Kirti Patel Junagadh Arrest: ગુજરાતની જાણીતી ઇન્સ્ટાગ્રામ સ્ટાર કીર્તિ પટેલની જૂનાગઢ પોલીસે રાજસ્થાનથી ધરપકડ કરી છે. જૂનાગઢ પોલીસે કીર્તિ પટેલ વિરુદ્ધ આ કાર્યવાહી જિલ્લામાં અનેક FIR નોંધાયા બાદ કરી છે. હકીકતમાં પાછલા દિવસોમાં સુરત પોલીસે કીર્તિ પટેલ વિરુદ્ધ PASA (પ્રિવેન્શન ઓફ એન્ટી સોશિયલ એક્ટિવિટીઝ એક્ટ) હેઠળ કાર્યવાહી કરી હતી, ત્યારે બિલ્ડરને હનીટ્રેપમાં ફસાવવાના આરોપોમાં ઘેરાયેલી કીર્તિ પટેલ વિરુદ્ધ આ કડક કાર્યવાહી માનવામાં આવી હતી પરંતુ કીર્તિ પટેલ થોડા મહિનામાં જ જેલમાંથી છૂટી ગઈ હતી. કીર્તિ પટેલ હાલમાં મહાશિવરાત્રીના પર્વ પર ત્યારે વિવાદોમાં આવી હતી, જ્યારે તેણે જૂનાગઢ મૃગી કુંડમાં સ્નાન કર્યું હતું.
સંતના વેશમાં કર્યું સ્નાન
કીર્તિ પટેલે આવું કરવાથી વિવાદ ઊભો થયો હતો. કીર્તિ પટેલે ત્યારે સંતના વેશમાં સ્નાન કર્યું હતું. તેણે તેનો વીડિયો ઇન્સ્ટાગ્રામ પર અપલોડ કર્યો હતો. ત્યારે કીર્તિ પટેલ પર સદીઓ જૂની ધાર્મિક પરંપરાઓ તોડવા અને ધાર્મિક લાગણીઓને ઠેસ પહોંચાડવાનો આરોપ લગાવવામાં આવ્યો. આ આખો મામલો વેગ પકડતા જૂનાગઢના એક પ્રમુખ આધ્યાત્મિક સંત અને ભારતી આશ્રમના મહંત ઇન્દ્રનીલ ભારતી બાપુની પ્રતિક્રિયા પણ સામે આવી હતી. આ પછી કીર્તિ પટેલે ઇન્દ્રનીલ બાપુ પર અનેક ટિપ્પણીઓ કરી હતી. ત્યારબાદ આ વિવાદે વધુ વેગ પકડ્યો હતો. ઇન્દ્રનીલ ભારતી બાપુ ઇન્દ્રભારતી બાપુ તરીકે પણ ઓળખાય છે. તેઓ જૂનાગઢના જૂના અખાડા સાથે જોડાયેલા છે, જોકે આ મુદ્દે તેમનો અમરગીરી બાપુ સાથે પણ ટકરાવ થયો હતો.
કીર્તિ પટેલની મુશ્કેલીઓ વધી
મહાશિવરાત્રી પર જૂનાગઢ મૃગી કુંડમાં સ્નાન બાદ ગયા અઠવાડિયે જૂનાગઢમાં તેની વિરુદ્ધ અનેક કેસ નોંધવામાં આવ્યા હતા. આ કેસો ધમકી, ધાર્મિક ગેરવર્તણૂક અને આત્મહત્યાના પ્રયાસ માટે ઉશ્કેરવાના આરોપો સાથે જોડાયેલા છે. પહેલી ફરિયાદ ૧૬ ફેબ્રુઆરીએ જૂનાગઢ રેન્જ ઓફિસની એક મહિલા પોલીસ ઇન્સ્પેક્ટર કે.જે. મોદ દ્વારા નોંધાવવામાં આવી હતી. જેમાં જૂનાગઢમાં મહાશિવરાત્રી મેળા દરમિયાન ક્રિમિનલ ધમકી, શાંતિ ભંગ કરવા અને ફરજમાં અવરોધ ઊભો કરવાનો આરોપ લગાવવામાં આવ્યો હતો. ૧૮ ફેબ્રુઆરીએ ભાલકાતીર્થ પાસે નિરાલી ખોડિયાર ઉદાસીન આશ્રમના સ્વામી બજરંગદાસ ઉદાસીને બીજી FIR નોંધાવી, જેમાં પટેલ પર સંતના વેશમાં મૃગી કુંડમાં સ્નાન કરીને સદીઓ જૂની ધાર્મિક પરંપરાઓ તોડવા અને ધાર્મિક લાગણીઓને ઠેસ પહોંચાડવાનો આરોપ લગાવવામાં આવ્યો.
યુટ્યુબરે નોંધાવી ત્રીજી FIR
ત્રીજી ફરિયાદ ૨૧ ફેબ્રુઆરીએ નોંધવામાં આવી, જ્યારે લોકલ યુટ્યુબર અફઝલ સીદાએ કથિત રીતે ફિનાઈલ પીને સુસાઈડ કરવાનો પ્રયાસ કર્યો, તેમણે પટેલ અને તેમના સાથીઓ પર હેરાન કરવા અને બળજબરીથી વસૂલાતની ધમકીઓનો આરોપ લગાવ્યો. સીદા ‘ઝિદ્દી બોય’ નામે એક યુટ્યુબ ચેનલ ચલાવે છે, તેમણે દાવો કર્યો કે મૃગી કુંડ વિવાદ પર તેમના આલોચનાત્મક વીડિયો બાદ સોશિયલ મીડિયા પર તેમની વ્યુઅરશિપમાં કથિત રીતે ઘટાડો આવ્યા બાદ પટેલે ૨૦ લાખ રૂપિયા માંગ્યા હતા. કીર્તિ પટેલની સોશિયલ મીડિયા પર મજબૂત ફેન ફોલોઈંગ છે. ઇન્સ્ટાગ્રામ પર તેના ૧.૩ મિલિયન ફોલોઅર્સ છે.
સોશિયલ મીડિયા પર છવાયો આખો વિવાદ
કીર્તિ પટેલના વીડિયોની મોટી ડિમાન્ડ છે. મૃગી કુંડમાં સ્નાન વિવાદ બાદ સંતોમાં ભાગલા જોવા મળ્યા હતા. ઇન્દ્રનીલ ભારતી બાપુ સાથેના ટકરાવમાં ઘણા લોકો તેમના સમર્થનમાં પણ આવ્યા હતા પરંતુ જૂનાગઢમાં નોંધાયેલા કેસોએ કીર્તિ પટેલની મુશ્કેલીઓ વધારી દીધી. કીર્તિ પટેલના સમર્થકોનો આરોપ છે કે મૃગી કુંડમાં અન્ય ઘણી મહિલાઓ અને લોકોએ પણ સ્નાન કર્યું તો પછી કાર્યવાહી કીર્તિ પટેલ વિરુદ્ધ કેમ થઈ રહી છે? આ આખો વિવાદ સોશિયલ મીડિયા પર છવાયેલો છે. કીર્તિ પટેલ સુરતની રહેવાસી છે.
