KL Rahul Test Record: KL Rahul એ રચ્યો ખાસ રેકોર્ડ, રાહુલ દ્રવિડ અને ગૌતમ ગંભીરની યાદીમાં સ્થાન મેળવનાર ત્રીજો ભારતીય બન્યો

Arati Parmar
3 Min Read
KL Rahul Test Record

KL Rahul Test Record: ભારતીય ક્રિકેટ ટીમના સ્ટાર બેટ્સમેન કેએલ રાહુલે ન્યૂઝીલેન્ડ સામે વેલિંગ્ટન ટેસ્ટમાં સદી ફટકારીને અનેક રેકોર્ડ પોતાના નામે કર્યા છે. તેની 136 રનની ઇનિંગ્સ દરમિયાન એક એવો રસપ્રદ સંયોગ પણ બન્યો, જેણે ક્રિકેટ ચાહકોનું ધ્યાન ખેંચ્યું છે. રાહુલ ન્યૂઝીલેન્ડમાં એક જ ટેસ્ટ ઇનિંગ્સમાં બે અલગ-અલગ સદીની ભાગીદારીનો હિસ્સો બનનારા ભારતીય બેટ્સમેનોની ખાસ યાદીમાં સામેલ થઈ ગયો છે. તેના પહેલાં રાહુલ દ્રવિડ અને ગૌતમ ગંભીર પણ આ સિદ્ધિ મેળવી ચૂક્યા છે.

રાહુલે આ મેચમાં શરૂઆતમાં યશસ્વી જયસ્વાલ સાથે પ્રથમ વિકેટ માટે 130 રન જોડ્યા હતા. જયસ્વાલે 89 બોલમાં 85 રનની આક્રમક ઇનિંગ્સ રમી હતી. ત્યારબાદ રાહુલે દેવદત્ત પડિક્કલ સાથે બીજી વિકેટ માટે 165 રનની શાનદાર ભાગીદારી કરી હતી. પડિક્કલે 80 રન બનાવ્યા હતા, જ્યારે રાહુલે 290 બોલમાં 136 રનની ધીરજભરી ઇનિંગ્સ રમી હતી. આ રીતે રાહુલ એક જ ઇનિંગ્સમાં બે સદીની ભાગીદારીનો હિસ્સો બન્યો હતો. કેપ્ટન ગિલ સાથે પણ તેણે 91 રનની ભાગીદારી કરી હતી.

- Advertisement -

ખાસ યાદીમાં સામેલ થયો રાહુલ

ન્યૂઝીલેન્ડની ધરતી પર ભારતીય બેટ્સમેનો વચ્ચે આવો સંયોગ અગાઉ બે વખત બની ચૂક્યો છે. રાહુલ દ્રવિડે 1998-99માં હેમિલ્ટનમાં અને ગૌતમ ગંભીરએ 2009માં વેલિંગ્ટનમાં આ સિદ્ધિ મેળવી હતી. હવે 2026માં કેએલ રાહુલે પણ આ ખાસ યાદીમાં પોતાનું નામ નોંધાવ્યું છે.

દ્રવિડ ભારતીય ટીમના ભૂતપૂર્વ કોચ છે અને ગંભીર વર્તમાન કોચ છે. આવી સ્થિતિમાં આ સંયોગના આધારે કહી શકાય કે ભવિષ્યમાં કેએલ રાહુલ પણ ટીમ ઇન્ડિયાનો કોચ બની શકે છે. જોકે, અત્યારે તેમાં ઘણો સમય બાકી છે. પરંતુ રાહુલ જે રીતે ટેકનિકની દૃષ્ટિએ સક્ષમ છે, તે દ્રવિડની જેમ શાનદાર કોચ પણ બની શકે છે.

- Advertisement -

દ્રવિડે સચિન અને શ્રીનાથ સાથે કરી હતી સદીની ભાગીદારી

રાહુલ દ્રવિડે 1998-99માં ન્યૂઝીલેન્ડ સામે હેમિલ્ટન ટેસ્ટની પ્રથમ ઇનિંગ્સમાં બે સદીની ભાગીદારી કરી હતી. દ્રવિડે પહેલાં સચિન તેંડુલકર સાથે 109 રન જોડ્યા હતા. ત્યારબાદ નીચલા ક્રમે બેટિંગ કરવા ઉતરીને તેમણે જવાગલ શ્રીનાથ સાથે આઠમી વિકેટ માટે 144 રનની શાનદાર ભાગીદારી કરી હતી.

- Advertisement -

દ્રવિડે આ ઇનિંગ્સમાં 190 રન બનાવ્યા હતા, જ્યારે શ્રીનાથે 76 રનનું યોગદાન આપ્યું હતું. જોકે, આ મેચ ડ્રો રહી હતી.

ગંભીરએ પણ વેલિંગ્ટનમાં આવો સંયોગ બનાવ્યો હતો

ગૌતમ ગંભીરએ 2009માં ન્યૂઝીલેન્ડ સામે વેલિંગ્ટન ટેસ્ટની બીજી ઇનિંગ્સમાં 167 રનની શાનદાર ઇનિંગ્સ રમી હતી. આ દરમિયાન તેણે પહેલાં રાહુલ દ્રવિડ સાથે બીજી વિકેટ માટે 170 રન જોડ્યા હતા.

દ્રવિડ આઉટ થયા પછી ગંભીરએ સચિન તેંડુલકર સાથે ઇનિંગ્સ આગળ વધારી હતી. સચિન આઉટ થયા બાદ વીવીએસ લક્ષ્મણ ક્રીઝ પર આવ્યા હતા અને બંને વચ્ચે ચોથી વિકેટ માટે 106 રનની સદીની ભાગીદારી થઈ હતી.

ભારતે પોતાની બીજી ઇનિંગ્સ 434/7ના સ્કોર પર જાહેર કરી હતી. આ મેચ ડ્રો રહી હતી, પરંતુ ભારતે શ્રેણી 1-0થી પોતાના નામે કરી હતી.

Share This Article