Isudan Gadhvi Rajpipla: રાજપીપળામાં ધારાસભ્ય ચૈતર વસાવાના સમર્થનમાં યોજાયેલી જાહેર સભામાં આમ આદમી પાર્ટીના નેતા ઇસુદાન ગઢવીએ ભાજપ પર આકરા પ્રહારો કર્યા હતા. તેમણે કહ્યું કે ધારાસભ્ય, સાંસદ, મંત્રી કે મુખ્યમંત્રીની જવાબદારી પ્રજાના હિત માટે કામ કરવાની હોય છે, દલાલી કરવાની નહીં.
સભાને સંબોધતા ઇસુદાન ગઢવીએ વલસાડના સાંસદના એક નિવેદનનો ઉલ્લેખ કરતાં આદિવાસી સમાજને એકતા દાખવવા અપીલ કરી હતી. તેમણે કહ્યું કે જો કોઈ નેતા આદિવાસી સમાજના હિતમાં અવાજ ઉઠાવતો નથી તો લોકોએ આગામી ચૂંટણીમાં તેનો જવાબ આપવો જોઈએ.
ઇસુદાન ગઢવીએ ભાજપના આદિવાસી નેતાઓ પર પણ સવાલો ઉઠાવ્યા હતા. તેમણે કહ્યું કે વર્ષો સુધી સત્તામાં રહેલા નેતાઓએ જળ, જંગલ અને જમીન જેવા મૂળભૂત મુદ્દાઓને પૂરતું મહત્વ આપ્યું નથી, જેના કારણે આદિવાસી સમાજ હજુ પણ પછાત રહ્યો છે.
તેમણે વધુમાં કહ્યું કે આદિવાસી સમાજ આ ધરતીનો મૂળ નિવાસી છે અને પોતાના અધિકારો માટે એકજૂટ રહેવાની જરૂર છે. જળ, જંગલ અને જમીનના મુદ્દે સતત લડત ચાલુ રાખવાનો સંકલ્પ પણ તેમણે વ્યક્ત કર્યો.
સભામાં ઇસુદાન ગઢવીએ જણાવ્યું કે ચૈતર વસાવાના સમર્થનમાં દોઢ લાખથી વધુ હસ્તાક્ષરો એકત્ર કરવામાં આવ્યા છે, જેનું આવેદન જિલ્લા કલેક્ટર મારફતે રાષ્ટ્રપતિને મોકલવામાં આવશે. તેમણે દાવો કર્યો કે આગામી દિવસોમાં અન્ય જિલ્લાઓમાં પણ આવા કાર્યક્રમો યોજાશે.
તેમણે કાર્યકરોને સંબોધતા કહ્યું કે જો ચૈતર વસાવા સામે કાર્યવાહી કરવામાં આવશે તો મોટી સંખ્યામાં આદિવાસી સમાજ વિરોધ નોંધાવશે. અંતમાં તેમણે આદિવાસી સમાજને એકતા જાળવવાની અપીલ કરતાં કહ્યું કે પોતાના હકો અને અસ્તિત્વની રક્ષા માટે સંગઠિત રહેવું જરૂરી છે.
