રાષ્ટ્રીય સ્વયંસેવક સંઘ (RSS)ના વડા મોહન ભાગવતની સુરક્ષામાં વધારો કરવામાં આવ્યો છે અને હવે તેમને વડાપ્રધાન નરેન્દ્ર મોદી અને કેન્દ્રીય ગૃહ પ્રધાન અમિત શાહના સ્તરે સુરક્ષા આપવામાં આવી છે. કેન્દ્રીય ગૃહ મંત્રાલયના સૂત્રોના જણાવ્યા અનુસાર મોહન ભાગવતની સુરક્ષા Z Plus થી વધારીને એડવાન્સ સિક્યોરિટી લાયઝન (ASL) કરવામાં આવી છે, જે PM મોદી અને અમિત શાહની સુરક્ષા છે.
આખરે મોહન ભાગવતથી કોને ખતરો છે?
મોહન ભાગવતની સુરક્ષામાં વધારો કર્યા બાદ સવાલો ઉઠી રહ્યા છે કે તેમને કોને ખતરો છે કે તેમને પીએમ મોદી અને અમિત શાહના સ્તરે સુરક્ષા આપવામાં આવી છે. TOI સૂત્રોના જણાવ્યા અનુસાર, આરએસએસના વડા મોહન ભાગવતની સુરક્ષાની સમીક્ષાના આધારે સુરક્ષા વધારવાને પખવાડિયા પહેલા અંતિમ સ્વરૂપ આપવામાં આવ્યું હતું. બિન-ભાજપ પક્ષો દ્વારા શાસિત રાજ્યોની મુલાકાત દરમિયાન મોહન ભાગવતની સુરક્ષા ‘ઢીલ’ હોવાનું જાણવા મળ્યા બાદ આ નિર્ણય લેવામાં આવ્યો છે.
મોહન ભાગવત કટ્ટરપંથી ઈસ્લામિક સંગઠનોના નિશાના પર
આરએસએસના વડા મોહન ભાગવતની ઝેડ-પ્લસ સિક્યોરિટી, જેમાં સીઆઈએસએફના ડેપ્યુટેશન પર અધિકારીઓ અને સુરક્ષા કર્મચારીઓનો સમાવેશ થતો હતો, તેને હવે એડવાન્સ્ડ સિક્યુરિટી લાયઝન (એએસએલ)માં અપગ્રેડ કરવામાં આવી છે. સૂત્રોએ જણાવ્યું કે આરએસએસ અગ્રણી કટ્ટરવાદી ઈસ્લામિક સંગઠનો સહિત અનેક સંગઠનોના નિશાના પર છે.
ASL માં શું ઉપલબ્ધ છે?
મોહન ભાગવત સામે વધી રહેલા ખતરા અંગે વિવિધ એજન્સીઓ પાસેથી મળેલી માહિતીના આધારે કેન્દ્રીય ગૃહ મંત્રાલયે તેમને ‘એએસએલ પ્રોટેક્ટેડ પર્સન’ની શ્રેણીમાં મૂક્યા છે. તમામ રાજ્યો અને કેન્દ્રશાસિત પ્રદેશોને અપગ્રેડ વિશે સત્તાવાર રીતે જાણ કરવામાં આવી છે. ASL હેઠળ, આ સ્તરની સુરક્ષા પ્રાપ્ત કરનાર વ્યક્તિની સુરક્ષા સાથે સંબંધિત જિલ્લા વહીવટીતંત્ર, પોલીસ, આરોગ્ય અને અન્ય વિભાગો જેવી સ્થાનિક એજન્સીઓની ભાગીદારી ફરજિયાત છે. સૂત્રોએ જણાવ્યું કે આમાં બહુસ્તરીય સુરક્ષા કોર્ડન સાથે તોડફોડ વિરોધી તપાસનો સમાવેશ થાય છે. હેલિકોપ્ટર મુસાફરીની પરવાનગી ફક્ત ખાસ ડિઝાઇન કરાયેલા હેલિકોપ્ટરમાં જ આપવામાં આવશે અને તે નિર્ધારિત પ્રોટોકોલ મુજબ કાર્ય કરશે.
