KVP Scheme: જો તમારી પાસે એકસાથે પૈસા છે અને તમે તેને એક સુરક્ષિત સ્કીમમાં રોકાણ કરવા માંગો છો તો તમે પોસ્ટ ઑફિસની કિસાન વિકાસ પત્ર (KVP) યોજનામાં રોકાણ કરી શકો છો. KVP સ્કીમ એક સરકારી યોજના છે, જ્યાં તમે તમારા પૈસાને કોઈ જોખમ વિના સુરક્ષિત રોકાણ કરી શકો છો. ખાસ વાત એ છે કે અહીં તમે રોકાણ કરીને તમારા પૈસાને બમણા એટલે કે ડબલ પણ કરી શકો છો. આવો જાણીએ પોસ્ટ ઑફિસની કિસાન વિકાસ પત્ર (KVP) યોજનાની તમામ વિગતો વિશે.
કિસાન વિકાસ પત્ર યોજના શું છે?
કિસાન વિકાસ પત્ર કેન્દ્ર સરકારની એક નાની બચત યોજના છે, જેને પોસ્ટ ઑફિસ દ્વારા ચલાવવામાં આવે છે. આ સ્કીમમાં માત્ર ખેડૂતો જ નહીં પરંતુ કોઈપણ વ્યક્તિ રોકાણ કરી શકે છે. આ યોજનામાં લોકોને એક વખત રોકાણ કરવાનું હોય છે. રોકાણ કરવામાં આવેલી રકમ એક નિર્ધારિત સમયગાળામાં બમણી થઈ જાય છે.
કિસાન વિકાસ પત્ર યોજનાનો વ્યાજ દર
કિસાન વિકાસ પત્ર યોજનામાં રોકાણકારોને 7.5 ટકાના વ્યાજ દરે રિટર્ન મળે છે. જો કોઈ વ્યક્તિ આ યોજનામાં 115 મહિનાના સમયગાળા એટલે કે 9 વર્ષ 7 મહિના માટે રોકાણ કરે છે તો તેની રકમ બમણી થઈ જાય છે એટલે કે પૈસા ડબલ કરવા માટે રોકાણકારોએ લાંબા સમય માટે રોકાણ કરવું પડશે.
કિસાન વિકાસ પત્રમાં ઓછામાં ઓછા 1000 રૂપિયાથી રોકાણ શરૂ કરી શકાય છે. જ્યારે તેમાં રોકાણની મહત્તમ મર્યાદા નક્કી કરવામાં આવી નથી. રોકાણકારોએ આ યોજનામાં ઓછામાં ઓછા અઢી વર્ષ સુધી રોકાણ ચાલુ રાખવું પડે છે. તે પહેલાં પૈસા ઉપાડી શકાતા નથી. અઢી વર્ષ બાદ રોકાણકાર ઇચ્છે તો પોતાના પૈસા લઈ શકે છે. આ દરમિયાન 7.5 ટકાના દરે રિટર્ન મળે છે.
કિસાન વિકાસ પત્ર સ્કીમ એવા લોકો માટે વધુ સારી છે જેઓ લાંબા સમય માટે સુરક્ષિત રોકાણ કરવા માંગે છે. આ ઉપરાંત જે લોકો લોન માર્કેટના જોખમથી બચવા માંગે છે, તેઓ પણ આ સ્કીમમાં લાંબા સમય માટે રોકાણ કરી શકે છે અને સારું રિટર્ન મેળવી શકે છે.
