Gujarat Congress Farmers Padyatra: ગુજરાતમાં વીજ લાઈનો અને થાંભલા નાખવા મુદ્દે ખેડૂતોમાં વ્યાપેલા વ્યાપક અસંતોષ વચ્ચે ગુજરાત કોંગ્રેસે અન્નદાતાઓના ન્યાય માટે એક બહુ મોટો રાજકીય અને સામાજિક નિર્ણય લીધો છે. કિસાન કોંગ્રેસ અને કિસાન સંઘર્ષ સમિતિ દ્વારા આગામી ૨૬ જૂનથી રાજ્યમાં ‘કિસાન અધિકાર પગપાળા યાત્રા ૨’ નો ધમાકેદાર પ્રારંભ કરવામાં આવશે. આ અંગે અમદાવાદ ખાતે યોજાયેલી એક પત્રકાર પરિષદમાં કોંગ્રેસના દિગ્ગજ ખેડૂત નેતાઓએ જાહેરાત કરી હતી કે, ભાજપ સરકાર સામે ખેડૂતોનો અવાજ બુલંદ કરવા માટે હવે તેઓ સીધા દ્વારકાધીશના શરણોમાં જઈને કાળિયા ઠાકોરને ન્યાય માટે આજીજી કરશે.
બજાર ભાવ કરતાં ચાર ગણી વાણિજ્ય જંત્રી ચૂકવવાની માંગ સાથે વ્રજવાણીથી નીકળશે ધ્વજા યાત્રા
કોંગ્રેસના ફાયરબ્રાન્ડ ખેડૂત નેતા પાલ આંબલીયાએ પત્રકાર પરિષદમાં આક્રોશ વ્યક્ત કરતા જણાવ્યું હતું કે, ખેડૂત અને ગામડું એ કોંગ્રેસના ડીએનએમાં છે. ખાનગી કંપનીઓ દ્વારા ખેતરોમાં નાખવામાં આવતી વીજ લાઈનો સામે તેઓ વર્ષ ૨૦૧૭ના પ્રથમ પરિપત્રથી જ સતત જમીન સ્તરે લડી રહ્યા છે. કિસાન કોંગ્રેસે અત્યાર સુધીમાં ૧૦૦થી વધુ ગામડાઓની મુલાકાત લઈને પીડિત ખેડૂતો સાથે સીધો સંવાદ સાધ્યો છે. રાજ્યના ૬ જેટલા જિલ્લાઓમાં ખેડૂતોને વહીવટી તંત્ર દ્વારા નોટિસો ફટકારાતા અગાઉ ગાંધીનગર ખાતે ભવ્ય રેલી પણ કાઢવામાં આવી હતી. કોંગ્રેસની સ્પષ્ટ માંગ છે કે વીજ લાઈનોને કારણે ખેડૂતોને થતા નુકસાનના બદલામાં સરકારે બજાર ભાવ કરતાં ચાર ગણી વાણિજ્ય જંત્રી (કમર્શિયલ જંત્રી) મુજબ વળતર ચૂકવવું જોઈએ. આ ન્યાય મેળવવા માટે ૨૬ જૂનથી કચ્છના ઐતિહાસિક વ્રજવાણીથી પવિત્ર ધ્વજાજી સાથે યાત્રા પ્રસ્થાન કરશે.
૧.૫૦ લાખ નવા વીજ થાંભલા નાખી ખેડૂતોને લૂંટવાનો કારસો, મનમોહન સરકારના દેવા માફીના દિવસો યાદ કરાવાયા
આ પ્રસંગે કોંગ્રેસના વરિષ્ઠ નેતા લાલજી દેસાઈએ શાસક પક્ષ પર આકરા પ્રહારો કરતા સનસનાટીભર્યા આક્ષેપો કર્યા હતા કે, ભાજપ સરકાર ૧૩૩ ગીગાવોટ વીજ લાઈનો પસાર કરવાના બહાને ગુજરાતના અન્નદાતાઓને બરબાદ કરવા બેઠી છે. આગામી સમયમાં રાજ્યના ખૂણે-ખૂણેથી ૧૦૦ થી વધુ નવી હાઈટેન્શન વીજ લાઈનો કાઢવાની તૈયારીઓ ચાલી રહી છે. સરેરાશ એક લાઈન માટે ૧૫૦૦ થાંભલા ગણીએ તો પણ આખા ગુજરાતમાં અંદાજે ૧.૫૦ લાખ જેટલા નવા તોતિંગ થાંભલાઓ ખેડૂતોની કિંમતી જમીનો છિન્નભિન્ન કરીને ઊભા કરી દેવાશે. તેમણે ભૂતકાળને યાદ અપાવતા કહ્યું કે, કેન્દ્રની મનમોહન સિંહ સરકારે એક જ ઝાટકે દેશના ખેડૂતોના કરોડો રૂપિયાના દેવા માફ કરી દીધા હતા, જ્યારે વર્તમાન સરકાર ખેડૂતોને લૂંટવાનું કામ કરી રહી છે.
બે અલગ-અલગ રૂટ પરથી યાત્રા દ્વારકા પહોંચશે, ભગવાન કૃષ્ણ પાસે સરકારની સદબુદ્ધિ માટે થશે પ્રાર્થના
આ ભવ્ય આંદોલન અંતર્ગત બે અલગ-અલગ સ્થળોએથી પદયાત્રા યોજાશે. પ્રથમ મુખ્ય યાત્રા કચ્છના વ્રજવાણીથી શરૂ થઈને અંદાજે ૪૦૦ કિલોમીટરનું લાંબુ અંતર કાપીને દ્વારકા પહોંચશે. જ્યારે બીજી પૂરક પદયાત્રા સુરેન્દ્રનગર જિલ્લામાંથી શરૂ થશે, જે અંદાજે ૧૫૦ કિલોમીટરનું અંતર કાપીને દ્વારકા નગરી ખાતે વિરામ લેશે. કોંગ્રેસના નેતાઓએ મક્કમતાપૂર્વક જણાવ્યું છે કે, જ્યાં સુધી ગુજરાતના એક-એક ખેડૂતને તેનો કાયદેસરનો હક અને યોગ્ય વળતર નહીં મળે ત્યાં સુધી આ લડત ચાલુ જ રહેશે. દ્વારકાધીશના મંદિરે શીશ ઝુકાવીને ભગવાન કૃષ્ણ પાસે એવી વિશેષ પ્રાર્થના કરવામાં આવશે કે પ્રભુ આ સરકારને સદબુદ્ધિ આપે જેથી તેઓ જગતના તાતની આંતરડી ઠારવાનું કામ કરે.
