Asaduddin Owaisi UCC statement: સુપ્રીમ કોર્ટે તાજેતરમાં મુસ્લિમ મહિલાઓના અધિકારો પર સુનાવણી કરતા કહ્યું કે હવે સમાન નાગરિક સંહિતા (UCC) લાગુ કરવાનો સમય આવી ગયો છે. સર્વોચ્ચ અદાલતની આ ટિપ્પણી પર રાજકીય ઘમસાણ શરૂ થઈ ગયું છે. AIMIM પ્રમુખ અસદુદ્દીન ઓવૈસીએ કહ્યું કે, યુનિફોર્મ સિવિલ કોડના નામે હિંદુ કાયદો મુસ્લિમો પર લાગુ કરી શકાય નહીં. તેમણે કહ્યું કે, ઇસ્લામમાં લગ્ન માત્ર એક કોન્ટ્રાક્ટ (કરાર) છે, તે જવાબદારી નથી.
AIMIM એ શુક્રવારે હૈદરાબાદના સાંસદ અસદુદ્દીન ઓવૈસીનો એક વીડિયો પોસ્ટ કર્યો હતો. જેમાં તેમણે કહ્યું હતું કે, “તમે UCC ના નામે હિંદુ કાયદો મુસ્લિમો પર લાગુ કરી શકતા નથી. નિકાહ અમારા માટે ધાર્મિક સંસ્કાર નથી, તે ધર્મનો એક ભાગ છે.” તેમણે એમ પણ કહ્યું કે, જેન્ડર જસ્ટિસ (લિંગ ન્યાય) ની વાતો કરનારાઓ ઝકિયા જાફરીને મળતા નથી.
ઇસ્લામમાં લગ્ન એક કોન્ટ્રાક્ટ: ઓવૈસી
ઓવૈસીએ એક કાર્યક્રમ દરમિયાન કહ્યું કે, સમાન નાગરિક સંહિતાની ચર્ચા ફરી એકવાર શરૂ થઈ છે. UCC ની વાત કરનારાઓ યાદ રાખે કે ઇસ્લામમાં લગ્ન એક કોન્ટ્રાક્ટ છે. તે જન્મ-જન્મની વાત નથી. તેમણે કહ્યું કે, સુપ્રીમ કોર્ટનો એક ચુકાદો છે કે હિંદુ ધર્મમાં જો પત્ની સાસુ-સસરાની સેવા ન કરે તો તે ‘ક્રૂરતા’ ગણાય છે, જ્યારે ઇસ્લામમાં આવી કોઈ જોગવાઈ નથી. માતા-પિતાની જવાબદારી પુત્રની છે.
આદિવાસીઓ પર લાગુ થશે હિંદુ મેરેજ એક્ટ?
AIMIM સાંસદે સવાલ ઉઠાવ્યો કે શું હિંદુ મેરેજ એક્ટ આદિવાસીઓ પર લાગુ થશે? ઓવૈસીએ કહ્યું, “જો હિંદુ ધર્મમાં કોઈ વ્યક્તિએ તેની પત્નીને તલાક (છૂટાછેડા) આપવા હોય, તો તેણે પહેલા સાબિત કરવું પડે છે કે ક્રૂરતા થઈ છે. 5-10 વર્ષ સુધી સતત કેસ ચાલે છે.”
ઓવૈસીએ વધુમાં ઉમેર્યું કે, ભારતના એક રાજ્યમાં મુખ્યમંત્રી છે, જેમનો તેમની પત્ની સાથે છેલ્લા 10 વર્ષથી છૂટાછેડાનો કેસ ચાલી રહ્યો છે. પત્ની તલાક આપી રહી નથી.
ઓવૈસીએ UCC પર શું કહ્યું?
AIMIM ચીફે કહ્યું કે, તમે UCC હેઠળ હિંદુ કાયદો મુસ્લિમો પર લાગુ ન કરી શકો. મારે મારા ધર્મ મુજબ ચાલવું જોઈએ. તેમણે કહ્યું કે, જેન્ડર જસ્ટિસની વાત કરનારાઓ પહેલા મુસ્લિમ મહિલાઓને શિક્ષણ આપો, નોકરી આપો, પછી સમાનતાની વાત કરો.
ઝકિયા જાફરીનું નામ લેતા ઓવૈસીએ કહ્યું, “જેન્ડર ઇક્વાલિટીની વાત કરનારાઓ ઝકિયા જાફરીને મળતા નથી. તે બાળકોને મળતા નથી જેમને દિલ્હીમાં પોલીસે મારી નાખ્યા અને હવે UCC ની વાતો કરે છે, લવ જેહાદની વાતો કરે છે.”
ઉલ્લેખનીય છે કે, સુપ્રીમ કોર્ટે મંગળવારે કહ્યું હતું કે સમાન નાગરિક સંહિતા (UCC) લાગુ કરવાનો સમય આવી ગયો છે. અદાલતે 1937 ના શરિયત કાયદાની કેટલીક જોગવાઈઓને રદ કરવાની માંગ કરતી અરજી પર સુનાવણી કરતી વખતે આ ટિપ્પણી કરી હતી.
અરજીમાં શરિયત કાયદાની કેટલીક જોગવાઈઓ વિશે કહેવામાં આવ્યું છે કે તે મુસ્લિમ મહિલાઓ પ્રત્યે ભેદભાવપૂર્ણ છે. અદાલતે કહ્યું કે વધુ સારું રહેશે જો ધારાસભા એટલે કે સંસદ જ આ અંગે નિર્ણય લે, કારણ કે રાજ્યના નીતિ નિર્દેશક સિદ્ધાંતો (Directive Principles of State Policy) મુજબ, સમાન નાગરિક સંહિતા લાગુ કરવાનો અધિકાર ધારાસભા પાસે છે.
