Direct Tax Collection: ચાલુ નાણાકીય વર્ષ 2026-27માં સરકારના ડાયરેક્ટ ટેક્સ કલેક્શનમાં વધારો નોંધાયો છે. 10 નવેમ્બર 2026 સુધીમાં નેટ ડાયરેક્ટ ટેક્સ કલેક્શન વાર્ષિક ધોરણે 11.76% વધીને આશરે 14.42 લાખ કરોડ રૂપિયા પહોંચ્યું છે. ગયા નાણાકીય વર્ષની સમાન સમયગાળામાં આ રકમ 12.90 લાખ કરોડ રૂપિયા હતી.
નાણાં મંત્રાલય દ્વારા જાહેર કરાયેલા આંકડા અનુસાર, 10 નવેમ્બર સુધીમાં ગ્રોસ ટેક્સ કલેક્શન 14.02% વધીને 17.50 લાખ કરોડ રૂપિયા થયું છે. ગયા વર્ષે આ જ સમયગાળામાં તે 15.35 લાખ કરોડ રૂપિયા હતું. જોકે, આ દરમિયાન ટેક્સ રિફંડમાં પણ વધારો થયો છે.
ગ્રોસ ટેક્સ કલેક્શન 17.50 લાખ કરોડ રૂપિયા
10 નવેમ્બર 2026 સુધીમાં સરકારને કુલ 17,50,285.89 કરોડ રૂપિયાનું ગ્રોસ ડાયરેક્ટ ટેક્સ મળ્યું છે. તેમાં કોર્પોરેટ ટેક્સમાંથી 8,01,471.71 કરોડ રૂપિયા અને નોન-કોર્પોરેટ ટેક્સમાંથી 8,94,716.18 કરોડ રૂપિયા મળ્યા છે. આ ઉપરાંત સિક્યોરિટીઝ ટ્રાન્ઝેક્શન ટેક્સ (STT)માંથી 54,077.90 કરોડ રૂપિયા મળ્યા છે. ગયા નાણાકીય વર્ષની સમાન સમયગાળામાં ગ્રોસ કલેક્શન 15,35,076.31 કરોડ રૂપિયા હતું. આ રીતે તેમાં 14.02%નો વધારો થયો છે.
ટેક્સ રિફંડમાં 26%નો વધારો
સરકારે 10 નવેમ્બર સુધીમાં 3,08,306.98 કરોડ રૂપિયાનું ટેક્સ રિફંડ આપ્યું છે. ગયા નાણાકીય વર્ષની સમાન સમયગાળામાં આ રકમ 2,44,872.21 કરોડ રૂપિયા હતી. એટલે કે રિફંડમાં વાર્ષિક ધોરણે આશરે 26%નો વધારો થયો છે.
તેમાં કોર્પોરેટ ટેક્સનું રિફંડ 1,69,512.18 કરોડ રૂપિયા અને નોન-કોર્પોરેટ ટેક્સનું રિફંડ 1,38,771.22 કરોડ રૂપિયા રહ્યું છે. અન્ય ટેક્સ હેઠળ 23.58 કરોડ રૂપિયાનું રિફંડ આપવામાં આવ્યું છે.
નેટ ડાયરેક્ટ ટેક્સ કલેક્શન 14.42 લાખ કરોડ રૂપિયા
ગ્રોસ કલેક્શનમાંથી રિફંડની રકમ બાદ કર્યા પછી સરકારનું નેટ ડાયરેક્ટ ટેક્સ કલેક્શન 14,41,978.91 કરોડ રૂપિયા રહ્યું છે. ગયા નાણાકીય વર્ષની સમાન સમયગાળામાં આ રકમ 12,90,204.10 કરોડ રૂપિયા હતી. આ રીતે નેટ કલેક્શનમાં 11.76%નો વધારો થયો છે.
નેટ કલેક્શનમાં કોર્પોરેટ ટેક્સનો હિસ્સો 6,31,959.53 કરોડ રૂપિયા અને નોન-કોર્પોરેટ ટેક્સનો હિસ્સો 7,55,944.96 કરોડ રૂપિયા રહ્યો છે. જ્યારે સિક્યોરિટીઝ ટ્રાન્ઝેક્શન ટેક્સમાંથી 54,077.90 કરોડ રૂપિયા મળ્યા છે.
ગ્રોસ અને નેટ ડાયરેક્ટ ટેક્સ કલેક્શન શું છે?
ગ્રોસ ડાયરેક્ટ ટેક્સ કલેક્શનનો અર્થ રિફંડની રકમ બાદ કરતાં પહેલાં સરકારને મળેલા કુલ ડાયરેક્ટ ટેક્સથી થાય છે. તેમાં ઇન્કમ ટેક્સ, કોર્પોરેટ ટેક્સ અને સિક્યોરિટીઝ ટ્રાન્ઝેક્શન ટેક્સ જેવા કરનો સમાવેશ થાય છે.
જ્યારે નેટ ડાયરેક્ટ ટેક્સ કલેક્શન મેળવવા માટે ગ્રોસ કલેક્શનમાંથી ટેક્સ રિફંડની રકમ બાદ કરવામાં આવે છે. તેથી નેટ કલેક્શન પરથી જાણી શકાય છે કે રિફંડ આપ્યા પછી સરકાર પાસે વાસ્તવમાં કેટલો ડાયરેક્ટ ટેક્સ આવ્યો છે.
