Bhupendra Patel America Visit: સપ્ટેમ્બર મહિનામાં ગુજરાતના CM તરીકે પાંચ વર્ષ પૂર્ણ કરવા જઈ રહેલા મુખ્યમંત્રી ભૂપેન્દ્ર પટેલ આગામી અઠવાડિયે એક અનોખી ઉપલબ્ધિ હાંસલ કરશે. તેઓ 17 ઓગસ્ટથી 24 ઓગસ્ટ સુધી અમેરિકા અને કેનેડાની મુલાકાત લેશે. તેઓ છેલ્લા 25 વર્ષમાં અમેરિકાનો સત્તાવાર પ્રવાસ કરનારા ગુજરાતના પ્રથમ વર્તમાન CM હશે. મુખ્યમંત્રી ભૂપેન્દ્ર પટેલ પહેલાં CM રહેલા દિવંગત વિજય રૂપાણી અને આનંદીબેન પટેલ તેમજ વડાપ્રધાન નરેન્દ્ર મોદી પોતાના CM કાર્યકાળ દરમિયાન અમેરિકા ગયા નહોતા. અમેરિકાએ PM નરેન્દ્ર મોદી મુખ્યમંત્રી હતા ત્યાં સુધી તેમને વિઝા આપ્યો નહોતો. ભૂપેન્દ્ર પટેલ ગુજરાતમાં BJPના પ્રથમ CM કેશુભાઈ પટેલ બાદ બીજા CM હશે, જે અમેરિકા પહોંચશે. આ સાથે 25 વર્ષનો ઈંતજાર સમાપ્ત થશે.
અમેરિકામાં ગુજરાતી પટેલોનું વર્ચસ્વ
અમેરિકામાં મોટી સંખ્યામાં પાટીદાર એટલે કે પટેલોની સંખ્યા છે. આવી સ્થિતિમાં પાટીદાર સમુદાયમાંથી આવતા ભૂપેન્દ્ર પટેલનું ભવ્ય સ્વાગત થવાની અપેક્ષા છે. રાજ્યના મંત્રી અને સરકારી પ્રવક્તા જીતુ વાઘાણીએ જણાવ્યું કે CM ભૂપેન્દ્ર પટેલ ઉદ્યોગપતિઓ, રોકાણકારો અને ટેક્નોલોજી લીડર્સને ‘વાઇબ્રન્ટ ગુજરાત ગ્લોબલ સમિટ 2027’ માટે આમંત્રિત કરવા માટે એક હાઈ-લેવલ ડેલિગેશન સાથે પ્રવાસ કરશે. વાઘાણીએ રાજ્ય કેબિનેટની બેઠક બાદ જણાવ્યું કે આ પ્રવાસથી આગામી સમિટ માટે વિદેશી રોકાણ આકર્ષવાના ગુજરાતના પ્રયાસોની પણ શરૂઆત થશે.
25 વર્ષ બાદ ગુજરાત CMનો પ્રવાસ
1995 બાદ આ પહેલીવાર હશે જ્યારે કોઈ વર્તમાન મુખ્યમંત્રી અમેરિકાનો સત્તાવાર પ્રવાસ કરશે. એક વરિષ્ઠ સરકારી અધિકારીને ટાંકીને જણાવાયું છે કે છેલ્લી વખત તત્કાલીન ગુજરાતના મુખ્યમંત્રી કેશુભાઈ પટેલે અમેરિકાનો સત્તાવાર પ્રવાસ કર્યો હતો. તત્કાલીન ગુજરાતના મુખ્યમંત્રી કેશુભાઈ પટેલે 1995 અને એપ્રિલ 2000માં એક અઠવાડિયાના સત્તાવાર પ્રવાસ દરમિયાન અમેરિકાની મુલાકાત લીધી હતી. વર્તમાન PM નરેન્દ્ર મોદીએ કેશુભાઈ પટેલ બાદ ગુજરાતના મુખ્યમંત્રીનું પદ સંભાળ્યું હતું. તેમને 2005માં અમેરિકાએ વિઝા આપવાનો ઇનકાર કર્યો હતો.
મોદી 2014માં પહોંચ્યા હતા અમેરિકા
નરેન્દ્ર મોદીએ 2014માં વડાપ્રધાન બન્યા બાદ જ અમેરિકાનો પ્રવાસ કર્યો હતો. મોદી વડાપ્રધાન બન્યા બાદ તેમની ઉત્તરાધિકારી આનંદીબેન પટેલે 2015માં ગુજરાતના મુખ્યમંત્રી તરીકે પોતાના પ્રથમ વિદેશ પ્રવાસ માટે ચીનને પસંદ કર્યું હતું. તેઓ હવે ઉત્તર પ્રદેશના રાજ્યપાલ છે. વિજય રૂપાણી 2016થી 2021 સુધી ગુજરાતના મુખ્યમંત્રી રહ્યા હતા. તેમણે પોતાના બીજા કાર્યકાળ દરમિયાન રશિયાનો પ્રવાસ કર્યો હતો, પરંતુ તેમણે અમેરિકા-કેનેડાનો કોઈ સત્તાવાર પ્રવાસ કર્યો નહોતો. જોકે, 2018માં કેનેડાના વડાપ્રધાન જસ્ટિન ટ્રુડોની ગુજરાત મુલાકાત દરમિયાન રૂપાણી તેમની સાથે મળ્યા હતા. નરેન્દ્ર મોદીએ વાઇબ્રન્ટ ગુજરાત ગ્લોબલ સમિટની શરૂઆત 2003માં કરી હતી. ભૂપેન્દ્ર પટેલ આ સમિટ માટે અમેરિકા અને કેનેડા જઈ રહ્યા છે.
