NEET UG Paper Leak CBI Chargesheet: NEET UG પ્રશ્નપત્ર લીક મામલે CBIનો મોટો ખુલાસો, NTA ના નિષ્ણાત સહિત 13 સામે ચાર્જશીટ
NEET UG Paper Leak CBI Chargesheet: 2026ની NEET UG પરીક્ષાનું પ્રશ્નપત્ર કથિત રીતે લીક થવાના મામલે દેશભરમાં થયેલા વિરોધ પ્રદર્શન બાદ કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાના થોડા દિવસ પછી, કેન્દ્રીય તપાસ બ્યુરો (CBI)એ મંગળવારે આ મામલે પોતાની પ્રથમ ચાર્જશીટ દાખલ કરી દીધી. તેમાં ધરપકડ કરાયેલા તમામ 13 આરોપીઓના નામ સામેલ છે. તેમાં પ્રોફેસર પી.વી. કુલકર્ણી પણ સામેલ છે.
કુલકર્ણી 2019થી નેશનલ ટેસ્ટિંગ એજન્સી (NTA)ના કેમિસ્ટ્રી એક્સપર્ટ પેનલમાં હતા. આરોપ છે કે તેમને સંપૂર્ણ પ્રશ્નપત્ર જોવાની પહોંચ હતી, કારણ કે અંગ્રેજીમાંથી મરાઠીમાં તેનું અનુવાદ કરવાની જવાબદારી તેમની જ હતી.
CBIના જણાવ્યા મુજબ, કુલકર્ણીએ કથિત રીતે ઓછામાં ઓછા ₹21 લાખ કમાયા. આરોપ છે કે તેમણે અન્ય બે વિષય નિષ્ણાતો સાથે મળીને પોતાના ભણાવેલા વિદ્યાર્થીઓને પ્રશ્નપત્ર લીક કર્યો.
તપાસ એજન્સીનો આરોપ છે કે ત્યારબાદ પ્રશ્નોને એક નેટવર્ક મારફતે આગળ પહોંચાડવામાં આવ્યા. તેમાં કોચિંગ સંસ્થાઓના સંચાલકો, કાઉન્સેલિંગ સેન્ટર ચલાવતા લોકો અને અન્ય વચેટિયાઓ સામેલ હતા. ત્યારબાદ પ્રશ્નપત્ર વિદ્યાર્થીઓ અને તેમના પરિવારજનોને ₹50 હજારથી લઈને ₹10 લાખ સુધીની રકમ લઈને વેચવામાં આવ્યો.
તપાસ અધિકારીઓનું કહેવું છે કે તેનો હેતુ પ્રશ્નપત્ર લીક કરીને પૈસા કમાવવાનો હતો. સાથે જ કોચિંગ સંસ્થાઓના વિદ્યાર્થીઓનું પરિણામ વધુ સારું કરવું અને તેમની પ્રતિષ્ઠા વધારવી પણ હતી. CBIની તપાસમાં અનેક રાજ્યોમાં ફેલાયેલું એક સંગઠિત નેટવર્ક સામે આવ્યું છે, જેમાં કોચિંગ સંસ્થાઓ, NTAના વિષય નિષ્ણાતો અને એજન્ટો સામેલ હતા.
એક સૂત્રએ જણાવ્યું, “મુખ્ય આરોપી પી.વી. કુલકર્ણી પોતાના ઘરે 10થી 15 વિદ્યાર્થીઓને ભણાવતા હતા. ત્યાં અન્ય બે વિષય નિષ્ણાતો સાથે વિશેષ ક્લાસ લેવામાં આવતી હતી. કુલકર્ણી વિદ્યાર્થીઓને પ્રશ્નો બોલીને લખાવતા હતા. તેમની પાસે સંપૂર્ણ પ્રશ્નપત્ર હતું, તેથી તેઓ પ્રશ્નો બોલતા હતા અને વિદ્યાર્થીઓને તે પોતાની નોટબુકમાં લખાવતા હતા.”
સૂત્રએ વધુમાં જણાવ્યું કે તપાસમાં એવો કોઈ પુરાવો મળ્યો નથી કે પ્રશ્નપત્ર લીક કરનાર કોઈ અલગ ગુનાહિત ગેંગ કાર્યરત હતી. “તપાસમાં સામે આવ્યું કે કોચિંગ સંસ્થાઓ ચલાવતા કેટલાક લોકોનું એક નેટવર્ક હતું, જે ઇચ્છતું હતું કે તેમની પાસે ભણતા વિદ્યાર્થીઓ પરીક્ષા પાસ કરે. તેનાથી સંસ્થાઓની પ્રતિષ્ઠા વધતી અને વધુ વિદ્યાર્થીઓ જોડાતા.”
