ઢાકા: શુક્રવાર, 13 ફેબ્રુઆરી 2026 ના રોજ મતગણતરી પૂર્ણ થયા બાદ એ સ્પષ્ટ થઈ ગયું છે કે બાંગ્લાદેશ નેશનલિસ્ટ પાર્ટી (BNP) બાંગ્લાદેશમાં આગામી સરકાર બનાવવા જઈ રહી છે. આ ઐતિહાસિક ચૂંટણીમાં પાર્ટીએ સંસદની બે તૃતીયાંશથી વધુ બેઠકો પર જીત મેળવી છે.
તારિક રહેમાન બનશે આગામી વડાપ્રધાન
BNP ના નેતા તારિક રહેમાન, જેઓ છેલ્લા 17 વર્ષથી લંડનમાં સ્વૈચ્છિક દેશનિકાલમાં હતા અને તાજેતરમાં જ બાંગ્લાદેશ પરત ફર્યા છે, તેમનું દેશના આગામી વડાપ્રધાન બનવાનું નક્કી માનવામાં આવે છે. આ ચૂંટણીમાં જમાત-એ-ઇસ્લામી બીજા ક્રમે રહી છે. આ સાથે બાંગ્લાદેશી મતદારોએ સામાન્ય ચૂંટણીની સાથે લેવાયેલા લોકમત (Referendum) માં વ્યાપક બંધારણીય સુધારાઓને પણ મંજૂરી આપી દીધી છે.
ભારત માટે કેમ મહત્વનું છે?
બાંગ્લાદેશમાં આ સત્તા પરિવર્તન ભારત માટે વ્યૂહાત્મક રીતે અત્યંત મહત્વનું છે. અગાઉ શેખ હસીનાના શાસનકાળ દરમિયાન ભારત અને બાંગ્લાદેશ વચ્ચેના સંબંધો ખૂબ જ ગાઢ હતા. હવે જ્યારે તારિક રહેમાનના નેતૃત્વમાં BNP સત્તા પર આવી રહી છે, ત્યારે દક્ષિણ એશિયાની ભૂ-રાજનીતિ અને સુરક્ષાના સમીકરણો બદલાઈ શકે છે.
