Japan MEXT Scholarship: વિદેશમાં ભણવાનું પ્લાનિંગ કરી રહેલા ભારતીય વિદ્યાર્થીઓ માટે ગુડ ન્યૂઝ છે. જાપાન તેમને ફ્રીમાં ભણવા માટે બોલાવી રહ્યું છે. ભારતમાં સ્થિત જાપાનના દૂતાવાસે MEXT સ્કોલરશિપની જાહેરાત કરી છે. જાપાન સરકાર તરફથી આપવામાં આવતી આ સ્કોલરશિપ ફુલી-ફંડેડ (Fully-funded) છે. આના દ્વારા અંડરગ્રેજ્યુએટની સાથે-સાથે રિસર્ચમાં માસ્ટર્સ અને પીએચડીનો અભ્યાસ પણ કરી શકાય છે. આ સ્કોલરશિપ એવા વિદ્યાર્થીઓ માટે શ્રેષ્ઠ છે, જેઓ ઓછા બજેટને કારણે વિદેશ ભણવા જઈ શકતા નથી.
માસ્ટર્સ અને પીએચડી પ્રોગ્રામના અભ્યાસ માટે એવા વિદ્યાર્થીઓને સ્કોલરશિપ આપવામાં આવશે, જેમની ઉંમર 35 વર્ષથી ઓછી છે. ઈચ્છુક વિદ્યાર્થીઓએ 13 મે 2026 સુધી [email protected] પર ઈમેલ કરીને એક પ્રારંભિક એપ્લિકેશન ફોર્મ જમા કરાવવાનું રહેશે. ત્યારબાદ મે મહિનામાં અરજીઓની તપાસ કરવામાં આવશે અને 28 જૂને લેખિત પરીક્ષા યોજાશે. આ પછી જુલાઈમાં ઇન્ટરવ્યુ લેવામાં આવશે, જે ઓનલાઈન જ હશે. દૂતાવાસ દ્વારા ટૂંક સમયમાં એ પણ જણાવવામાં આવશે કે કુલ કેટલી સ્કોલરશિપ આપવામાં આવશે.
માસ્ટર્સ અને પીએચડી માટે શરતો શું છે?
માસ્ટર્સ કોર્સમાં એડમિશન લેવા માંગતા વિદ્યાર્થી માટે બેચલર્સમાં ઓછામાં ઓછા 70 ટકા માર્ક્સ હોવા જરૂરી છે. ડોક્ટરલ (પીએચડી) અરજદારો માટે માસ્ટર્સમાં ઓછામાં ઓછા 70 ટકા માર્ક્સ હોવા જોઈએ. આ ઉપરાંત તેમની પાસે રિસર્ચ, ટીચિંગ અને વર્ક એક્સપિરિયન્સ પણ હોવો જોઈએ. જો કોઈએ હ્યુમેનિટીઝ અને સોશિયલ સાયન્સનો અભ્યાસ કરવો હોય, તો ઓછામાં ઓછા 65 ટકા માર્ક્સ હોવા અનિવાર્ય છે. આ સ્કોલરશિપ એપ્રિલ, સપ્ટેમ્બર અથવા ઓક્ટોબર 2027 થી શરૂ થઈને માર્ચ 2029 ના અંત સુધી ચાલશે.
બેચલર્સ કરવા માટે શું શરતો છે?
સ્કોલરશિપ માટે અરજી કરનાર વિદ્યાર્થીના 12મા ધોરણમાં ઓછામાં ઓછા 80% માર્ક્સ હોવા જોઈએ. જે વિદ્યાર્થીઓને જાપાનીઝ ભાષા આવડતી હશે તેમને સ્કોલરશિપમાં પ્રાથમિકતા આપવામાં આવશે. બેચલર્સ સ્કોલરશિપ માટે ફક્ત એ જ વિદ્યાર્થીઓ એપ્લાય કરી શકે છે, જેમનો જન્મ 2 એપ્રિલ 2002 કે ત્યારબાદ થયો હોય. વિદ્યાર્થીઓને કુલ પાંચ વર્ષ માટે સ્કોલરશિપ મળશે, જેમાં પ્રથમ વર્ષ તેઓ જાપાનીઝ ભાષા શીખશે, ત્યારબાદ જ કોર્સ શરૂ થશે.
સ્કોલરશિપના ફાયદા શું છે?
ડોક્ટરલ કોર્સ: દર મહિને 1,45,000 યેન (આશરે ₹85,300) સ્ટાઈપેન્ડ તરીકે આપવામાં આવશે.
માસ્ટર્સ પ્રોગ્રામ: દર મહિને 1,44,000 યેન (આશરે ₹84,700) સ્ટાઈપેન્ડ મળશે.
બેચલર્સ પ્રોગ્રામ: દર મહિને 1,17,000 યેન (આશરે ₹68,800) આપવામાં આવશે.
અન્ય સુવિધાઓ: સ્કોલરશિપ મેળવનાર દરેક વિદ્યાર્થીની ટ્યુશન ફી માફ હશે. આ ઉપરાંત, તેમને જાપાન જવા અને અભ્યાસ પૂરો કરીને ભારત પરત આવવા માટે ફ્રી ફ્લાઈટ ટિકિટ પણ મળશે.
