામણીમાં કિઆના કુલ વેચાણમાં વાર્ષિક ધોરણે 13 ટકાનો વધારો નોંધાયો છે, જ્યારે સપ્ટેમ્બર 2026માં વેચાયેલી 32,017 યુનિટ્સની સરખામણીમાં માસિક ધોરણે 5 ટકાનો વધારો થયો છે. કિઆના આ શાનદાર દેખાવમાં નવી પેઢીની કિઆ સેલ્ટોસ અને સિરૉસની જબરદસ્ત માંગનો સૌથી મોટો ફાળો રહ્યો, જ્યારે સોનેટ અને કેરન્સના વાર્ષિક વેચાણમાં થોડો ઘટાડો જોવા મળ્યો. જો તમે પણ આ દિવસોમાં તમારા માટે કિઆની નવી કાર ખરીદવાનું વિચારી રહ્યા હો, તો પહેલાં જાણી લો કે કયા મોડલની કેટલી માંગ છે.

13,423 યુનિટ્સ સાથે કિઆ સેલ્ટોસ પ્રથમ સ્થાને યથાવત

કિઆ ઇન્ડિયાની સૌથી લોકપ્રિય મિડસાઇઝ SUV કિઆ સેલ્ટોસ ઓક્ટોબર 2026માં પણ કંપનીની સૌથી વધુ વેચાયેલી કાર બની રહી. આ દરમિયાન સેલ્ટોસની કુલ 13,423 યુનિટ્સ વેચાઈ, જે ગયા વર્ષના ઓક્ટોબરમાં વેચાયેલી 7,130 યુનિટ્સની સરખામણીમાં વાર્ષિક ધોરણે 88 ટકાનો જબરદસ્ત વધારો દર્શાવે છે.

- Advertisement -

સપ્ટેમ્બર 2026માં વેચાયેલી 12,593 યુનિટ્સની સરખામણીમાં કિઆ સેલ્ટોસના વેચાણમાં માસિક ધોરણે 7 ટકાનો વધારો થયો છે. કંપનીના ઓક્ટોબરના કુલ વેચાણમાં એકલી સેલ્ટોસનો હિસ્સો 40.1 ટકા રહ્યો અને 10,000નો આંકડો પાર કરનારી તે કિઆની એકમાત્ર કાર રહી.

કિઆ સોનેટ બીજા સ્થાને, પરંતુ વાર્ષિક વેચાણમાં ઘટાડો

કોમ્પેક્ટ SUV સેગમેન્ટમાં કિઆની શાનદાર કાર સોનેટ વીતેલા ઓક્ટોબર 2026માં 8,914 યુનિટ્સના વેચાણ સાથે કંપનીની બીજી સૌથી વધુ વેચાયેલી કાર રહી. જોકે, ગયા વર્ષના ઓક્ટોબરમાં વેચાયેલી 12,745 યુનિટ્સની સરખામણીમાં તેના વેચાણમાં વાર્ષિક ધોરણે 30%નો ઘટાડો થયો છે.

- Advertisement -

સપ્ટેમ્બર 2026માં વેચાયેલી 9,493 યુનિટ્સની સરખામણીમાં પણ ઓક્ટોબરમાં કિઆ સોનેટની માંગ 6 ટકા ઘટી છે. આ છતાં સોનેટે કિઆ ઇન્ડિયાના કુલ વેચાણમાં 26.6 ટકાનું મહત્ત્વપૂર્ણ યોગદાન આપ્યું છે.

કેરન્સ અને કેરન્સ ક્લેવિસના વેચાણમાં વધારો

ફેમિલી MPV સેગમેન્ટમાં કિઆ કેરન્સ (જેમાં Carens Clavis અને CNG/EV વેરિઅન્ટ્સનો પણ સમાવેશ થાય છે)એ ઓક્ટોબર 2026માં 6,918 યુનિટ્સના વેચાણ સાથે ત્રીજું સ્થાન મેળવ્યું. ઓક્ટોબર 2025માં વેચાયેલી 8,779 યુનિટ્સની સરખામણીમાં તેમાં વાર્ષિક ધોરણે 21 ટકાનો ઘટાડો નોંધાયો છે, પરંતુ સપ્ટેમ્બર 2026માં વેચાયેલી 6,319 યુનિટ્સની સરખામણીમાં તેના વેચાણમાં માસિક ધોરણે 9 ટકાનો વધારો જોવા મળ્યો છે.

