અલ નીનોની અસરથી વરસાદ ખેંચાયો, વાવણી અને ઊભા પાક પર સંકટ
Bharuch Monsoon Delay: ગરમી-ઉકળાટથી જનજીવન પ્રભાવિત, વરસાદી માહોલના અભાવે લોકોમાં નિરાશા
By: મુનીર પઠાણ, ભરૂચ.
ભરૂચ:
ચોમાસાની સીઝન શરૂ થયા બાદ પણ ભરૂચ જિલ્લામાં નોંધપાત્ર વરસાદ ન પડતા ખેડૂતો સહિત સમગ્ર જનજીવન ચિંતાના ઘેરામાં આવી ગયું છે. અલ નીનોની અસર અને બદલાતા હવામાનના કારણે વરસાદ ખેંચાતા જિલ્લાભરમાં ચિંતાનું વાતાવરણ સર્જાયું છે. મેઘરાજાની લાંબી રાહ વચ્ચે ખેડૂતોની આશા હવે આકાશ તરફ ટકેલી છે. જિલ્લાના વિવિધ વિસ્તારોમાં ખેડૂતોએ બિયારણ, ખાતર અને ખેતરોની તમામ તૈયારીઓ પૂર્ણ કરી દીધી છે. કેટલાક ખેડૂતોએ શરૂઆતના વરસાદના આધારે વાવણી પણ કરી દીધી હતી, પરંતુ ત્યારબાદ વરસાદ અટકી જતાં ઊભા પાક પર સંકટના વાદળો ઘેરાયા છે. જો આગામી દિવસોમાં પૂરતો વરસાદ નહીં પડે તો કપાસ, તુવેર, મકાઈ અને શાકભાજી સહિતના મુખ્ય પાકોને ભારે નુકસાન પહોંચવાની ભીતિ વ્યક્ત થઈ રહી છે.
ખેડૂતોનું કહેવું છે કે વધતા બિયારણ અને ખાતરના ખર્ચ વચ્ચે વરસાદની અનિશ્ચિતતાએ તેમની મુશ્કેલીઓમાં વધારો કર્યો છે. ખેતી માટે કરાયેલું રોકાણ જોખમમાં મુકાતાં આર્થિક નુકસાનની ચિંતા પણ વધી રહી છે. બીજી તરફ વરસાદના અભાવે ગરમી અને ઉકળાટનો પ્રકોપ યથાવત રહેતા લોકો પરસેવે રેબઝેબ થઈ રહ્યા છે. દિવસ દરમિયાન વધતી ભેજ અને અસહ્ય ગરમીને કારણે જનજીવન પર અસર પડી રહી છે. આકાશમાં વરસાદી વાદળો કે માહોલ પણ ન દેખાતા લોકોમાં આશ્ચર્ય અને નિરાશા જોવા મળી રહી છે. હવામાન વિભાગે આગામી દિવસોમાં વરસાદની સંભાવના વ્યક્ત કરી છે, છતાં ખેડૂતોને હજુ સુધી રાહત મળી નથી. અનેક ગામોમાં સારા વરસાદ માટે પ્રાર્થનાઓ અને ધાર્મિક કાર્યક્રમો શરૂ કરવામાં આવ્યા છે. કૃષિ નિષ્ણાતોના જણાવ્યા મુજબ આગામી એકાદ સપ્તાહમાં સારો વરસાદ નહીં પડે તો વાવણીના સમયપત્રકમાં વિલંબ થવાની સાથે કૃષિ ઉત્પાદન પર પણ ગંભીર અસર પડી શકે છે. હાલ સમગ્ર ભરૂચ જિલ્લો મેઘરાજાની મહેરબાનીની આતુરતાપૂર્વક રાહ જોઈ રહ્યો છે. હવે સૌની નજર આકાશ તરફ છે કે ક્યારે વરસાદ વરસે અને ચિંતાના વાદળો દૂર થાય.
