Gujarat Cow Slaughter Case: ગુજરાતની એક કોર્ટે ગૌહત્યાના કેસમાં ત્રણ દોષિતોને આજીવન કેદની સજા સંભળાવી છે. ગાંધીનગર જિલ્લાના કલોલ કોર્ટે આ ચુકાદો આપ્યો છે. કોર્ટે પોતાના ચુકાદામાં મનુસ્મૃતિ, વેદો અને અન્ય હિંદુ ધર્મગ્રંથોનો હવાલો આપીને ગાયના ધાર્મિક મહત્ત્વ વિશે વિગતવાર જણાવ્યું હતું. કોર્ટે કહ્યું કે ગાયો સાથે ક્રૂરતા કરનારાઓને કાયદા અનુસાર સજા મળવી જરૂરી છે. આ કેસમાં ચુકાદો સંભળાવતી વખતે કોર્ટે ત્રણેય દોષિતોને આજીવન કેદની સાથે 3-3 લાખ રૂપિયાનો દંડ પણ ફટકાર્યો છે.
76 પાનાંનો ચુકાદો સંભળાવ્યો
જજ બી.આર. રાજપૂતે આ કેસમાં 76 પાનાંનો ચુકાદો સંભળાવ્યો હતો. તેમણે પોતાના ચુકાદામાં કહ્યું કે આરોપીઓએ ગાયોની નિર્દયતાથી હત્યા કરીને તેમના શરીરના અલગ-અલગ અંગો કાપ્યા હતા અને વેચવા માટે 277 કિલોગ્રામ માંસ કાઢ્યું હતું. તેમણે ટિપ્પણી કરી હતી કે જો આવા ગુનાઓ સામે કાયદા મુજબ કાર્યવાહી કરવામાં નહીં આવે તો ગાયોનું અસ્તિત્વ જોખમમાં મુકાઈ શકે છે.
ચુકાદામાં મનુસ્મૃતિનો ઉલ્લેખ કર્યો
કોર્ટે પોતાના ચુકાદામાં મનુસ્મૃતિનો હવાલો આપતાં કહ્યું કે ગાય અને પશુઓને માત્ર પ્રાણી નહીં, પરંતુ ધર્મનો આધાર માનવામાં આવ્યા છે. મનુએ પશુઓની રક્ષા અને સંભાળની જવાબદારી વૈશ્ય વર્ગને સોંપી હતી. ચુકાદામાં વૈદિક લગ્નના પરંપરાગત સ્વરૂપ ‘આર્ષ વિવાહ’માં ગાય અને બળદના મહત્ત્વનો પણ ઉલ્લેખ કરવામાં આવ્યો હતો. આ ઉપરાંત ઋગ્વેદમાં ગાયને ‘અધન્યા’ ગણાવવામાં આવી છે, જેનો અર્થ છે કે તેની હત્યા કરવી જોઈએ નહીં. અદાલતે કામધેનુ, સુરભિ અને હરિવંશ પુરાણનો ઉલ્લેખ કરીને ગાયને ધાર્મિક પરંપરાઓમાં પૂજનીય ગણાવી હતી.
બે આરોપીઓને નિર્દોષ જાહેર કર્યા
કોર્ટે ગુજરાત પશુ સંરક્ષણ અધિનિયમ, 1954ની 2017માં સુધારેલી કલમ 8(2) હેઠળ દરેક દોષિતને આજીવન કેદ અને 2 લાખ રૂપિયાના દંડની સજા સંભળાવી હતી. જ્યારે કલમ 8(4) હેઠળ 10 વર્ષની સખત કેદ અને 1 લાખ રૂપિયાનો દંડ ફટકાર્યો હતો. તમામ સજાઓ એકસાથે ભોગવવાની રહેશે.
દોષિતોની ઓળખ અમદાવાદના જુહાપુરા નિવાસી વસીમ (34), બહેરામપુરા નિવાસી મોહમ્મદ રફીક (28) અને ફતેવાડી નિવાસી અસફાક ઉર્ફે સલમાન (19) તરીકે થઈ છે. અન્ય બે આરોપીઓને પુરાવાના અભાવે નિર્દોષ જાહેર કરવામાં આવ્યા હતા, જ્યારે એક આરોપીનું કેસની સુનાવણી દરમિયાન મૃત્યુ થયું હતું.
