Home Loan Hidden Charges: વર્ષ ૨૦૨૬માં ઘણા લોકો પોતાનું ઘર ખરીદવાનું સપનું જોઈ રહ્યા છે અને તે માટે હોમ લોન લેવાનું વિચારી રહ્યા છે. જો તમે પણ લોન લેવાનું વિચારી રહ્યા હોવ, તો માત્ર વ્યાજ દર જ નહીં પરંતુ તેની સાથે જોડાયેલા અન્ય છુપા ચાર્જ જાણવા પણ ખૂબ જરૂરી છે. ઘણીવાર આ ચાર્જીસને કારણે લોન ઘણી મોંઘી પડી જાય છે. બેંકબજારના સીઈઓ આદિલ શેટ્ટી અને બેસિક હોમ લોનના અતુલ મોંગાના જણાવ્યા અનુસાર, નીચે મુજબના ૭ ચાર્જ તમારા ખિસ્સા પર ભાર વધારી શકે છે:
૧. પ્રોસેસિંગ ચાર્જ (Processing Fees)
લોન એપ્લિકેશનની તપાસ અને દસ્તાવેજોના વેરિફિકેશન માટે બેંક ૫,૦૦૦ થી ૧૫,૦૦૦ રૂપિયા સુધીની ફી લે છે. નિષ્ણાતોના મતે, લોન લેતી વખતે આ ફી ઘટાડવા માટે બેંક સાથે રકઝક (Bargaining) કરવી જોઈએ, કારણ કે ઘણી બેંકો આમાં છૂટ આપે છે.
૨. પ્રીપેમેન્ટ પેનલ્ટી (Prepayment Penalty)
જો તમે સમય પહેલા લોન પૂરી કરવા માંગતા હોવ, તો RBI ના નિયમ મુજબ ફ્લોટિંગ રેટ પર કોઈ દંડ નથી. પરંતુ જો તમારી લોન ફિક્સ્ડ રેટ પર હોય, તો બાકી મુદ્દલના ૪% સુધીનો દંડ લાગી શકે છે.
૩. વ્યાજ દર બદલવા પરના ચાર્જ (Conversion Charges)
જો તમે ફ્લોટિંગ રેટથી ફિક્સ્ડ કે ફિક્સ્ડથી ફ્લોટિંગ રેટ પર સ્વિચ કરો છો, તો બેંક બાકી રકમના ૦.૨૫% થી ૦.૫% સુધીની ફી વસૂલે છે. ૪૦ લાખની લોન પર આ રકમ ૧૦,૦૦૦ થી ૨૦,૦૦૦ રૂપિયા સુધી હોઈ શકે છે.
૪. બેલેન્સ ટ્રાન્સફરનો ખર્ચ (Balance Transfer Costs)
ઓછા વ્યાજની લાલચમાં લોન એક બેંકમાંથી બીજી બેંકમાં લઈ જતી વખતે પ્રોસેસિંગ ફી, MODT ફી અને કાયદાકીય ચાર્જ ફરીથી ચૂકવવા પડે છે. જો વ્યાજ દરમાં મોટો તફાવત હોય તો જ આ નિર્ણય લેવો ફાયદાકારક છે.
૫. લેટ પેમેન્ટ ચાર્જ (Late Payment Charges)
EMI ચૂકવવામાં વિલંબ થાય તો બેંક બાકી EMI ના ૩% કે તેથી વધુ દંડ વસૂલી શકે છે. જોકે ઘણી બેંકો ૫ થી ૧૦ દિવસનો ગ્રેસ પિરિયડ આપે છે, પરંતુ EMI બાઉન્સ ન થાય તેનું ધ્યાન રાખવું જોઈએ.
૬. બંડલ ઇન્શ્યોરન્સ (Forced Insurance)
પ્રોપર્ટી ઇન્શ્યોરન્સ ફરજિયાત છે, પરંતુ ‘લોન પ્રોટેક્શન ઇન્શ્યોરન્સ’ વૈકલ્પિક છે. બેંકો ઘણીવાર જાણ કર્યા વગર આ વીમો લોન સાથે જોડી દે છે. ગ્રાહકો પોતાની મરજી મુજબની કંપનીનો વીમો લેવા માટે સ્વતંત્ર છે.
૭. CERSAI ચાર્જીસ
એક જ પ્રોપર્ટી પર બે વાર લોન લેવાની છેતરપિંડી રોકવા માટે સેન્ટ્રલ રજીસ્ટ્રીમાં નોંધણી કરાવવી પડે છે. આ માટે આશરે ૧૦૦ રૂપિયા (+GST) જેવો નજીવો ચાર્જ લાગે છે જે ચૂકવવો અનિવાર્ય છે.
