મુંબઈ, 23 જાન્યુઆરી: મનોરંજન કલાકારો કપિલ શર્મા, રાજપાલ યાદવ અને કોરિયોગ્રાફર રેમો ડિસોઝાને ધમકીભર્યા ઈમેલ મોકલવાના મામલે મુંબઈ પોલીસે કેસ નોંધ્યો છે. ગુરુવારે એક અધિકારીએ આ માહિતી આપી.
અધિકારીએ જણાવ્યું કે 14 ડિસેમ્બરે અભિનેતા રાજપાલ યાદવને “વિષ્ણુ” નામના વ્યક્તિ દ્વારા ધમકીભર્યો મેઇલ મોકલવામાં આવ્યો હતો. આ ઈમેલમાં અભિનેતા, તેમના પરિવાર અને હાસ્ય કલાકાર કપિલ શર્માને નુકસાન પહોંચાડવાની ધમકી આપવામાં આવી હતી. આ કેસમાં અંબોલી પોલીસે એફઆઈઆર નોંધી છે.
ઈમેલમાં લખ્યું હતું કે, “અમે તમારી તાજેતરની પ્રવૃત્તિઓ પર નજર રાખી છે અને એ મહત્વનું છે કે અમે તમારું ધ્યાન કોઈ સંવેદનશીલ બાબત તરફ દોરીએ. આ કોઈ પબ્લિસિટી સ્ટંટ નથી કે તમને હેરાન કરવાનો પ્રયાસ નથી.”
ઈમેલમાં એવું પણ લખવામાં આવ્યું હતું કે મોકલવામાં આવેલી ધમકીને ગંભીરતાથી અને ગુપ્તતા સાથે લેવી જોઈએ.
તેમણે કહ્યું કે એવી શક્યતા છે કે આ મેઇલ પાકિસ્તાનથી મોકલવામાં આવ્યો હોય. પોલીસે જણાવ્યું કે આ મામલાની તપાસ ચાલી રહી છે.
દરમિયાન, કોરિયોગ્રાફર રેમો ડિસોઝા અને ગાયિકા અને સ્ટેન્ડ-અપ કોમેડિયન સુગંધા મિશ્રાએ પણ ઓશિવારા પોલીસ સ્ટેશનમાં ધમકીઓ મળવાની ફરિયાદ નોંધાવી છે.
