Caste Census Reservation Debate: સંસદના વિશેષ સત્ર દરમિયાન મહિલા અનામત સાથે જોડાયેલા ત્રણ વિધેયકોનો પ્રસ્તાવ કેન્દ્રીય કાયદા મંત્રી અર્જુન રામ મેઘવાલે ગુરુવારે લોકસભામાં રજૂ કર્યો. બિલ રજૂ થતાની સાથે જ વિપક્ષે સખત વિરોધ કર્યો. સીમાંકન બિલનો કોંગ્રેસ, સમાજવાદી પાર્ટી, AIMIM, BJD સહિત અનેક વિપક્ષી પાર્ટીઓએ વિરોધ કર્યો. આ દરમિયાન સીમાંકન બિલ પર અખિલેશ યાદવ અને કેન્દ્રીય ગૃહ મંત્રી સામસામે આવી ગયા.
સમાજવાદી પાર્ટીના પ્રમુખ અખિલેશ યાદવે સીમાંકન બિલનો વિરોધ કર્યો. તેમણે કહ્યું કે, તેઓ મહિલા અનામત બિલના સમર્થનમાં છે પરંતુ સીમાંકન બિલનો વિરોધ કરી રહ્યા છે. સપા પ્રમુખે સરકારને સવાલ કર્યો કે વસ્તી ગણતરી કેમ નથી થઈ રહી? તેમણે કહ્યું, સરકાર વસ્તી ગણતરી એટલા માટે નથી કરવા માંગતી કારણ કે અમે જાતિગત વસ્તી ગણતરી માંગીશું અને પછી જાતિના આધારે અનામત માંગીશું. તેમણે કહ્યું કે, ભાજપ છેતરીને સત્તામાં આવવા માંગે છે.
‘વસ્તી ગણતરીનું કામ ચાલુ’
અખિલેશના સવાલનો જવાબ આપતા કેન્દ્રીય ગૃહમંત્રી અમિત શાહે કહ્યું કે, વસ્તી ગણતરીનું કામ શરૂ થઈ ચૂક્યું છે. સાથે જ સરકારે જાતિ વસ્તી ગણતરી શરૂ કરવાનો નિર્ણય લઈ લીધો છે અને જાતિની સાથે જ વસ્તી ગણતરી થઈ રહી છે.
लोकसभा में अमित शाह का भाषण pic.twitter.com/w9P1y5GZSJ
— 𝑨𝒃𝒉𝒊𝒔𝒉𝒆𝒌 𝑷𝒂𝒏𝒅𝒆𝒚 (@abhipandey7785) April 16, 2026
વસ્તી ગણતરીમાં જાતિની કોલમ હશે: અમિત શાહ
આ દરમિયાન સપા સાંસદ ધર્મેન્દ્ર યાદવે સવાલ ઉઠાવ્યો કે વસ્તી ગણતરીમાં જાતિની કોલમ નથી. અમિત શાહે સ્પષ્ટ કર્યું કે અત્યારે ઘરોની ગણતરી થઈ રહી છે અને ઘરોની કોઈ જાતિ હોતી નથી. તેમણે કહ્યું, સમાજવાદી પાર્ટીનું જો ચાલે તો તેઓ ઘરોની પણ જાતિ કરી દે. ગૃહમંત્રીએ કહ્યું, જ્યારે નાગરિકોની વસ્તી ગણતરી થશે ત્યારે તેમાં જાતિની કોલમ હશે.
ધર્મના આધારે અનામત ગેરબંધારણીય: અમિત શાહ
લોકસભામાં બોલતા અમિત શાહે કહ્યું કે, ધર્મેન્દ્ર યાદવે મુસ્લિમ મહિલાઓને અનામત આપવાની વાત કહી. આ ગેરબંધારણીય છે. આપણું બંધારણ ધર્મના આધારે અનામત આપવાનો અધિકાર આપતું નથી. તેમણે કહ્યું, ધર્મના આધારે મુસ્લિમોને અનામત ગેરબંધારણીય છે.
મુસ્લિમોના અનામત પર શાહનો અખિલેશને જવાબ
અમિત શાહના નિવેદન પર અખિલેશ યાદવે કહ્યું કે, ગૃહમંત્રીએ ગેરબંધારણીય વાત કહી છે. તેમણે સવાલ કર્યો કે શું મુસ્લિમ મહિલાઓ અડધી વસ્તીનો હિસ્સો નથી. અખિલેશના આ નિવેદન પર તરત જ વળતો પ્રહાર કરતા શાહે કહ્યું, સમાજવાદી પાર્ટી પોતાની બધી ટિકિટો મુસ્લિમ મહિલાઓને આપી દે, અમને શું વાંધો છે.
