Tapi Illegal Sand Mining Vyara: તાપી જિલ્લાના વ્યારા તાલુકા હેઠળ આવતા કણજા ગામે વહીવટી તંત્ર દ્વારા મોડી રાત્રે એક હાઈપ્રોફાઈલ સંયુક્ત ઓપરેશન હાથ ધરીને તાપી નદીના પટમાં ધમધમતા ગેરકાયદેસર રેતી ખનન (Illegal Sand Mining) ના મોટા નેટવર્કનો પર્દાફાશ કર્યો છે. સ્થાનિક કલેક્ટરની સીધી સૂચનાથી પ્રાંત અધિકારી, મામલતદાર, ખાણ-ખનિજ ભુસ્તર વિભાગ અને પોલીસ પ્રશાસનની ટીમોએ એકસાથે કણજા નદી કિનારે આકસ્મિક દરોડા પાડ્યા હતા. આ મેગા ઓપરેશન દરમિયાન તંત્રએ ઘટનાસ્થળેથી અંદાજે ૧ કરોડ રૂપિયાથી વધુની કિંમતનો ભારે કન્સ્ટ્રક્શન મુદ્દામાલ જપ્ત કરીને રેત માફિયાઓ સામે કાનૂની સપાટો બોલાવ્યો છે.
હિટાચી મશીનો અને ૧૦ નાવડીઓ સાથે ૧ કરોડથી વધુનો મુદ્દામાલ જપ્ત
દરોડા દરમિયાન વહીવટી તંત્રની ટીમે નદીના પટમાંથી ગેરકાયદેસર રીતે ખોદકામ કરતા ૩ મોટા હિટાચી મશીનો, પાણીમાંથી રેતી કાઢવા માટે ઉપયોગમાં લેવાતી ૧૦ લોખંડની નાવડીઓ અને ચોરીની રેતી ભરીને સપ્લાય કરવા માટે તૈયાર રાખેલા ૨ હાઈવા ટ્રકોને રંગેહાથ ઝડપી પાડી સીઝ કર્યા હતા. ભૂસ્તર વિભાગના સત્તાવાર અહેવાલ મુજબ કબજે લેવાયેલા આ તમામ વાહનો અને સાધનોની બજાર કિંમત ૧ કરોડ રૂપિયાથી વધુ થાય છે. આ આકસ્મિક દરોડાથી નદી કિનારે કાળી કમાણી કરતા તત્વોમાં ભારે નાસભાગ મચી ગઈ હતી.
લીઝ બંધ હોવા છતાં ખનનનો ખેલ, મોટા માથાઓની સંડોવણીની શંકા
પ્રાથમિક તપાસમાં સૌથી ચોંકાવનારો ખુલાસો એ થયો છે કે કણજા ગામના જે ચોક્કસ સરકારી સર્વે નંબર વાળા વિસ્તારમાંથી રેતી ઉલેચવામાં આવી રહી હતી, ત્યાં સરકારી રેકોર્ડ મુજબ લીઝ (Mining Lease) ઘણા સમયથી સત્તાવાર રીતે બંધ છે. આવી સ્થિતિમાં પણ સરકારી નિયમોના લીરેલીરા ઉડાવીને આટલા મોટા પાયે નદીની કુદરતી સંપત્તિ કોણ ચોરી રહ્યું હતું અને આ રેકેટ પાછળ કયા રાજકીય કે સ્થાનિક મોટા માથાઓની મિલીભગત છે તે દિશામાં ખાણ-ખનિજ વિભાગે આકરી પૂછપરછ અને ફોરેન્સિક તપાસનો દોર શરૂ કર્યો છે.
તાપીમાં નવા કલેક્ટર આવતા જ રેત માફિયાઓ પર તંત્રની કડક ધોંસ
તાપી જિલ્લામાં નવા કલેક્ટરે ચાર્જ સંભાળ્યા બાદ ખનિજ ચોરી સામે ઝીરો ટોલરન્સની નીતિ અપનાવવામાં આવી છે. છેલ્લા એક જ મહિનામાં તાપી નદીના અલગ-અલગ પટ પર સપાટો બોલાવીને તંત્રએ કરોડો રૂપિયાના ડમ્પર અને મશીનો જપ્ત કર્યા છે. ભુસ્તર વિભાગે સ્પષ્ટ કર્યું છે કે કણજાના ગુનેગારો સામે ખનિજ ચોરી અને પર્યાવરણ નુકસાની ધારા હેઠળ આકરો દંડ વસૂલવામાં આવશે. નદીઓની ઇકો-સિસ્ટમ બચાવવા માટે આગામી દિવસોમાં ડ્રોન કેમેરા અને રાત્રિ પેટ્રોલિંગ દ્વારા સતત મોનિટરિંગ કડક રાખવામાં આવશે.
