UPS Cargo Plane Crash: અમેરિકાના કેન્ટકી રાજ્યના લૂઈસવિલમાં મંગળવારે UPS કાર્ગો વિમાન દુર્ઘટનાગ્રસ્ત થયું. UPSના ગ્લોબલ એવિએશન હબમાંથી ઉડાન ભર્યા બાદ વિમાનમાં મોટો વિસ્ફોટ થયો. અધિકારીઓએ જણાવ્યું કે આ દુર્ઘટનામાં ઓછામાં ઓછા સાત લોકોના મોત થયા છે અને 11 લોકો ઘાયલ થયા છે. મૃત્યુ પામેલાં ચાર લોકો વિમાનમાં સવાર નહોતા. આ વિમાન મંગળવારે સાંજે આશરે 5:15 વાગ્યે લૂઈસવિલ મુહમ્મદ અલી ઇન્ટરનેશનલ એરપોર્ટ પરથી હોનોલુલૂ માટે ઉડાન ભરી રહ્યું હતું.
આ વિમાન મેકડોનલ ડગ્લસ MD-11 હતું, જે 1991માં બનાવાયું હતું. લૂઈસવિલ એરપોર્ટ UPSનું સૌથી મોટું પેકેજ હેન્ડલિંગ સેન્ટર છે, જે કંપનીનું વૈશ્વિક હબ છે. અહીં હજારો કર્મચારીઓ કાર્યરત છે, જ્યાંથી દરરોજ 300 જેટલી ફ્લાઇટ્સ થાય છે અને દર કલાકે 4 લાખથી વધુ પેકેજની છટણી થાય છે. દુર્ઘટના બાદ વિમાનની સલામતી અંગે ફરી પ્રશ્નો ઉઠ્યા છે. આ વિમાન ભારે માલ વહન કરવાની ક્ષમતા માટે જાણીતું હતું, પરંતુ તેના સુરક્ષા ઈતિહાસ અંગે વિવાદો પણ રહ્યા છે.
વિમાન અને કંપની વિશે માહિતી
દુર્ઘટનાગ્રસ્ત વિમાન 1991માં બનાવાયેલું MD-11 હતું, જેને બાદમાં કાર્ગો વિમાનમાં પરિવર્તિત કરવામાં આવ્યું હતું. ઉર્જા ખર્ચ વધતા અને એરલાઇનોએ નવા વિમાનો અપનાવતા, જૂના મુસાફરી વિમાનોને કાર્ગો ઉપયોગ માટે ફેરવવામાં આવ્યા હતા. MD-11 લાંબા અંતર સુધી વધુ માલ લઈ જવા માટે બનાવાયેલ શક્તિશાળી વિમાન છે.
આ વિમાન મેકડોનલ ડગ્લસ (McDonnell Douglas) દ્વારા બનાવાયું હતું, જેને બાદમાં બોઇંગે પણ ઉત્પન્ન કર્યું હતું. મેકડોનલ ડગ્લસે 1988 થી 1997 સુધી MD-11 બનાવ્યું, ત્યારબાદ 1997 થી 2000 સુધી બોઇંગે તેનું ઉત્પાદન કર્યુ. હાલમાં આ વિમાન મુખ્યત્વે કાર્ગો હેતુઓ માટે જ વપરાય છે. MD-11 વિશ્વનું સૌથી મોટું ત્રણ એન્જિન ધરાવતું વિમાન માનવામાં આવે છે.
કઈ કંપનીઓ પાસે છે આ વિમાન?
આ વિમાન અનેક લોજિસ્ટિક્સ કંપનીઓ વાપરે છે, જેમાં FedEx Express, Lufthansa Cargo અને UPS Airlinesનો સમાવેશ થાય છે. 2020 પછીથી ઘણા MD-11 વિમાનો નિવૃત્ત કરવામાં આવ્યા, છતાં કેટલાક હજુ કાર્ગો સેવા માટે કાર્યરત છે.
વિમાનની સલામતી પર પ્રશ્નો
આ દુર્ઘટનાએ ફરીથી MD-11 વિમાનોની સુરક્ષા અંગે પ્રશ્નો ઉભા કર્યા છે. તેની શક્તિ અને ક્ષમતા હોવા છતાં, તેના ઈતિહાસમાં અનેક દુર્ઘટનાઓ થઈ છે. લૂઈસવિલમાં UPSનું હબ કંપની માટે અતિમહત્ત્વનું છે, તેથી આ ઘટના તેની કામગીરીને અસર કરી શકે છે. તપાસકર્તાઓ હવે આ દુર્ઘટનાનું કારણ શોધી રહ્યા છે.
