કેનેડામાં ભણતા વિદેશી સ્ટુડન્ટ્સ માટે બહુ ચિંતાજનક સમાચાર આવ્યા છે અને તેના કારણે કેનેડામાં વિરોધ પ્રદર્શનો પણ થઈ રહ્યા છે. કેનેડામાંથી મોટી સંખ્યામાં વિદેશી સ્ટુડન્ટ્સને ડિપોર્ટ કરવામાં આવે તેવી શક્યતા છે. કેટલાક લોકો તો કહે છે કે આ આંકડો 70 હજાર કરતા મોટો હશે. ઘણા સ્ટુડન્ટ તો એવા છે જેઓ હમણાં જ કેનેડા આવ્યા છે અને તેમને પોતાના ભવિષ્યની ચિંતા સતાવે છે. ટોરન્ટો સિટી ન્યૂઝના રિપોર્ટ અનુસાર સ્ટુડન્ટ હજુ તો પોતાના કોર્સની ચિંતા કરે તે પહેલાં તેમના ફ્યુચરનું શું થશે તેના વિશે વિચારીને ભયભીત થઈ ગયા છે
કેનેડાએ ફેડરલ પોલિસીમાં ચેન્જ કર્યા તેના કારણે 70 હજાર કરતા વધારે ઈન્ટરનેશનલ સ્ટુડન્ટ પર જોખમ છે. જે લોકો કેનેડામાં પોતાની લાઈફ સેટલ થઈ જશે અને ભણ્યા પછી કમાણી કરી શકાશે એવું માનીને આવ્યા હતા, તેમના માટે ટેન્શન વધી ગયું છે. કેનેડામાં સ્ટુડન્ટ માટે કામ કરતા એક ગ્રૂપે કહ્યું કે ચાલુ વર્ષના અંતે જે સ્ટુડન્ટની વર્ક પરમિટ એક્સપાયર થતી હશે તેમને ડિપોર્ટ કરવામાં આવે તેવી શક્યતા છે. કેનેડાએ લિમિટેડ સ્ટડી પરમિટ સહિત કેટલાક મોટા સુધારાની જાહેરાત કરી છે જે ભારતીય સ્ટુડન્ટ્સ માટે જરાય ફાયદાકારક નથી.
કેનેડામાં હજારો વિદ્યાર્થીઓ એવા છે જેમણે પોતાનો અભ્યાસ પૂરો કર્યા પછી પર્મેનન્ટ રેસિડન્સી માટે અરજી કરવાનું વિચાર્યું હતું. આવા લોકો પર જાણે વીજળી પડી હોય તેવી સ્થિતિ છે. આ સ્ટુડન્ટસનું કહેવું છે કે તેઓ મોટી લોન લઈને કેનેડા આવ્યા હતા, હવે લોન ભરપાઈ કરવી મુશ્કેલ છે અને તેમના સપના તૂટી ગયા છે. હવે આ મુદ્દાએ કેનેડામાં વસતી સમગ્ર સ્ટુડન્ટ કોમ્યુનિટીમાં એક ચર્ચા પેદા કરી છે, તેઓ વિરોધ પ્રદર્શનો કરી રહ્યા છે.
વિદ્યાર્થીઓના એક જૂથે પ્રિન્સ એડવર્ડ આઇલેન્ડમાં વિધાનસભાની બહાર છાવણીઓ ગોઠવી છે, ત્રણ મહિનાથી વધુ સમયથી તેઓ વિરોધ કરે છે.
વિદેશી વિદ્યાર્થીઓ કહે છે કે તેઓ ગંભીર પરિસ્થિતિનો સામનો કરી રહ્યા છે કારણ કે પર્મેનન્ટ રેસિડન્સીના નોમિનેશનમાં 25 ટકાના ઘટાડા માટે નવી નીતિ ઘડાઈ છે જેના કારણે તેઓ ડિપોર્ટ થાય તેવા જોખમમાં છે. ઓન્ટારિયો, મેનિટોબા અને બ્રિટિશ કોલંબિયામાં પણ આ પ્રકારના દૃશ્યો જોઈ શકાય છે.
