મુંબઈ, 3 ડિસેમ્બર: મહારાષ્ટ્ર કંટ્રોલ ઓફ ઓર્ગેનાઈઝ્ડ ક્રાઈમ એક્ટ (MCOCA) હેઠળની વિશેષ અદાલતે મંગળવારે રાષ્ટ્રવાદી કોંગ્રેસ પાર્ટી (NCP) નેતા બાબા સિદ્દીકીની હત્યા કેસમાં ધરપકડ કરાયેલા આઠ આરોપીઓને 7 ડિસેમ્બર સુધી પોલીસ કસ્ટડીમાં મોકલી દીધા છે.
મુંબઈ પોલીસ ક્રાઈમ બ્રાન્ચે 12 ઓક્ટોબરે સિદ્દીકીની હત્યાના સંબંધમાં અત્યાર સુધીમાં કથિત મુખ્ય હુમલાખોર શિવકુમાર ગૌતમ સહિત 26 આરોપીઓની ધરપકડ કરી છે.
અગાઉ મેજિસ્ટ્રેટ કોર્ટે તમામ આરોપીઓને જ્યુડિશિયલ કસ્ટડીમાં મોકલી દીધા હતા. પોલીસે 30 નવેમ્બરના રોજ આ તમામ આરોપીઓ વિરુદ્ધ MCOCAની કડક કલમો લાગુ કરી હતી, ત્યારબાદ તેમને મંગળવારે સ્પેશિયલ કોર્ટમાં રજૂ કરવામાં આવ્યા હતા.
પોલીસે આ કેસની ઝીણવટભરી તપાસ માટે ગૌતમ સહિત આઠ આરોપીઓની કસ્ટડી માંગી હતી, જેને વિશેષ ન્યાયાધીશે 7 ડિસેમ્બર સુધી મંજૂર કરી હતી.
બાકીના આરોપીઓને વિશેષ અદાલતે 14 દિવસની કસ્ટડીમાં મોકલી દીધા છે.
જેલમાં બંધ ગેંગસ્ટર લોરેન્સ બિશ્નોઈનો ભાઈ અનમોલ બિશ્નોઈ અને શુભમ લોનકર આ કેસમાં વોન્ટેડ આરોપી છે.
