Elena Rybakina: US Openના મહિલા સિંગલ્સની ક્વાર્ટર ફાઇનલમાં એલેના રિબાકિનાએ શાનદાર જીત નોંધાવી. પ્રથમ રાઉન્ડમાં હાર બાદ જોરદાર વાપસી કરતા કઝાકિસ્તાનની રિબાકિનાએ ચીનની ઝેંગ કિનવેનને 3-6, 6-1, 6-4થી હરાવી. આ જીત સાથે જ તે સેમિફાઇનલમાં પહોંચી ગઈ છે, જ્યાં તેનો મુકાબલો અમેરિકાની કોખો ગૉફ સામે થશે. આ સાથે એલેના રિબાકિના મહિલા સિંગલ્સ રેન્કિંગમાં પણ નંબર-1 બની ગઈ છે.
કઝાકિસ્તાનની પ્રથમ નંબર-1 ખેલાડી
સેમિફાઇનલમાં પહોંચતાની સાથે જ 27 વર્ષની એલેના રિબાકિનાનું નંબર-1 બનવું નક્કી થઈ ગયું હતું. રિબાકિના પુરુષ અને મહિલા ટેનિસ, બંનેમાં કઝાકિસ્તાનની પ્રથમ વર્લ્ડ નંબર-1 ખેલાડી બની ગઈ છે. એલેના રિબાકિના પહેલાં બેલારુસની આર્યના સબાલેન્કા મહિલા સિંગલ્સમાં નંબર-1 ખેલાડી હતી. જ્યારે રિબાકિનાની મેચ ચાલી રહી હતી ત્યારે સબાલેન્કા નજીકના કોર્ટ પર જ પ્રેક્ટિસ કરી રહી હતી. રિબાકિનાની જીત બાદ દર્શકોનો શોર થયો ત્યારે સબાલેન્કા નજીક લગાવવામાં આવેલા TV પર જઈને જોવા લાગી. તે નાખુશ અને ગુસ્સામાં જોવા મળી રહી હતી.
એલેના રિબાકિના મહિલા સિંગલ્સના ઇતિહાસમાં નંબર-1 રેન્કિંગ હાંસલ કરનારી 30મી ખેલાડી પણ છે. જો રિબાકિના US Openની સેમિફાઇનલમાં હારીને બહાર થઈ જાય તો પણ ટુર્નામેન્ટ પૂર્ણ થયા બાદ તે ટોચ પર રહેશે. રિબાકિના બે વખતની ગ્રાન્ડ સ્લેમ ચેમ્પિયન છે, પરંતુ તેની સ્ટારડમ સબાલેન્કા જેવી નથી. સબાલેન્કાના ઇન્સ્ટાગ્રામ પર લગભગ 6 મિલિયન ફોલોઅર્સ છે, જ્યારે રિબાકિના એક મિલિયન સુધી પણ પહોંચી શકી નથી.
View this post on Instagram
સબાલેન્કાના 99 અઠવાડિયાના રાજનો અંત
આર્યના સબાલેન્કા 99 અઠવાડિયાથી નંબર-1 પર ચાલી રહી હતી, પરંતુ તેનું રાજ હવે સમાપ્ત થઈ ગયું છે. સબાલેન્કાએ પણ US Openની સેમિફાઇનલમાં સ્થાન બનાવી લીધું છે. આર્યના સબાલેન્કાએ કુલ 107 અઠવાડિયા નંબર-1 રેન્કિંગ પર વિતાવ્યા છે. સતત 99 અઠવાડિયા ટોચ પર રહેવાનો તેનો રેકોર્ડ ઇતિહાસમાં છઠ્ઠો સૌથી લાંબો છે. સબાલેન્કાએ 21 ઓક્ટોબર 2024ના રોજ નંબર-1 રેન્કિંગ હાંસલ કરી હતી.
