Manipur Musician Murder Delhi: દક્ષિણ-પૂર્વ દિલ્હીના કિલોકરી ગામમાં મોટા અવાજે વાગી રહેલા સંગીતની ફરિયાદ કર્યા બાદ મણિપુરના એક જાણીતા સંગીતકારની કથિત રીતે માર મારીને હત્યા કરવામાં આવી.
ટાઇમ્સ ઑફ ઇન્ડિયા અનુસાર, ચોંગથામ વિક્રમ સિંહ મણિપુરના સંગીત જગતમાં જાણીતું નામ હતા. તેઓ જાણીતા રૉક બેન્ડ ‘ફીનિક્સ’ના ગિટારવાદક હતા. તેઓ પ્રસિદ્ધ શાસ્ત્રીય ગાયિકા ચોંગથામ ઓંગબી કમલા દેવીના પુત્ર અને ભારતની પ્રથમ બાફ્ટા એવોર્ડ જીતનારી ફિલ્મની નિર્દેશક લક્ષ્મીપ્રિયા દેવીના પિતરાઈ ભાઈ હતા. તેઓ દિલ્હીમાં એક મ્યુઝિક સ્કૂલ ચલાવતા હતા.
6 સપ્ટેમ્બરની મધરાતની આસપાસ સિંહે પોતાના ઘરની નજીક આવેલા એક ઢાબામાં ડિલિવરી અને સર્વિસનું કામ કરી રહેલા લોકોને અવાજ ઓછો કરવા માટે કહ્યું.
ટાઇમ્સ ઑફ ઇન્ડિયાના અહેવાલ અનુસાર, જ્યારે તેઓ તેમની સાથે વાત કરવા માટે સીડીઓ પરથી નીચે ઉતરી રહ્યા હતા, ત્યારે તે જૂથ ઝડપથી તેમની તરફ આવ્યું અને ગલીમાં તેમના પર હુમલો કરી દીધો. અહેવાલો અનુસાર, તેમને ખરાબ રીતે માર મારવામાં આવ્યો.
55 વર્ષીય સિંહને હુમલામાં ગંભીર ઈજાઓ થઈ. તેમના પુત્ર યાઇફાબા તેમને હોસ્પિટલ લઈ ગયા, પરંતુ હોલી ફેમિલી હોસ્પિટલમાં તેમણે દમ તોડી દીધો.
યાઇફાબાએ સમાચાર એજન્સી PTIને જણાવ્યું, ‘મારા પિતા નીચે ગયા અને તેમને અવાજ ન કરવા માટે કહ્યું કારણ કે અમને મુશ્કેલી થઈ રહી હતી. તેમણે મારા પિતાને માર માર્યો.’ તેમણે આગળ જણાવ્યું કે જ્યારે તેમણે દરવાજો ખોલ્યો, ત્યારે તેમણે જોયું કે તેમના પિતા શર્ટ વગરના હતા અને આરોપીઓ તેમને માર મારી રહ્યા હતા.
પુત્રે આગળ કહ્યું, ‘તે લોકો ભાગી ગયા. હું મારા પિતાને ઇમરજન્સી રૂમમાં લઈ ગયો, જ્યાં ડૉક્ટરે જણાવ્યું કે તેમના બચવાની શક્યતા ઘણી ઓછી છે. બાદમાં ડૉક્ટરે અમને જણાવ્યું કે તેમનું મૃત્યુ થઈ ગયું છે.’
અહેવાલ અનુસાર, પોલીસે આઠ લોકોને અટકાયતમાં લીધા છે. આ મામલે ભારતીય ન્યાય સંહિતા (BNS)ની કલમ 103(2) (હત્યા) અને કલમ 3(5) (સામૂહિક ઇરાદો) હેઠળ કેસ નોંધવામાં આવ્યો છે.
હિન્દુસ્તાન ટાઇમ્સના અહેવાલ અનુસાર, ધરપકડ કરાયેલા લોકોની ઓળખ ભરત કુમાર (19), પ્રમોદ (26), રમઝાન ખાન (22), વિજય (36), દીપાંશુ (21), મોહન વિશ્વકર્મા (32) અને મન્નુ (26) તરીકે થઈ છે. પોલીસે જણાવ્યું કે તેમાંથી ચાર લોકો ઢાબાઓ પર ડિલિવરી વર્કર અને બે પેકેજિંગ વર્કર તરીકે કામ કરતા હતા, જ્યારે મન્નુ એક પિઝા કિયોસ્ક પર કામ કરતો હતો.
ઇન્ડિયન એક્સપ્રેસે દક્ષિણ-પૂર્વ દિલ્હીના પોલીસ નાયબ કમિશનર વિનીત કુમારને ટાંકીને જણાવ્યું, ‘મેં અન્ય વરિષ્ઠ અધિકારીઓ સાથે પરિવાર અને સમુદાયના અન્ય સભ્યો સાથે મુલાકાત કરી છે અને તેમને ઝડપી તથા કાયદેસરની કાર્યવાહીનું આશ્વાસન આપ્યું છે. તમામ સાત આરોપીઓની ધરપકડ કરી લેવામાં આવી છે અને એક સગીરને પકડી લેવામાં આવ્યો છે. આગળની તપાસ ચાલી રહી છે.’