- Advertisement -

કિઆ સોરેન્ટોની લૉન્ચ પછી જ લોકપ્રિયતા શરૂ

સપ્ટેમ્બર 2026માં ભારતીય બજારમાં લૉન્ચ થયેલી કિઆની નવી પ્રીમિયમ થ્રી-રો SUV કિઆ સોરેન્ટોને ગ્રાહકો તરફથી શાનદાર પ્રતિસાદ મળી રહ્યો છે. ઓક્ટોબર 2026માં તેની કુલ 2,148 યુનિટ્સ વેચાઈ, જે સપ્ટેમ્બર 2026માં વેચાયેલી 1,739 યુનિટ્સની સરખામણીમાં માસિક ધોરણે 24 ટકાનો શાનદાર વધારો દર્શાવે છે. તેના હાઇબ્રિડ અને ડીઝલ પાવરટ્રેન વિકલ્પો તથા પ્રીમિયમ ફીચર્સના આધારે સોરેન્ટોએ કિઆના વેચાણમાં ચોથું સ્થાન મેળવી લીધું છે.

કિઆ સિરૉસના વેચાણમાં વાર્ષિક ધોરણે 161%નો ઉછાળો

સિરૉસ (Syros EV સહિત) ઓક્ટોબર 2026માં કિઆની સૌથી વધુ વેચાણ વૃદ્ધિ ધરાવતી કાર તરીકે સામે આવી છે. ઓક્ટોબર 2026માં તેની કુલ 2,048 યુનિટ્સ મોકલવામાં આવી હતી, જ્યારે ગયા વર્ષના ઓક્ટોબર 2025માં આ આંકડો માત્ર 785 યુનિટ્સ હતો. એટલે કે તેમાં વાર્ષિક ધોરણે 161 ટકાનો મોટો વધારો થયો છે. આ ઉપરાંત સપ્ટેમ્બર 2026માં વેચાયેલી 1,848 યુનિટ્સની સરખામણીમાં પણ સિરૉસ રેન્જના વેચાણમાં 11 ટકાનો વધારો થયો છે. ઇલેક્ટ્રિક વર્ઝન ઉમેરાવાથી તેની માંગ વધી છે.

કાર્નિવલને માત્ર 11 ગ્રાહકો મળ્યા, EV6 અને EV9ની સ્થિતિ ખરાબ

કિઆની લક્ઝરી MPV અને પ્રીમિયમ ઇલેક્ટ્રિક કારની વાત કરીએ તો ઓક્ટોબર 2026માં લક્ઝરી MPV કાર્નિવલ લિમોઝીનની માત્ર 11 યુનિટ્સ જ વેચાઈ શકી. ગયા વર્ષના ઓક્ટોબરમાં વેચાયેલી 116 યુનિટ્સની સરખામણીમાં તેમાં વાર્ષિક ધોરણે 91 ટકાનો મોટો ઘટાડો અને સપ્ટેમ્બરમાં વેચાયેલી 25 યુનિટ્સની સરખામણીમાં માસિક ધોરણે 56 ટકાનો ઘટાડો નોંધાયો.

બીજી તરફ, કિઆ ઇન્ડિયાની બે ફ્લેગશિપ ઇલેક્ટ્રિક કાર Kia EV6 અને Kia EV9ની ઓક્ટોબર 2026માં એક પણ યુનિટ વેચાઈ નહીં, જ્યારે ગયા વર્ષના ઓક્ટોબરમાં EV9ની કેટલીક યુનિટ્સ વેચાઈ હતી.

Share This Article