Fake Currency Racket Ahmedabad: ગુજરાતના અમદાવાદ શહેર પોલીસની ક્રાઈમ બ્રાન્ચે યોગ ફાઉન્ડેશનના વાહનમાંથી નકલી નોટોના મોટા ખેલનો પર્દાફાશ કર્યો છે. અમદાવાદ ક્રાઈમ બ્રાન્ચે 2.38 કરોડની નકલી નોટો સાથે કુલ સાત લોકોની ધરપકડ કરી છે. આમાં આધ્યાત્મિક સંત બનેલા પ્રદીપ ગુરુજી અને એક મહિલા સાથે અન્ય પાંચ લોકોનો સમાવેશ થાય છે. પોલીસે સત્યમ યોગ ફાઉન્ડેશનના વાહનમાંથી નકલી કરન્સી સાથે સાધન-સામગ્રી જપ્ત કરી છે. પોલીસના જણાવ્યા અનુસાર, સંત બનેલા પ્રદીપ ગુરુજીનું અસલી નામ પ્રદીપ જોતાંગિયા છે. પોલીસના મતે નકલી નોટોના આ ગોરખધંધાનો તે જ મુખ્ય આરોપી છે. તે કથિત રીતે આધ્યાત્મિક પ્રવૃત્તિઓની આડમાં આ કામ કરતો હતો. પોલીસ તપાસમાં નકલી નોટો કેવી રીતે અને કઈ રીતે બનાવવામાં આવી તેનો પણ ખુલાસો થયો છે.
અમદાવાદમાં મળી નકલી કરન્સી
ગુરુવારે અમદાવાદ ક્રાઈમ બ્રાન્ચે અમરાઈવાડી વિસ્તારમાં નકલી કરન્સી સિન્ડિકેટનો ભાંડો ફોડ્યો હતો. તપાસમાં સામે આવ્યું છે કે આ નેટવર્ક સુરત સુધી ફેલાયેલું છે. સ્વયંભૂ આધ્યાત્મિક સંત પ્રદીપ ગુરુજી યોગ ફાઉન્ડેશનની આડમાં આ કામ કરતો હતો. પોલીસે સ્થળ પરથી એક મહિલા સહિત છ લોકોની અટકાયત કરી હતી. ક્રાઈમ બ્રાન્ચના એક અધિકારીએ જણાવ્યું કે શહેરમાં નકલી કરન્સીનો મોટો જથ્થો આવવાની ચોક્કસ બાતમી મળતા ટીમોએ આખી રાત અમરાઈવાડી પર નજર રાખી હતી. શંકાસ્પદ હિલચાલ દેખાતા અધિકારીઓએ તરત જ કાર્યવાહી કરી શખ્સોને પકડી પાડ્યા હતા. અધિકારીઓને જાણવા મળ્યું કે નકલી કરન્સી સત્યમ યોગ ફાઉન્ડેશન સાથે જોડાયેલી ગાડીમાં લઈ જવામાં આવી રહી હતી.
ગાડીઓ પર મંત્રાલયના નિશાન
પોલીસ તપાસમાં સામે આવ્યું છે કે ગાડી પર ભારત સરકાર અને આયુષ મંત્રાલયના નિશાન પણ હતા, જેનો ઉપયોગ કથિત રીતે શંકા ટાળવા અને સ્થળો પર સરળતાથી અવરજવર કરવા માટે કરવામાં આવતો હતો. તપાસ આગળ વધતા અમદાવાદ ક્રાઈમ બ્રાન્ચે સુરત પોલીસ સાથે સંકલન કર્યું, જેનાથી 80 લાખ રૂપિયાની વધુ નકલી નોટો જપ્ત કરવામાં આવી. આ સાથે કુલ રિકવરી 2.9 કરોડ રૂપિયા થઈ ગઈ છે. પૂછપરછમાં સામે આવ્યું કે નકલી કરન્સી વરાછા, સુરતમાં છાપવામાં આવી રહી હતી. આ માહિતીના આધારે ક્રાઈમ બ્રાન્ચની ટીમોએ સ્થાનિક પોલીસ સાથે મળીને તે જગ્યાએ દરોડા પાડ્યા અને પ્રિન્ટિંગ સેટઅપ શોધી કાઢ્યું. નકલી નોટ છાપવા માટે વપરાતા મશીનો, કાચો માલ અને દસ્તાવેજો જપ્ત કરવામાં આવ્યા છે.
પારડી ગામમાં ચાલતું હતું ફાઉન્ડેશન
પોલીસ તપાસમાં ખુલાસો થયો છે કે આ ગોરખધંધો સુરતના કામરેજમાં આવતા પારડી ગામથી ચાલતો હતો. અહીં જ શ્રી સત્યમ યોગ ફાઉન્ડેશન આશ્રમ આવેલો છે. પોલીસને માહિતી મળી છે કે પ્રદીપ ગુરુજી ‘સત્યમ યોગ એન્ડ હેલ્થ સેન્ટર’ નામે રાજકોટમાં યોગ ક્લાસ ચલાવી રહ્યા હતા. પોલીસે ત્યાં પણ તપાસ શરૂ કરી છે. ક્રાઈમ બ્રાન્ચના સૂત્રોએ જણાવ્યું કે આરોપીઓએ એક સ્કીમ બનાવી હતી જેમાં તેઓ અસલી 500 રૂપિયાની નોટ લેતા હતા અને બદલામાં 1,500 રૂપિયાની નકલી નોટો આપતા હતા. એક આયોજિત ડીલમાં તેમનો ઈરાદો 66 લાખ રૂપિયાની અસલી કરન્સીને 2 કરોડ રૂપિયાની નકલી નોટો સાથે બદલવાનો હતો.
કેવી રીતે બનાવી નકલી નોટ?
ક્રાઈમ બ્રાન્ચની તપાસમાં સામે આવ્યું છે કે આરોપીઓએ અલીબાબા ડિજિટલ પેમેન્ટ ગેટવેનો ઉપયોગ કરીને ચીની સ્ત્રોત પાસેથી રિઝર્વ બેંક ઓફ ઈન્ડિયા માર્કિંગ (RBI અને ભારત) જેવો સિક્યોરિટી થ્રેડ પેપર ખરીદ્યો હતો. આ સિવાય એ પણ જાણવા મળ્યું છે કે નકલી નોટોની ડિઝાઇન, લેઆઉટ અને વિઝ્યુઅલ ફીચર્સને અસલી ભારતીય કરન્સી જેવી બનાવવા માટે ફોટો-એડિટિંગ સોફ્ટવેર અને ChatGPT જેવા AI-આધારિત પ્લેટફોર્મ જેવા ડિજિટલ ટૂલ્સનો ઉપયોગ કરવામાં આવ્યો હતો. આરોપીઓમાંથી એકને આમાં મહારત હાંસલ હતી.
