Abhishek Porel: આઈપીએલમાં દિલ્હી કેપિટલ્સ તરફથી રમતા અભિષેક પોરેલની મુશ્કેલીઓ વધતી જોવા મળી રહી છે. મેડિકલનો અભ્યાસ કરતી વિદ્યાર્થીની સાથે દુષ્કર્મના આરોપમાં કોલકાતા હાઈ કોર્ટે અભિષેક સહિત 2 લોકોની ધરપકડના આદેશ જારી કર્યા છે. હાઈ કોર્ટે હૂગલીના મગરા પોલીસ મથકને નિર્દેશ આપ્યો છે કે આરોપીઓની વહેલી તકે ધરપકડ કરવામાં આવે. ક્રિકેટર પર વિદ્યાર્થીનીનું યૌન શોષણ કરવાનો અને ખાનગી તસવીરો દ્વારા બ્લેકમેઇલ કરવાનો આરોપ છે.
મુશ્કેલીમાં ફસાયા અભિષેક પોરેલ
વિદ્યાર્થીનીનો આરોપ છે કે અભિષેક પોરેલે લગ્નનું વચન આપીને તેનું યૌન શોષણ કર્યું. ત્યારબાદ ખાનગી તસવીરો દ્વારા તેને બ્લેકમેઇલ કર્યો અને તેને ઇન્ટરનેટ પર વાયરલ કરવાની ધમકી પણ આપી. આ મામલે મગરા પોલીસ મથકે FIR નોંધવામાં આવી હતી. ત્યારબાદ હાઈ કોર્ટે સુનાવણી કરીને ધરપકડના નિર્દેશ આપ્યા છે. સાથે જ ખેલાડીના ઇલેક્ટ્રોનિક ઉપકરણો પણ જપ્ત કરવામાં આવ્યા છે, જેથી ફોટા અને વિડિયો ઇન્ટરનેટ પર ફેલાતા અટકાવી શકાય.
અન્ય મહિલાઓ સાથે પણ છેતરપિંડીનો આરોપ
પીડિત વિદ્યાર્થીનીના વકીલોએ અદાલતમાં દાવો કર્યો છે કે અન્ય મહિલાઓ સાથે પણ આવી જ પ્રકારની હરકતો કરવામાં આવી હતી. વકીલોએ જણાવ્યું કે અભિષેક પોરેલના મોબાઇલમાં અનેક મહિલાઓની ખાનગી તસવીરો છે, જે તેમણે પ્રેમજાળમાં ફસાવીને મેળવી હતી. આ સંબંધમાં અદાલતમાં પુરાવા પણ રજૂ કરવામાં આવ્યા છે. આ બધાની વચ્ચે અભિષેક પોરેલ તરફથી તમામ આરોપોને નકારી કાઢવામાં આવ્યા છે. માહિતી અનુસાર ક્રિકેટર છેલ્લા 3 વર્ષથી વિદ્યાર્થીની સાથે સંબંધમાં હતા.
કોણ છે અભિષેક પોરેલ?
ઘરેલુ ક્રિકેટમાં બંગાળ તરફથી રમતા અભિષેક પોરેલ આઈપીએલમાં દિલ્હી કેપિટલ્સનું પ્રતિનિધિત્વ કરે છે. વિકેટકીપર-બેટર તરીકે તેમણે પોતાની ઓળખ બનાવી છે. વર્ષ 2023થી તેઓ DC સાથે જોડાયેલા છે. અત્યાર સુધી 35 મેચોની 33 ઇનિંગ્સમાં તેમણે 25ની સરેરાશ અને 145ના સ્ટ્રાઈક રેટ સાથે 769 રન બનાવ્યા છે. બંગાળ માટે લિસ્ટ-A ક્રિકેટમાં તેમના નામે 21 ઇનિંગ્સમાં 833 રન નોંધાયેલા છે, જ્યારે ફર્સ્ટ ક્લાસ ક્રિકેટમાં 32 મેચોમાં તેમણે 1408 રન પોતાના ખાતામાં ઉમેર્યા છે.
