Kerala Explosives Seized: કેરળમાં મલપ્પુરમ પાસે ચેમ્માડમાં શનિવારે ડુંગળી ભરેલી એક ટ્રકમાંથી જિલેટીનની ૧૦,૫૦૦ થી વધુ લાકડીઓ અને ડેટોનેટર જપ્ત કરવામાં આવ્યા છે. પોલીસે જણાવ્યું કે આ સિલસિલામાં ટ્રકની માલિકની અટકાયત કરવામાં આવી છે. પોલીસના જણાવ્યા અનુસાર, ઇંટોના ભઠ્ઠા પાસે ઉભેલી આ ટ્રકમાંથી અંદાજે ૨૪૫ બોક્સ મળી આવ્યા છે જેમાં જિલેટીનની ૧૦,૫૦૦ થી વધુ લાકડીઓ, ડેટોનેટર અને વાયર રાખેલા હતા.
તિરુરંગડી પોલીસ સ્ટેશનના અધિકારીઓએ જણાવ્યું કે ડુંગળી ભરેલી આ ટ્રક શુક્રવારે મોડી રાત્રે ઇંટોના ભઠ્ઠા પર પહોંચી હતી. એક ગુપ્ત માહિતી મળતા પોલીસ ઘટનાસ્થળે પહોંચી હતી, જેના પછી ટ્રકમાંથી સામાન ઉતારી રહેલા લોકો ભાગી ગયા હતા.
શનિવારે સવારે પોલીસે સામાન ઉતાર્યો અને ડુંગળીની બોરીઓ વચ્ચે છુપાવીને રાખવામાં આવેલા ડબ્બાઓમાંથી ડેટોનેટર, જિલેટીનની લાકડીઓ અને વાયર મળી આવ્યા. પોલીસ અધિકારીઓએ જણાવ્યું કે ટૂંક સમયમાં ગુનો નોંધવામાં આવશે.
પોલીસે જણાવ્યું કે અટકાયત કરવામાં આવેલી મહિલા પથ્થરની એક ખાણ પણ ચલાવે છે અને શંકા છે કે વિસ્ફોટક અને જિલેટીનની લાકડીઓ ગેરકાયદેસર ખનન પ્રવૃત્તિઓમાં ઉપયોગ કરવા માટે લાવવામાં આવી હતી. એક અધિકારીએ જણાવ્યું કે વિસ્ફોટકો કેરળની બહારથી લાવવામાં આવ્યા હતા અને તેમના સ્ત્રોતની તપાસ શરૂ કરી દેવામાં આવી છે.
આ પહેલા પોલીસે ૪ ફેબ્રુઆરીએ પલક્કડના કદમકોડમાં એક વાહનમાં લદાયેલા તરબૂચ વચ્ચે છુપાવીને રાખવામાં આવેલી જિલેટીનની ૧૮,૦૦૦ લાકડીઓ અને ૪,૨૦૦ ડેટોનેટર જપ્ત કર્યા હતા.
