Sonam Wangchuk Protest: દિલ્હીના જંતર-મંતર પર ચાલી રહેલા આંદોલન વચ્ચે સોનમ વાંગચુકને વહેલી સવારે પોલીસ દ્વારા હોસ્પિટલ ખસેડવામાં આવ્યા હતા. વાંગચુકને ખસેડવાની પ્રક્રિયા દરમિયાન ભારે હોબાળો થયો હતો, જેમાં પ્રદર્શનકારીઓ અને પોલીસ સામસામે આવી ગયા હતા. આ ઘટના બાદ આંદોલનકારીઓએ આક્ષેપ કર્યો છે કે પોલીસ દ્વારા સોનમ વાંગચુક સાથે જબરદસ્તી અને દુર્વ્યવહાર કરવામાં આવ્યો છે.
આ ઘટનાના વિરોધમાં પ્રદર્શનકારી દીપકે હવે આમરણાંત ભૂખ હડતાળ પર ઉતરી ગયા છે. ભાવુક થયેલા દીપકેએ મંચ પરથી આક્રોશ વ્યક્ત કરતા જણાવ્યું હતું કે, સોનમ વાંગચુક અને વિદ્યાર્થીઓ સાથે કરવામાં આવેલી મારપીટ સત્તાધારીઓની મોટી ભૂલ છે. તેમણે સ્પષ્ટ શબ્દોમાં કહ્યું કે આંદોલન તોડવાના તમામ પ્રયાસો નિષ્ફળ જશે અને હવે લડત વધુ ઉગ્ર બનશે. દીપકેએ દેશભરના લોકોને જંતર-મંતર પહોંચી આંદોલનને સમર્થન આપવા અપીલ કરી છે અને 20 જુલાઈના રોજ સંસદ સુધીની માર્ચ યોજવાનો સંકલ્પ દોહરાવ્યો છે.
હોસ્પિટલ રિપોર્ટ અને પત્નીની ચિંતા
સોનમ વાંગચુકને હોસ્પિટલ લઈ ગયા બાદ તેમના સ્વાસ્થ્યને લઈને ચિંતા વધી છે. હોસ્પિટલના રિપોર્ટ મુજબ, તેમની તબિયત સતત બગડી રહી હતી અને શરીરમાં પાણીનું પ્રમાણ ઘટી જવાથી તેઓ ‘ડીહાઈડ્રેટ’ થઈ ગયા છે. હાલ તેમની સ્થિતિ સ્થિર હોવાનું જાણવા મળે છે. બીજી તરફ, સોનમ વાંગચુકના પત્ની ગીતાંજલિ જ્યારે તેમને મળવા હોસ્પિટલ પહોંચ્યા ત્યારે તણાવપૂર્ણ માહોલ જોવા મળ્યો હતો. ગીતાંજલિએ ડોક્ટરોને સ્પષ્ટ સૂચના આપી છે કે તેમની પરવાનગી વગર સોનમ વાંગચુકને કોઈ પણ પ્રકારની દવા કે અન્ય સામગ્રી આપવામાં ન આવે.
કોર્ટના દખલ બાદ વહીવટીતંત્ર દ્વારા વાંગચુકના સ્વાસ્થ્યનું ધ્યાન રાખવાની સૂચના આપવામાં આવી હતી, જે બાદ પોલીસ સક્રિય થઈ હતી. જોકે, આ સમગ્ર ઘટનાક્રમે પ્રદર્શનકારીઓમાં રોષ ભરી દીધો છે. દીપકેના મતે, પ્રદર્શનકારીઓને શાંતિપૂર્ણ રીતે વિરોધ કરવા છતાં રસ્તા પર ઘસડીને લઈ જવામાં આવ્યા હતા, જે લોકશાહીમાં સ્વીકાર્ય નથી. હવે આ આંદોલન આગામી દિવસોમાં કઈ દિશા લેશે તે જોવું રહ્યું.
