Visa Relaxation: ઈરાન, ઈઝરાયેલ અને અમેરિકા વચ્ચે ચાલી રહેલા યુદ્ધ વચ્ચે ભારત સરકારે મોટી રાહતની જાહેરાત કરી છે. જે અંતર્ગત શુક્રવારે પ્રભાવિત વિદેશી નાગરિકો માટે તમામ પ્રકારના વિઝાની માન્યતા (વૈધતા) 30 દિવસ માટે વધારવાની જાહેરાત કરવામાં આવી છે. હવે નિર્ધારિત સમય મર્યાદા કરતા વધુ રોકાણ કરવા બદલ કોઈ દંડ લાગશે નહીં.
દુબઈ સ્થિત ભારતીય દૂતાવાસે કરી જાહેરાત
દુબઈ સ્થિત ભારતીય વાણિજ્ય દૂતાવાસે શુક્રવારે સાંજે X પર એક પોસ્ટ દ્વારા આ જાહેરાત કરી હતી. નિયમોમાં આપવામાં આવેલી આ છૂટ તમામ પ્રકારના વિઝા – નિયમિત વિઝા અને ઈ-વિઝા – પર લાગુ છે. આ જાહેરાત ઈરાનમાં અમેરિકા-ઈઝરાયેલના હુમલા બાદ મધ્ય પૂર્વમાં ઉભી થયેલી કટોકટી વચ્ચે આવી છે, જેના કારણે આ પ્રદેશમાં મોટા સંઘર્ષની શરૂઆત થઈ છે, જેમાં તેહરાને આ વિસ્તારમાં અમેરિકી ઠેકાણાઓ, તેલ સુવિધાઓ અને એરપોર્ટને નિશાન બનાવ્યા હતા.
વિદેશી નાગરિકોના વિઝાને લઈને મુખ્ય જાહેરાતો:
વિઝા લંબાવવા અને દંડની માફી ખાડી દેશો સહિતના વિદેશી નાગરિકો પર લાગુ થશે.
દુબઈ સ્થિત ભારતીય વાણિજ્ય દૂતાવાસે જણાવ્યું છે કે તમામ પ્રકારના વિઝા અને ઈ-વિઝા જેની માન્યતા સમાપ્ત થઈ રહી છે અથવા ટૂંક સમયમાં સમાપ્ત થવાની છે, તેને અસરગ્રસ્ત નાગરિકો માટે એક મહિના માટે વધારી દેવામાં આવશે.
આ વિસ્તરણ ફોરેન રિજનલ રજિસ્ટ્રેશન ઓફિસ (FRRO) દ્વારા કેસ-ટુ-કેસ ધોરણે આપવામાં આવશે.
પ્રભાવિત વિદેશી નાગરિકો દ્વારા 28 ફેબ્રુઆરી, 2026 પછી નિર્ધારિત મર્યાદા કરતા વધુ સમય રોકાવા બદલ લાગતા દંડને પણ માફ કરી દેવામાં આવ્યો છે.
એક્ઝિટ પરમિટ અને કામચલાઉ લેન્ડિંગ પરમિટમાં છૂટ
ભારતીય સત્તાવાળાઓએ ફસાયેલા વિદેશી નાગરિકોને એક્ઝિટ પરમિટ અને ટેમ્પરરી લેન્ડિંગ પરમિટમાં નિઃશુલ્ક છૂટ આપવાની જાહેરાત કરી છે:
વાણિજ્ય દૂતાવાસે વધુમાં જાહેરાત કરી હતી કે પ્રભાવિત વિદેશીઓને એક્ઝિટ પરમિટ મફતમાં આપવામાં આવશે.
વિદેશીઓ દ્વારા એક્ઝિટ પરમિટ માટે અરજી ન કરવી અને વિઝા લંબાવવાને ઈમિગ્રેશન કાયદાનું ઉલ્લંઘન માનવામાં આવશે નહીં.
ભારતે ફ્લાઈટ્સના રૂટ ડાયવર્ટ થવાને કારણે ભારત આવતા વિદેશી નાગરિકોને ટેમ્પરરી લેન્ડિંગ પરમિટ (TLP) આપવાની પણ જાહેરાત કરી છે.
