Vadaj Swaminarayan Temple Controversy: અમદાવાદના નવાવાડજ વિસ્તારમાં આવેલા કૃષ્ણનગર સ્વામિનારાયણ મંદિરમાં વહીવટકર્તાઓના આપખુદશાહી ભર્યા વલણને કારણે મોટો વિવાદ સર્જાયો છે. છેલ્લા ૩૩ વર્ષથી મંદિરમાં નિઃસ્વાર્થભાવે સત્સંગ સભા કરતા વડીલોને નવા વહીવટકર્તાઓએ મંદિર છોડી દેવા મજબૂર કર્યા હોવાના ગંભીર આક્ષેપો ઉઠ્યા છે. જે વડીલોએ પોતાના પરસેવાથી સત્સંગની ધૂણી ધખાવીને આ મંદિર ઉભું કરવામાં મહત્વનો ફાળો આપ્યો હતો, તેમને જ હવે ભક્તિ કરવા માટે રોકવામાં આવતા ભક્તોમાં ભારે રોષ જોવા મળી રહ્યો છે. હાલ આ વડીલોએ અન્ય એક હરિભક્તના મકાનમાં આશરો લઈને પોતાની ભક્તિ ચાલુ રાખી છે.
વહીવટકર્તાઓની આપખુદશાહી અને આર્થિક લાલચ
સ્થાનિક સત્સંગીઓના જણાવ્યા મુજબ, મંદિરના નવા વહીવટકર્તાઓ હવે ભક્તિને પણ વેપાર બનાવી રહ્યા છે. ૩૩ વર્ષ જૂની સત્સંગ સભાને યથાવત રાખવા માટે વહીવટકર્તાઓએ વડીલો પાસે પૈસાની માંગણી કરી હોવાનું સામે આવ્યું છે. એવો પણ આક્ષેપ છે કે મંદિરને કાલુપુર ગાદીના નામે લખી આપવા માટે જે લોકોએ સહયોગ આપ્યો છે, તેઓ હવે આ જાહેર મંદિરને પોતાની ખાનગી મિલકત સમજી રહ્યા છે. વહીવટમાં એવા લોકો આવી ગયા છે જેઓ ધર્મના પ્રચાર કરતા પોતાની સત્તા અને વર્ચસ્વ જાળવવામાં વધુ રસ ધરાવે છે, જેના કારણે જૂના અને સાચા ભક્તો હાંસિયામાં ધકેલાઈ રહ્યા છે.
સંપ્રદાયના સાધુઓ અને અનુયાયીઓ સામે સવાલો
વાડજ મંદિરના આ વિવાદની સાથે કાલુપુર સ્વામિનારાયણ સંપ્રદાયના કેટલાક સાધુઓના ચારિત્ર્ય સામે પણ આંગળી ચિંધાઈ રહી છે. ભૂતકાળમાં જે સાધુઓના નામ સેક્સ કાંડ કે મહિલાઓ સાથે ભાગી જવાના કિસ્સામાં ઉછળ્યા હતા, તેમના જ અંગત અનુયાયીઓ આ મંદિર પર કબજો જમાવીને બેઠા હોવાની ચર્ચા છે. જે લોકો પાયાના સત્સંગીઓને ભજન કરતા અટકાવે છે, તેઓ સંપ્રદાયમાં ચાલતા અનૈતિક કાર્યો સામે મૌન સેવે છે. ધર્મના ઓઠા હેઠળ પોતાની આપખુદશાહી ચલાવનારા આવા તત્ત્વોને કારણે ભક્તિમય વાતાવરણ ડહોળાઈ રહ્યું છે.
હિન્દુ મંદિરોની સાર્વજનિક મર્યાદા અને સામાજિક રોષ
હિન્દુ ધર્મ મુજબ મંદિર એ સાર્વજનિક સ્થળ છે, જ્યાં કોઈ પણ વ્યક્તિને ભજન કે સત્સંગ કરતા અટકાવવાનો કોઈને કાયદેસરનો હક નથી. વાડજ મંદિરના કિસ્સામાં વહીવટકર્તાઓના અંગત પારિવારિક પ્રશ્નો અને તેમના વર્તનને લઈને પણ સોશિયલ મીડિયા પર આકરા પ્રહારો થઈ રહ્યા છે. લોકોનું માનવું છે કે જેઓ પોતાના ઘરનો વહીવટ યોગ્ય રીતે નથી કરી શકતા, તેઓ મંદિરની મિલકતો પર હક જમાવીને બેઠા છે. જો મંદિર સાર્વજનિક ન હોય તો વહીવટકર્તાઓએ તે સ્પષ્ટ કરવું જોઈએ, નહીંતર સાચા ભક્તોને ધર્મથી દૂર રાખવાનું પાપ આ સંપ્રદાયને ભારે પડી શકે છે.
