Homemade Cleaners: લોકો દિવાળીની તૈયારી ઘણા દિવસો અગાઉથી શરૂ કરી દે છે, કારણ કે પાંચ દિવસના તહેવારમાં સફાઈથી લઈને સજાવટ સુધી ઘણું કામ કરવું પડે છે. દેવી લક્ષ્મીના સ્વાગત માટે ઘરના દરેક ખૂણાને સાફ કરવામાં આવે છે. આ સમય દરમિયાન, રસોડાની ચીકણી દિવાલો, બાથરૂમના ડાઘ-ધબ્બા અને બારીઓ પર જામેલી ગંદકી સાફ કરવી મુશ્કેલ બની શકે છે. આ સમસ્યાને દૂર કરવા માટે, તમે ઘરે ક્લીનર્સ બનાવી શકો છો, જે આ મુશ્કેલ કામને સરળ બનાવી શકે છે.
ઘરની સફાઈ કરતી વખતે ડાઘ-ધબ્બા સાફ કરવા અને તાંબા અને પિત્તળના વાસણો સાફ કરવા ન માત્ર ખૂબ મહેનત, ડિટર્જન્ટ અને સાબુની જરૂર નથી પડતી, પરંતુ તેમાં સમય પણ ખૂબ જ બગડે છે. આવી સ્થિતિમાં ચાલો જાણીએ ઘરમાં ઉપલબ્ધ વસ્તુઓમાંથી ક્લીનર્સ કેવી રીતે બનાવી શકાય છે.
ગ્લાસ ક્લીનર કેવી રીતે બનાવવું?
તમારા ઘર દરવાજા અને બારીઓ પરના કાચને સાફ કરવા માટે, સ્પ્રે બોટલમાં બે ચમચી વ્હાઈટ વિનેગર, બે કપ નવશેકું પાણી, એક ચમચી કોર્નસ્ટાર્ચ અને એક કપ રબિંગ આલ્કોહોલ મિક્સ કરો. આનો ઉપયોગ કરીને, બારીના કાચને સાફ કરશો તો ડાઘ થોડા જ સમયમાં દૂર થઈ જશે.
તેલયુક્ત ડાઘ દૂર કરવા માટે ક્લીનર
તેલયુક્ત ડાઘને દૂર કરવા માટે ઘણી મહેનત કરવી પડે છે. આ કિસ્સામાં, બે કપ પાણીમાં બે ચમચી લીંબુનો રસ, એક ચમચી બેકિંગ સોડા અને અડધી ચમચી કેસ્ટાઇલ સાબુ મિક્સ કરીને ક્લીનર બનાવો. આનાથી દિવાલો પરથી તેલયુક્ત ડાઘ પણ દૂર થાય છે.
રસોડાને સાફ કરવા માટે ક્લીનર
રસોડાને સાફ કરવામાં સૌથી વધુ સમય લાગે છે, કારણ કે તેમાં દિવાલો અને ફ્લોર પર ચીકાશ હોય છે અને રસોડામાં રાખેલા ડબ્બા પણ ગંદા હોય છે. આ વિસ્તારોને સાફ કરવા માટે, ચાર કપ નવશેકું પાણી, એક ચતુર્થાંશ કપ ડીશવોશિંગ લિક્વિડ અને એક ચતુર્થાંશ કપ બેકિંગ સોડા મિક્સ કરીને ક્લીનર તૈયાર કરો. આની મદદથી, તમે સિંકથી લઈને રેફ્રિજરેટર, સ્ટીલના વાસણો, કાઉન્ટર વગેરે સાફ કરી શકો છો.
તાંબા અને પિત્તળના ક્લીનર
જો તમે દિવાળી પૂજા માટે તાંબા અને પિત્તળના વાસણો બહાર કાઢ્યા હોય, પરંતુ તે ઘણા મહિનાઓથી એમ જ પડ્યા રહેવાથી કાળા થઈ ગયા હોય, તો તેને સાફ કરવા માટે લીંબુના રસમાં મીઠું મિક્સ કરી આ લિક્વિડને વાસણો પર લગાવો અને તેને 5-6 મિનિટ માટે રહેવા દો. આ પછી, સ્ક્રબરથી સાફ કરી લો.
જંતુ ભગાડવા માટેનું લિક્વિડ
દિવાળીની સફાઈ દરમિયાન, ઘરના ખૂણામાંથી ઘણીવાર જંતુઓ બહાર આવે છે. તેનાથી છુટકારો મેળવવા માટે, બે ચમચી ટી ટ્રી ઓઈલ, એટલી જ માત્રામાં લીમડાનું તેલ, એક ચતુર્થાંશ કપ બેકિંગ સોડા, લસણનો રસ અને બે કપ પાણી મિક્સ કરીને લિક્વિડ બનાવો. આ લિક્વિડને એવી જગ્યાઓ પર સ્પ્રે કરો જ્યાં જંતુઓ હોવાની શક્યતા હોય.