ઘટનાને લઈને રાજકીય વિરોધ
ઘટના બાદ દિલ્હીમાં કાયદો અને વ્યવસ્થાની સ્થિતિને લઈને તીવ્ર પ્રતિક્રિયા સામે આવી છે. વિપક્ષી નેતાઓએ X પર પોસ્ટ કરીને દિલ્હીની કાયદો અને વ્યવસ્થાની સ્થિતિ પર સવાલો ઉઠાવ્યા છે.
લોકસભામાં વિપક્ષના નેતા રાહુલ ગાંધીએ લખ્યું, ‘મણિપુરના જાણીતા સંગીતકાર ચોંગથામ વિક્રમ સિંહ જી પોતાના ઘરની બહાર કેટલાક લોકોને અવાજ ઓછો કરવા માટે કહેવા નીચે ગયા હતા. આ માટે તેમને માર મારીને મારી નાખવામાં આવ્યા.’
તેમણે કહ્યું, ‘એક પિતાની પોતાના જ ઘરની બહાર, પોતાના જ દેશની રાજધાનીમાં હત્યા કરી દેવામાં આવી. આવી અનેક ઘટનાઓ બાદ આજે દિલ્હીમાં રહેતો પૂર્વોત્તરનો દરેક પરિવાર એક જ સવાલ પૂછી રહ્યો છે – શું અમે અહીં સુરક્ષિત છીએ? આ વધતી અરાજકતાને રોકવા માટે શાહનું ગૃહ મંત્રાલય અને દિલ્હી પોલીસ શું કરી રહ્યા છે, ખાસ કરીને પૂર્વોત્તરના લોકો વિરુદ્ધ થતી ઘટનાઓને લઈને?’
તેમણે કહ્યું, ‘તપાસ ઝડપથી થવી જોઈએ અને દોષિતોને ન્યાયના કઠેડામાં લાવવા જોઈએ. વિક્રમ જીના પરિવાર પ્રત્યે મારી સંવેદનાઓ.’
કોંગ્રેસ અધ્યક્ષ મલ્લિકાર્જુન ખડગેએ પણ રાહુલ ગાંધીની પ્રતિક્રિયાનું સમર્થન કરતાં કહ્યું, ‘મણિપુરના જાણીતા સંગીતકાર ચોંગથામ વિક્રમ સિંહ જીની ટોળા દ્વારા નિર્દય હત્યા, BJPના શાસનમાં સંપૂર્ણપણે કથળી ગયેલી કાયદો અને વ્યવસ્થાની વધુ એક ભયાનક યાદ અપાવે છે. વિદ્યાર્થીઓ સુરક્ષિત નથી. મહિલાઓ પર દરરોજ અત્યાચાર થઈ રહ્યા છે. પૂર્વોત્તર ભારતના લોકોને ભેદભાવનો સામનો કરવો પડે છે. દલિત, આદિવાસી અને લઘુમતીઓ અત્યંત અસુરક્ષિત બનેલા છે.’
ખડગેએ આરોપ લગાવ્યો, ‘ગૃહમંત્રી અમિત શાહની દેખરેખ હેઠળ દિલ્હી ગુનાની રાજધાની બની ગઈ છે. NCRBના આંકડાઓમાં વર્ષ દર વર્ષે રાષ્ટ્રીય રાજધાનીમાં ગુનાનું સ્તર સૌથી ઊંચું નોંધાઈ રહ્યું છે.’
તેમણે આગળ કહ્યું, ‘શોકગ્રસ્ત પરિવાર પ્રત્યે મારી ઊંડી સંવેદનાઓ. તેમને ન્યાય મળવો જોઈએ અને જવાબદાર લોકો વિરુદ્ધ સૌથી કડક કાર્યવાહી થવી જોઈએ. મોદી સરકારની અસમર્થતાને કારણે મણિપુરના લોકો પોતાના રાજ્યની અંદર અને તેની બહાર, બંને જગ્યાએ પીડિત છે.’
મણિપુરના પૂર્વ મુખ્યમંત્રી એન. બીરેન સિંહે પણ ઘટનાને લઈને ઊંડું દુઃખ વ્યક્ત કર્યું. તેમણે લખ્યું, ‘પ્રસિદ્ધ મણિપુરી ગિટારવાદક અને પશ્ચિમી સંગીતના અગ્રદૂત શ્રી ચોંગથામ વિક્રમ સિંહના દુઃખદ નિધનથી અત્યંત દુઃખી છું. દક્ષિણ-પૂર્વ દિલ્હીમાં તેમના નિવાસસ્થાન નજીક કથિત રીતે તેમના પર થયેલા હુમલાની ઘટના અંગે પણ હું અત્યંત ચિંતિત છું.’
તેમણે કહ્યું, ‘સંગીતના ક્ષેત્રમાં વિક્રમ સિંહનું અમૂલ્ય યોગદાન હંમેશા યાદ રાખવામાં આવશે. તેમનું અકાળે નિધન તેમના પરિવાર, સંગીત જગત અને મણિપુરના લોકો માટે મોટી ખોટ છે. ઘટનાના સંબંધમાં હવે પુરાવા સામે આવ્યા બાદ હું દિલ્હી પોલીસને અપીલ કરું છું કે તે ઝડપી અને યોગ્ય કાર્યવાહી કરે, મામલાની સંપૂર્ણ તપાસ કરે અને શક્ય તેટલી વહેલી તકે ન્યાય સુનિશ્ચિત કરે.’
