Rapar Principal Rape Case: કચ્છ જિલ્લાના રાપર તાલુકામાં એક શાળાના પ્રિન્સિપાલ પર 13 વર્ષની બાળકી સાથે દુષ્કર્મ કરવાનો આરોપ લાગ્યો છે. આ શાળા ગ્રામ સ્વરાજ સંઘ દ્વારા ચલાવવામાં આવી રહી હતી અને આ બાળકી આ જ શાળામાં આઠમા ધોરણમાં અભ્યાસ કરતી હતી. શાળાના પ્રિન્સિપાલ અને અન્ય ત્રણ લોકો સામે કેસ નોંધવામાં આવ્યો છે.
વંચિત લોકોના કલ્યાણ માટે કામ કરતું આ ટ્રસ્ટ પોતાના કેમ્પસમાં ધોરણ 1થી 10 સુધીના વિદ્યાર્થીઓ માટે રેસિડેન્શિયલ શાળા ચલાવે છે. આ મામલો ત્યારે સામે આવ્યો જ્યારે સ્વતંત્રતા દિવસ સમારોહની તૈયારીઓ દરમિયાન એક મહિલા શિક્ષિકાને શાળા પરિસરમાં પ્રેગ્નન્સી ટેસ્ટ કિટ મળી.
‘સુનસાન જગ્યાએ લઈ જઈને દુષ્કર્મ કર્યું’
શિક્ષિકા અને ગર્લ્સ હોસ્ટેલની વોર્ડને CCTV ફૂટેજની તપાસ કરી અને કથિત રીતે જાણવા મળ્યું કે કિટ શાળાના પ્રિન્સિપાલના ખિસ્સામાંથી પડી હતી. ત્યારબાદ તેમણે ટ્રસ્ટના સેક્રેટરીને જાણકારી આપી.
રાપર પોલીસ સ્ટેશનના ઇન્સ્પેક્ટર RL ખટ્ટાનાએ જણાવ્યું, “તપાસ દરમિયાન ટ્રસ્ટના સેક્રેટરી અને કોર કમિટીના સભ્યને ઘટનાની જાણ થઈ. પ્રિન્સિપાલનું ઘર છોકરીઓના હોસ્ટેલની નજીક જ છે. આરોપ છે કે તેમણે 15 ઓગસ્ટના બે દિવસ પહેલાં અને તેના બે દિવસ બાદ છોકરીને હોસ્ટેલ પાછળ એક સુનસાન જગ્યાએ લઈ જઈને તેની સાથે રેપ કર્યો.”
મામલો દબાવવાનો આરોપ
પોલીસે જણાવ્યું કે શાળા પ્રશાસને પોલીસને જાણ કરવાને બદલે માત્ર પ્રિન્સિપાલને સસ્પેન્ડ કર્યા અને છોકરીને તેના માતા-પિતા પાસે પરત મોકલી દીધી, જેના કારણે મામલો દબાવવાનો પ્રયાસ કરવામાં આવ્યો. ખટ્ટાનાએ કહ્યું, “છોકરી શાળા પ્રશાસનની દેખરેખ હેઠળ હતી. સગીરા સાથે થયેલા જાતીય શોષણ અંગે પોલીસને જાણ કરવી તેમની જવાબદારી હતી.”
પોલીસે નોંધાવી FIR
ઘટનાની જાણ થયા બાદ પોલીસે ચાઇલ્ડ વેલફેર કમિટીની મદદથી છોકરી અને તેના પરિવારનો સંપર્ક કર્યો. શુક્રવારે રાપર પોલીસ સ્ટેશનમાં પ્રિન્સિપાલ, હોસ્ટેલ વોર્ડન, કોર કમિટીના સભ્ય અને ટ્રસ્ટ સેક્રેટરી સામે FIR નોંધવામાં આવી.
આરોપીઓ સામે BNS અને POCSO એક્ટની કલમો હેઠળ કેસ નોંધવામાં આવ્યો છે. જણાવવામાં આવી રહ્યું છે કે આરોપી પ્રિન્સિપાલ આ જ શાળાનો પૂર્વ વિદ્યાર્થી હતો અને પ્રિન્સિપાલ બનતા પહેલાં તેણે ત્યાં બે વર્ષ સુધી શિક્ષક તરીકે કામ કર્યું હતું.