સૂત્રના જણાવ્યા મુજબ, NTAના વિષય નિષ્ણાતોએ પ્રશ્નપત્ર લીક કરવાના બદલામાં લાખો રૂપિયા કમાયા. જ્યારે જેમણે બાદમાં પ્રશ્નપત્ર મેળવીને આગળ વેચ્યો, તેમણે દરેક પ્રશ્નપત્ર અથવા તેના અલગ-અલગ ભાગ વેચીને ₹50 હજારથી લઈને ₹15 લાખ સુધી કમાણી કરી. તપાસમાં કોઈપણ આરોપી સામે અગાઉનો કોઈ ગુનાહિત રેકોર્ડ મળ્યો નથી.
CBIના પ્રવક્તાએ જણાવ્યું કે કુલકર્ણી ઉપરાંત NTA પેનલની વિષય નિષ્ણાત મનીષા હવાલદાર અને મનીષા માંધરે સામે પણ આરોપ લગાવવામાં આવ્યા છે. માંધરેને પ્રશ્નપત્ર તૈયાર કરવાની જવાબદારી સોંપવામાં આવી હતી અને તેમને બોટની અને ઝૂલોજી બંને વિભાગોની માહિતી હતી. જ્યારે હવાલદારને માત્ર ફિઝિક્સ વિભાગની માહિતી હતી.
CBIના જણાવ્યા મુજબ, કુલકર્ણીએ મનીષા વાઘમારે દ્વારા બોલાવવામાં આવેલા વિદ્યાર્થીઓના વિશેષ ક્લાસ લીધા. આ ક્લાસોમાં તેમણે પ્રશ્નો, વિકલ્પો અને તેમના જવાબો બોલીને લખાવ્યા. વિદ્યાર્થીઓ તેને પોતાની નોટબુકમાં લખતા હતા. તપાસકર્તાઓનું કહેવું છે કે વિદ્યાર્થીઓની નોટબુકમાં લખાયેલા પ્રશ્નો લગભગ સંપૂર્ણપણે અસલી NEET પ્રશ્નપત્ર સાથે મેળ ખાતા હતા.
CBIના પ્રવક્તાએ નિવેદનમાં જણાવ્યું, “પૈસાની લેવડદેવડની તપાસ કરવામાં આવી. આરોપીઓના અનેક બેંક ખાતા, બેંક લોકર અને એક ડીમેટ ખાતું ફ્રીઝ કરી દેવામાં આવ્યું છે. ડિજિટલ ફોરેન્સિક રિપોર્ટ, હેન્ડરાઇટિંગ એક્સપર્ટનો અભિપ્રાય અને શૈક્ષણિક નિષ્ણાતોની રિપોર્ટ પણ મેળવવામાં આવી છે. આ રિપોર્ટોએ સાબિત કર્યું કે પરીક્ષા પહેલાં લીક થયેલા પ્રશ્નોના પ્રસાર કરવામાં આરોપીઓની ભૂમિકા હતી.”
અગાઉ પોતાની રિપોર્ટમાં જણાવ્યું હતું કે શિક્ષણ મંત્રાલયની ફરિયાદના આધારે તપાસ શરૂ કરનાર CBIએ પુણેના કેમિસ્ટ્રી પ્રોફેસર પી.વી. કુલકર્ણીને સમગ્ર કાવતરાનો માસ્ટરમાઇન્ડ ગણાવ્યો છે. આ તપાસ પરીક્ષાની વિશ્વસનીયતા અંગે વધતી ચિંતાઓ અને આરોપોની વચ્ચે શરૂ કરવામાં આવી હતી.
દિલ્હીની રાઉઝ એવન્યુ કોર્ટમાં દાખલ કરાયેલી ચાર્જશીટમાં CBIએ 360 સાક્ષીઓ, 422 દસ્તાવેજો અને 43 ભૌતિક પુરાવાઓનો ઉલ્લેખ કર્યો છે. એજન્સીએ તમામ 13 આરોપીઓ સામે ભારતીય ન્યાય સંહિતા હેઠળ ગુનાહિત કાવતરું, છેતરપિંડી, ગુનાહિત વિશ્વાસઘાત, પુરાવા નષ્ટ કરવા સહિત અનેક કલમો હેઠળ આરોપ લગાવ્યા છે. ઉપરાંત ભ્રષ્ટાચાર નિવારણ અધિનિયમ હેઠળ ગુનાહિત કૃત્ય અને જાહેર પરીક્ષા (અનુચિત સાધનોની રોકથામ) અધિનિયમ, 2024 હેઠળ પણ આરોપ લગાવવામાં આવ્યા છે.
