Rahul Gandhi Gujarat Visit 2026: દેશના પાંચ રાજ્યોમાં વિધાનસભાની ચૂંટણીઓ વચ્ચે સોમવારે રાહુલ ગાંધી ગુજરાતની ટૂંકી મુલાકાતે પહોંચ્યા હતા. મિડલ ઈસ્ટમાં ઈરાન-ઈઝરાયેલ વચ્ચે ચાલી રહેલા સંઘર્ષની વચ્ચે રાહુલ ગાંધીએ ભારત-અમેરિકા ટ્રેડ ડીલથી લઈને આદિવાસીઓ માટે ‘વનવાસી’ શબ્દનો પ્રયોગ કરવા બદલ BJP-RSS પર હુમલો કર્યો હતો. રાહુલ ગાંધીએ વડાપ્રધાન નરેન્દ્ર મોદીને પણ નિશાને લીધા છે. રાહુલ ગાંધીએ દોહરાવ્યું કે PM ની સ્થિતિ નબળી છે, અને જ્યારે મોદીજીનું પોતાનું કંટ્રોલ કોઈ બીજાના હાથમાં છે, તો તેઓ દેશની રક્ષા કેવી રીતે કરશે.
आदिवासी अधिकार संविधान सम्मेलन
📍 वडोदरा, गुजरात pic.twitter.com/uO1xCPeR3y
— Amit Chavda (@AmitChavdaINC) March 23, 2026
આ બંધારણ-બિરસા મુંડાનું અપમાન
લોકસભામાં વિરોધ પક્ષના નેતા રાહુલ ગાંધીએ આદિવાસીઓ માટે ‘વનવાસી’ શબ્દના ઉપયોગને બંધારણ અને પૂજનીય આદિવાસી નેતા બિરસા મુંડા પર હુમલો ગણાવ્યો હતો. તેમણે દાવો કર્યો હતો કે આ શબ્દ આદિવાસીઓને પાણી, જંગલ અને જમીનના તેમના મૂળ માલિકી હકથી વંચિત કરવા માટે ઘડવામાં આવ્યો છે, જે સદીઓથી તેમનો જ છે. વડોદરામાં ‘આદિવાસી અધિકાર સંવિધાન સંમેલન’ ને સંબોધતા ગાંધીએ જાતિ વસ્તી ગણતરીની પોતાની માંગ દોહરાવી હતી, જેને તેમણે આદિવાસીઓને દેશની સત્તા અને સંપત્તિમાં તેમનો હિસ્સો અપાવવા માટે જરૂરી ગણાવી હતી. રાહુલ ગાંધીએ આદિવાસી અધિકાર સંવિધાન સંમેલનમાં કહ્યું કે હવે 21મી સદીમાં એક નવો શબ્દ સામે આવ્યો છે. એક એવો શબ્દ જેને RSS અને BJP એ ઘડ્યો છે – ‘વનવાસી’ (જંગલમાં રહેનાર). ‘વનવાસી’ શબ્દનો અર્થ છે કે તમે આ જમીનના મૂળ માલિક નહોતા. બીજી તરફ ‘આદિવાસી’ શબ્દ એ દર્શાવે છે કે આ દેશ તમારો હતો, તેનું પાણી, જંગલ અને જમીન સાચા અર્થમાં તમારી હતી.
પહેલા આવું કોઈ PM એ નથી કર્યું
રાહુલ ગાંધીએ અમેરિકા-ભારત વેપાર સમજૂતીને લઈને વડાપ્રધાન નરેન્દ્ર મોદી પર પણ નિશાન સાધ્યું હતું અને આરોપ લગાવ્યો હતો કે કૃષિ ક્ષેત્રને તે દેશ માટે ખોલી દેવામાં આવ્યું છે, આવું અગાઉ કોઈ વડાપ્રધાને ક્યારેય કર્યું નહોતું. રાહુલ ગાંધીએ કહ્યું કે આદિવાસીનો અર્થ છે ભારતના મૂળ માલિક. જો તમે 1,000, 2,000, કે 5,000 વર્ષ પહેલાં પણ આ જમીન પર આવ્યા હોત, તો તમે જોત કે જમીનનો એક-એક ઇંચ આદિવાસીઓના હાથમાં હતો. રાહુલ ગાંધીએ કહ્યું કે જ્યારે પણ વિકાસની વાત આવે છે ત્યારે આદિવાસીઓની જમીન છીનવી લેવામાં આવે છે.
જ્યારે હક આપવાનો વખત આવે છે ત્યારે ચૂપ થઈ જાય છે..
રાહુલ ગાંધીએ કહ્યું કે આદિવાસીઓની વસ્તી 9 ટકા છે, દલિતોની 15 ટકા અને પછાત વર્ગોની 50 ટકા. શું તમને ખરેખર લાગે છે કે આદિવાસીઓનો આ દેશમાં અત્યારે 10 ટકા હિસ્સો છે? ભાષણો તો બહુ લાંબા-પહોળા આપવામાં આવે છે, લોકો બિરસા મુંડાની મૂર્તિ સામે હાથ જોડીને શ્રદ્ધા બતાવે છે, પરંતુ જ્યારે લોકોને ખરેખર સશક્ત બનાવવાનો કે દેશની દોલત વહેંચવાનો સમય આવે છે, ત્યારે તેઓ સંપૂર્ણપણે ચૂપ થઈ જાય છે.
— Gujarat Congress (@INCGujarat) March 23, 2026
ભાજપને ફટકો, કોંગ્રેસમાં જોડાયા પૂર્વ કોર્પોરેટર
રાહુલ ગાંધીના કાર્યક્રમમાં ભાજપ છોડીને કોંગ્રેસમાં આવેલા ધારાસભ્ય મહેશ વસાવા પણ હાજર રહ્યા હતા. મહેશ વસાવા રાજ્યના મોટા આદિવાસી નેતા છોટુ વસાવાના પુત્ર છે. થોડા સમય પહેલા જ તેઓ કોંગ્રેસમાં આવ્યા છે. રાહુલના કાર્યક્રમમાં ભાજપના કોઈ પ્રદેશ સ્તરના નેતા તો કોંગ્રેસમાં જોડાયા નથી પરંતુ વડોદરામાં મહાનગરપાલિકાની ચૂંટણી પહેલા બે વર્તમાન કોર્પોરેટર (આ જ મહિને કાર્યકાળ પૂરો થયો) ચોક્કસપણે કોંગ્રેસમાં જોડાયા હતા. જેમાં આશિષ જોષી (ભાજપમાંથી નિષ્કાસિત) અને પારુલ પટેલના નામ સામેલ છે. આ બંને કોર્પોરેટર 2021ની ચૂંટણીમાં ભાજપના સિમ્બોલ પર જ જીત્યા હતા. આ ઉપરાંત ભાજપમાં લાંબા સમય સુધી રહેલા પૂર્વ ધારાસભ્ય મધુ શ્રીવાસ્તવની પુત્રી દીપા શ્રીવાસ્તવે પણ કોંગ્રેસનું સભ્યપદ લીધું હતું. કોંગ્રેસમાં સામાજિક કાર્યકર સ્વેજલ વ્યાસ અને કરણી સેનાના નેતા મહેન્દ્ર સિંહ રાઠોડ પણ કોંગ્રેસમાં જોડાયા હતા. આ તમામ લોકો રાહુલ ગાંધીની મુલાકાત બાદ કોંગ્રેસમાં જોડાયા હતા. તમામનું પ્રદેશ પ્રમુખ અમિત ચાવડાએ પાર્ટીમાં સ્વાગત કર્યું હતું.
