Adani Power Bangladesh Dispute: ભારતીય કંપની અદાણી પાવર લિમિટેડ સાથે કોલસાના ભાવ અને વીજળીના ટેરિફને લઈને ચાલી રહેલા વિવાદમાં બાંગ્લાદેશે આંતરરાષ્ટ્રીય સ્તરે કાયદાકીય લડાઈ તેજ કરી દીધી છે. આ મામલામાં પોતાના સ્ટેટ-રન પાવર ડેવલપમેન્ટ બોર્ડ (BPDB) નો પક્ષ મજબૂતીથી રાખવા માટે બાંગ્લાદેશ સરકારે એક બ્રિટિશ લો ફર્મની નિમણૂક કરી છે. અધિકારીઓએ શુક્રવારે આ વાતની પુષ્ટિ કરી હતી.
BPDB ના અધિકારીઓના જણાવ્યા અનુસાર, લંડન સ્થિત 3VP નામની લો ફર્મને આ મામલામાં બાંગ્લાદેશનું પ્રતિનિધિત્વ કરવા માટે નિયુક્ત કરવામાં આવી છે. આ ફર્મ કોમર્શિયલ અને ફાઇનાન્શિયલ વિવાદોમાં નિપુણતા ધરાવે છે અને સિંગાપોર ઇન્ટરનેશનલ આર્બિટ્રેશન સેન્ટર (SIAC) માં ચાલી રહેલી મધ્યસ્થતાની કાર્યવાહીમાં BPDB તરફથી પક્ષ રાખશે.
3VP ફર્મની ભૂમિકા શું છે?
બાંગ્લાદેશના અખબાર બિઝનેસ સ્ટાન્ડર્ડ (TBS) મુજબ, લંડન સ્થિત 3VP ચેમ્બર્સ છેલ્લા કેટલાક મહિનાઓથી અદાણી પાવર સાથે થયેલા એગ્રીમેન્ટની સમીક્ષા કરી રહેલી એક રાષ્ટ્રીય સમિતિને કાયદાકીય સલાહ આપી રહી હતી. આ લો ફર્મનું નેતૃત્વ કિંગ્સ કાઉન્સિલ ફરહાજ ખાન કરી રહ્યા છે, જેઓ આંતરરાષ્ટ્રીય બાબતોના અનુભવી વકીલ માનવામાં આવે છે. આ નવો વળાંક એવા સમયે સામે આવ્યો છે જ્યારે રાષ્ટ્રીય સમીક્ષા સમિતિએ પાવર સેક્ટર સાથે જોડાયેલા તે એગ્રીમેન્ટ્સ પર પોતાનો અંતિમ રિપોર્ટ સોંપ્યો છે, જે પૂર્વ વડાપ્રધાન શેખ હસીનાની અવામી લીગ સરકારના કાર્યકાળ દરમિયાન કરવામાં આવ્યા હતા. રિપોર્ટ સોંપાયાના માત્ર પાંચ દિવસમાં જ 3VP ની સત્તાવાર નિમણૂક કરવામાં આવી છે.
અદાણી પાવર અને મધ્યસ્થતાની શરૂઆત
બાંગ્લાદેશના પાવર ડિવિઝનના એક વરિષ્ઠ અધિકારીએ જણાવ્યું કે બ્રિટિશ લો ફર્મને નિયુક્ત કરવાનો નિર્ણય એટલા માટે લેવામાં આવ્યો કારણ કે અદાણી પાવર લિમિટેડએ ગયા વર્ષે સિંગાપોર ઇન્ટરનેશનલ આર્બિટ્રેશન સેન્ટરમાં મધ્યસ્થતા (આર્બિટ્રેશન) ની પ્રક્રિયા શરૂ કરી હતી. અદાણી પાવરનો દાવો છે કે વિવાદિત કોલસા ટેરિફ સાથે જોડાયેલા અંદાજે 48.5 કરોડ અમેરિકી ડોલરનું પેમેન્ટ હજુ સુધી બાકી છે.
બાંગ્લાદેશનો મુખ્ય આરોપ
બાંગ્લાદેશનું કહેવું છે કે અદાણી પાવર ખૂબ જ ઊંચા ભાવે કોલસો વેચી રહી છે. આનાથી વીજ ઉત્પાદનનો ખર્ચ અસામાન્ય રીતે વધી ગયો છે, જેની સીધી અસર દેશની વીજ વ્યવસ્થા અને સરકારી ખર્ચ પર પડી રહી છે. 5 ઓગસ્ટ 2024 ના રોજ શેખ હસીના સરકારના પતન બાદ બાંગ્લાદેશ પાવર ડેવલપમેન્ટ બોર્ડ (BPDB) એ અદાણી સાથે થયેલા કરાર પર ફરીથી વાટાઘાટો શરૂ કરવાના પ્રયાસો તેજ કર્યા છે, જેથી શરતોની સમીક્ષા કરી શકાય અને ખર્ચ ઘટાડી શકાય.
આંતરરાષ્ટ્રીય કાયદાકીય કાર્યવાહી માટે પુરાવા હોવાનો દાવો
રાષ્ટ્રીય સમીક્ષા સમિતિએ કહ્યું છે કે તેની પાસે અદાણી પાવર લિમિટેડ વિરુદ્ધ આંતરરાષ્ટ્રીય સ્તરે કાયદાકીય કાર્યવાહી શરૂ કરવા માટે પૂરતા અને મજબૂત પુરાવા છે. સમિતિનું માનવું છે કે આ પુરાવાઓના આધારે બાંગ્લાદેશ આંતરરાષ્ટ્રીય અદાલતોનો સંપર્ક કરી શકે છે. અંતરિમ સરકારના એનર્જી કન્સલ્ટન્ટ ફૌઝુલ કબીર ખાનના જણાવ્યા અનુસાર, અદાણીના અધિકારીઓ અને કેટલાક બાંગ્લાદેશી અધિકારીઓ વચ્ચે નાણાકીય લેવડ-દેવડના પુરાવા મળ્યા છે.
ગોડ્ડા પાવર પ્લાન્ટથી બાંગ્લાદેશને વીજળી પૂરી પાડે છે અદાણી પાવર
અદાણી પાવર ઝારખંડ સ્થિત ગોડ્ડા પાવર પ્લાન્ટથી બાંગ્લાદેશને 1,600 મેગાવોટ વીજળીનો પુરવઠો પૂરો પાડે છે. પેમેન્ટના કિસ્સામાં, બાંગ્લાદેશે જૂન 2025 માં 437 મિલિયન અમેરિકી ડોલરનું પેમેન્ટ કરીને 31 માર્ચ 2025 સુધીની તમામ બાકી રકમ ચૂકવી દીધી છે. અગાઉ બાકી પેમેન્ટમાં વિલંબને કારણે અદાણીએ વીજ પુરવઠો ઘટાડી દીધો હતો, પરંતુ બાકી રકમની પતાવટ બાદ હવે સંપૂર્ણ વીજ પુરવઠો ફરી બહાલ કરી દેવામાં આવ્યો છે.