ડિપોર્ટેશનનો સામનો કરી રહેલા એક ભૂતપૂર્વ ઈન્ટરનેશનલ સ્ટુડન્ટ રાજવીર સુરી કહે છે, “કેનેડા આવવા માટે મેં મારા જીવનના સૌથી નિર્ણાયક છ વર્ષ ઘણાં જોખમો લઈને વિતાવ્યા છે. છેલ્લા છ વર્ષથી, મેં અભ્યાસ કર્યો, કામ કર્યું, ટેક્સ ચૂકવ્યો, પૂરતા CRS (કોમ્પ્રીહેન્સિવ રેન્કિંગ સિસ્ટમ) પોઈન્ટ્સ મેળવ્યા પરંતુ સરકારે ફક્ત અમારો લાભ લીધો છે.”
રાજવીર એવા સ્ટુડન્ટ પૈકી એક છે જેમણે વિદેશમાં એજ્યુકેશન માટે પોતાના પરિવારની જીવનભરની બચત ખર્ચી નાખી છે. હવે તેઓ વર્ક પરમિટમાં સમયમર્યાદાનો સામનો કરે છે. તેમને પીઆર મળવાના કોઈ અણસાર દેખાતા નથી અને તેમણે કદાચ દેશ છોડીને પોતાના વતન પાછું જવું પડશે.
ઈમિગ્રેશન કન્સલ્ટન્ટ સમજાવે છે, “હવે કોઈ ચીજમાં કન્સિસ્ટન્સી નથી. શરૂઆતમાં દર બે અઠવાડિયે CEC (કેનેડિયન એક્સપિરિયન્સ ક્લાસ) ડ્રો હતા તેથી તેઓ તેના માટે તૈયારી કરતા હતા. હવે સ્ટુડન્ટને ખબર નથી હોતી કે આગામી ડ્રો ક્યારે થશે, જેના કારણે ભારે બેકલોગ સર્જાયો છે.”
તાજેતરમાં સેંકડો આંતરરાષ્ટ્રીય વિદ્યાર્થીઓ અને ઇમિગ્રન્ટ વર્કર્સે બ્રેમ્પટનમાં રેલીઓ યોજી હતી. હાલમાં કેનેડાની હાઉસિંગ કટોકટી અને જોબની અછત માટે ઈમિગ્રન્ટ્સ અને સ્ટુડન્ટ્સને દોષી ગણવાનું ચલણ વધ્યું છે. ઈન્ટરનેશનલ શીખ સ્ટુડન્ટ ઓર્ગેનાઈઝેશન જેવા જૂથો કહે છે કે આવી સમસ્યા માટે માઈગ્રન્ટ સ્ટુડન્ટ્સ નહીં પરંતુ સરકારની નીતિઓ જવાબદાર છે. તેમનું કહેવું છે કે સ્ટુડન્ટ અહીં આવીને ભણે અને પછી વર્ક ફોર્સમાં સામેલ થાય ત્યારે તેઓ કેનેડાની ઈકોનોમીમાં નોંધપાત્ર યોગદાન આપે છે.
કેનેડામાં વિદેશી સ્ટુડન્ટ્સની ફરિયાદ છે કે સરકારે અમારો ગેરફાયદો ઉઠાવ્યો છે. અમારી જરૂર હતી ત્યારે ઉપયોગ કર્યો અને હવે ડિપોર્ટેશનની વાતો કરે છે. અમે અમારા એજ્યુકેશન અને કેનેડિયન ઈકોનોમી માટે ઘણો ભોગ આપ્યો છે અને હવે અમને કહેવામાં આવે છે કે તમારું ભણતર પૂરું કરો અને પછી તમારા દેશ પાછા જતા રહો. આવું થશે તો વિદ્યાર્થીઓ દેવામાં ડૂબી જશે. તેમની ડિમાન્ડ છે કે સરકાર પોસ્ટ ગ્રેજ્યુએટ વર્ક પરમિટ આપે, પર્મેનન્ટ રેસિડન્સી માટે એક સ્પષ્ટ રોડ મેપ આપે અને આખી સિસ્ટમમાં જે પ્રશ્નો છે તેનો ઉકેલ લાવે જેના કારણે વિદ્યાર્થીઓનું શોષણ થઈ રહ્યું છે.
