PM Modi Speech Reaction: પશ્ચિમ એશિયાના સંઘર્ષની ભારત પર થનારી અસરો અંગે વડાપ્રધાન નરેન્દ્ર મોદીએ સંસદમાં આપેલા નિવેદન બાદ દેશભરમાં અફરાતફરીનો માહોલ જોવા મળ્યો છે. વડાપ્રધાને જ્યારે “કોરોનાની જેમ લાંબો સમય લડવાની તૈયારી રાખવા” જણાવ્યું, ત્યારે જનતામાં ફાળ પડી હતી કે આગામી સમયમાં ચીજવસ્તુઓની અછત સર્જાઈ શકે છે. આ નિવેદનની સીધી અસર પેટ્રોલ પંપો પર જોવા મળી, જ્યાં લોકોએ પોતાના વાહનોમાં ઇંધણ ભરાવવા માટે વહેલી સવારથી જ લાંબી લાઈનો લગાવી દીધી હતી, જેના કારણે અનેક શહેરોમાં ટ્રાફિક વ્યવસ્થા ખોરવાઈ ગઈ હતી.
સરકાર અને વહીવટી તંત્ર દ્વારા અફવાઓ ન ફેલાવવા અપીલ
પરિસ્થિતિ ગંભીર બનતા રાજ્ય સરકારના મંત્રીઓ અને નેતાઓ મેદાનમાં આવ્યા છે. ગુજરાતના નાયબ મુખ્યમંત્રી હર્ષ સંઘવીએ સ્પષ્ટતા કરી છે કે રાજ્યમાં પેટ્રોલ કે ડીઝલની કોઈ અછત નથી અને પૂરતો જથ્થો ઉપલબ્ધ છે. તેમણે નાગરિકોને અફવાઓથી દૂર રહેવા અને ગભરાટમાં આવીને સંગ્રહખોરી ન કરવા વિનંતી કરી છે. તંત્ર દ્વારા ચેતવણી આપવામાં આવી છે કે ઇંધણની અછત અંગે ખોટી માહિતી ફેલાવનારા તત્વો સામે કડક કાયદેસરની કાર્યવાહી કરવામાં આવશે.
સંસદમાં પશ્ચિમ એશિયાના સંઘર્ષ અને ભારતની રણનીતિ પર ચર્ચા
વડાપ્રધાને સંસદમાં સ્વીકાર્યું હતું કે ઈરાન-ઈઝરાયેલ યુદ્ધની અસરો લાંબા સમય સુધી રહી શકે છે અને હોર્મુઝ સ્ટ્રેટ બંધ થવાની સ્થિતિ ચિંતાજનક છે. ભારત પોતાની ઉર્જા જરૂરિયાતો પૂરી કરવા માટે હવે ૨૭ ને બદલે ૪૧ દેશો પાસેથી તેલની આયાત કરી રહ્યું છે. સરકાર તેલ અને ગેસના સંકટને ટાળવા માટે સક્રિયપણે વૈકલ્પિક ઉકેલો શોધી રહી છે. જોકે, આ નિવેદન પાછળનો હેતુ દેશને પૂર્વતૈયારી માટે જાગૃત કરવાનો હતો, પરંતુ સામાન્ય જનતામાં તેની અસર ગભરાટ તરીકે જોવા મળી છે.
મીડિયાની ભૂમિકા અને પ્રજાની પરેશાની વચ્ચેનો વિરોધાભાસ
વડાપ્રધાનના નિવેદન અને ત્યારબાદ નેતાઓ દ્વારા કરવામાં આવતા બચાવ વચ્ચે સામાન્ય પ્રજા મૂંઝવણમાં મુકાઈ છે. એક તરફ કેન્દ્ર સરકાર લાંબા ગાળાના સંકટની વાત કરે છે, તો બીજી તરફ રાજ્ય સરકાર બધું જ સામાન્ય હોવાનો દાવો કરી રહી છે. આ વિરોધાભાસી વાતોને કારણે પેટ્રોલ પંપો પર પોલીસ બંદોબસ્ત ખડકવાની નોબત આવી છે. મીડિયા અને સત્તાધારી પક્ષના નેતાઓ લોકોને શાંત પાડવા મથી રહ્યા છે, પરંતુ જનતામાં વિશ્વાસ જાળવી રાખવો એ અત્યારે વહીવટી તંત્ર માટે મોટો પડકાર બની રહ્યો છે.
