Supreme Court Motor Vehicle Act: સુપ્રીમ કોર્ટે જણાવ્યું છે કે એમ્પ્લોયર (નિયોક્તા) દ્વારા પૂરી પાડવામાં આવેલી ગ્રુપ વીમા યોજનાઓ અથવા અન્ય સામાજિક સુરક્ષા લાભો હેઠળ પ્રાપ્ત થયેલી રકમને મોટર વ્હીકલ એક્ટ હેઠળ આપવામાં આવતા વળતરમાંથી ઘટાડી શકાશે નહીં. સુપ્રીમ કોર્ટના જસ્ટિસ પંકજ મિત્તલની આગેવાની હેઠળની બેન્ચે 17 માર્ચે કેરળ હાઈકોર્ટ અને કર્ણાટક હાઈકોર્ટના ચુકાદાઓ સામે દાખલ કરવામાં આવેલી અપીલોને ફગાવી દીધી હતી.
આ ઉચ્ચ ન્યાયાલયોએ એવું માન્યું હતું કે પીડિતના મૃત્યુ પછી દાવેદારોને મળેલા ગ્રુપ ઇન્સ્યોરન્સ લાભને મોટર વાહન અધિનિયમ હેઠળ આપવામાં આવેલા વળતરમાંથી ઘટાડી શકાય નહીં. હાઈકોર્ટના આ નિર્ણયને સુપ્રીમ કોર્ટે યથાવત રાખતા વ્યવસ્થા આપી છે કે મોટર વ્હીકલ એક્ટ હેઠળ મળતા વળતરમાંથી એમ્પ્લોયર દ્વારા આપવામાં આવેલા ગ્રુપ ઇન્સ્યોરન્સ અને અન્ય લાભો કાપી શકાશે નહીં.
SCનો નિર્ણય
હાઈકોર્ટના ચુકાદાની પુષ્ટિ કરતા સુપ્રીમ કોર્ટે કહ્યું કે, સામાજિક સુરક્ષા યોજનાઓમાંથી મળતા લાભો ‘આર્થિક લાભ’ની શ્રેણીમાં આવતા નથી, તેથી તેને વળતરમાંથી ઘટાડી શકાય નહીં. અપીલકર્તાઓની એ દલીલને ફગાવી દેતા કે આનાથી દાવેદારોને ‘બેવડો લાભ’ મળશે, અદાલતે સ્પષ્ટ કર્યું કે એમ્પ્લોયર દ્વારા પૂરા પાડવામાં આવેલા વીમા લાભો એક સ્વતંત્ર કરારમાંથી ઉદ્ભવે છે, અને તેમને મોટર વાહન અધિનિયમ હેઠળ મળતા વૈધાનિક વળતર સાથે કોઈ સીધો સંબંધ નથી.
દાવેદારોના હક ઘટાડી શકાય નહીં
SC એ હાઈકોર્ટના નિર્ણયોને યથાવત રાખ્યા, ગ્રુપ વીમા લાભોના ઘટાડાને ગેરકાયદેસર ગણાવ્યો, અને નિર્ધારિત વળતર 6 અઠવાડિયાની અંદર ચૂકવવાનો નિર્દેશ આપ્યો. અદાલતે સ્પષ્ટ કરી દીધું કે મોટર અકસ્માત વળતરના કેસોમાં દાવેદારોના અધિકારોને ઘટાડી શકાય નહીં.
સુપ્રીમ કોર્ટે અગાઉના ચુકાદાઓનો પણ હવાલો આપ્યો અને કહ્યું કે આ નિર્ણયોમાં એ સિદ્ધાંત સ્થાપિત કરવામાં આવ્યો હતો કે માત્ર એ જ આર્થિક લાભો વળતરમાંથી ઘટાડી શકાય છે જેનો અકસ્માત સાથે સીધો સંબંધ હોય.
