Food Poisoning Somnath: વિશ્વવિખ્યાત યાત્રાધામ સોમનાથ ખાતે દર્શન કરવા આવેલા રાજસ્થાનના જયપુરના એક પરિવાર માટે આસ્થાની યાત્રા ત્યારે દુઃસ્વપ્નમાં ફેરવાઈ ગઈ, જ્યારે તેમના 10 બાળકોને ફૂડ પોઈઝનિંગનો શિકાર બનવું પડ્યું. પરિવારના સભ્યો સોમનાથ મહાદેવના દર્શન કરવા જઈ રહ્યા હતા ત્યારે હાટ બજાર વિસ્તારમાં આવેલી ‘શિવશક્તિ રેસ્ટોરન્ટ’માં નાસ્તો કર્યો હતો. પાઉંભાજી ખાધાના થોડા સમયમાં જ બાળકોને અચાનક ઊલટીઓ થવા લાગી અને પેટમાં અસહ્ય દુખાવો ઉપડ્યો. સ્થિતિ એટલી ગંભીર બની કે પરિવારે તાત્કાલિક હોસ્પિટલ તરફ દોટ મૂકવી પડી હતી. આ ઘટનાને પગલે સમગ્ર વિસ્તારમાં ભારે ચકચાર મચી ગઈ હતી અને પ્રવાસીઓની સુરક્ષા અંગે અનેક સવાલો ઉભા થયા છે.
હોસ્પિટલમાં સારવાર અને ફૂડ વિભાગના દરોડા
અસરગ્રસ્ત 10 બાળકોમાંથી 8 બાળકોની તબિયત વધુ ગંભીર જણાતા તેમને સામુહિક આરોગ્ય કેન્દ્રમાં દાખલ કરવામાં આવ્યા હતા, જ્યાં તબીબોની ટીમ તેમની સારવાર કરી રહી છે. હાલ તમામ બાળકોની સ્થિતિ સ્થિર હોવાનું જાણવા મળ્યું છે. ઘટનાની ગંભીરતાને ધ્યાનમાં રાખીને આરોગ્ય અને ફૂડ સેફ્ટી વિભાગની ટીમે તાત્કાલિક શિવશક્તિ રેસ્ટોરન્ટમાં દરોડા પાડ્યા હતા. તપાસ દરમિયાન રેસ્ટોરન્ટમાંથી વાસી પાઉંભાજી અને એક્સપાયરી ડેટ વાળા પાઉંનો જથ્થો મળી આવ્યો હતો, જેનો અધિકારીઓએ સ્થળ પર જ નાશ કર્યો હતો. અધિકારીઓએ ખાદ્યપદાર્થોના નમૂના લઈ લેબોરેટરીમાં પરીક્ષણ માટે મોકલી આપ્યા છે.
નિયમોના પાલન માટે કડક માંગ
પ્રવાસી પરિવારે રેસ્ટોરન્ટ સંચાલકો સામે કડક કાર્યવાહીની માંગ કરી છે. તેમનો આક્ષેપ છે કે નફાખોરી માટે સંચાલકોએ બાળકોના સ્વાસ્થ્ય સાથે ગંભીર ચેડાં કર્યા છે. આ બનાવને પગલે સોમનાથ હાટ બજારમાં અન્ય હોટલ અને રેસ્ટોરન્ટમાં પણ ફૂડ વિભાગ દ્વારા સઘન ચેકિંગ હાથ ધરવામાં આવ્યું હતું, જેનાથી વેપારીઓમાં ફફડાટ વ્યાપી ગયો હતો. સ્થાનિકોએ પણ એવી માંગ કરી છે કે યાત્રાધામમાં રોજ આવતા હજારો શ્રદ્ધાળુઓના હિતમાં ખાદ્યપદાર્થોની ગુણવત્તા અને સ્વચ્છતાના નિયમોનું કડક પાલન થવું જોઈએ. લેબોરેટરીનો રિપોર્ટ આવ્યા બાદ ફૂડ સેફ્ટી એન્ડ સ્ટાન્ડર્ડ્સ એક્ટ મુજબ સંચાલકો વિરુદ્ધ કાયદેસરની કાર્યવાહી કરવામાં આવશે.
