Pr Sreejesh Slams Indian Hockey Management: મહિલા ટીમ બાદ પુરુષ ભારતીય હોકી ટીમ પણ વિશ્વ કપની સેમીફાઈનલમાં સ્થાન બનાવી શકી નહીં. ટીમના પૂર્વ ગોલકીપર અને બે વખતના ઓલિમ્પિક બ્રોન્ઝ મેડલિસ્ટ પી.આર. શ્રીજેશે ભારતીય હોકી મેનેજમેન્ટ પર તીખો પ્રહાર કર્યો છે અને ટીમ મેનેજમેન્ટ તથા અધિકારીઓની જવાબદારી પર સવાલ ઉઠાવ્યા છે. ભારતીય પુરુષ ટીમનું અભિયાન સોમવારે આર્જેન્ટિના સામે 3-5ની હાર સાથે સમાપ્ત થઈ ગયું. નેધરલેન્ડ્સના એમ્સ્ટેલવીન સ્થિત વેગનર હોકી સ્ટેડિયમમાં રમાયેલી આ મેચમાં ભારતને સેમીફાઈનલની આશા જાળવી રાખવા માટે જીત જરૂરી હતી, પરંતુ ટીમ આવું કરી શકી નહીં. હવે ભારત સાતમા સ્થાનની મેચમાં બેલ્જિયમ સામે ટકરાશે.
શ્રીજેશે એક્સ પર લખી વાત
ભારતની સૌથી મોટી નબળાઈ પેનલ્ટી કોર્નર રહ્યા. ટીમને મળેલા સાતેય પેનલ્ટી કોર્નર નિષ્ફળ ગયા. સમગ્ર મેચમાં બોલ પર નિયંત્રણ રાખવા છતાં ભારતીય ખેલાડીઓ ગોલની તકોને ગોલમાં બદલી શક્યા નહીં. પેરિસ ઓલિમ્પિક બાદ નિવૃત્તિ લેનારા શ્રીજેશે સોશિયલ મીડિયા પ્લેટફોર્મ એક્સ પર લાંબી પોસ્ટ લખીને ભારતીય હોકીની કાર્યશૈલી પર સવાલ ઉઠાવ્યા. તેમણે કટાક્ષ કરતાં લખ્યું, ‘ચિંતા ન કરો, વર્લ્ડ કપથી કોઈ ફરક પડતો નથી. એશિયન ગેમ્સ આવી રહી છે. ત્યાં મેડલ જીતી લો અને પછી આપણે ઓલિમ્પિકના સપના જોઈ શકીએ છીએ. દેખીતી રીતે વર્લ્ડ કપમાં જે કંઈ પણ ખોટું થયું, તેની ભરપાઈ માટે આટલું પૂરતું છે.’
Don’t worry… the World Cup doesn’t matter. 🤡
The Asian Games are coming. Win a medal 🥇 there, and then we can start dreaming about LA 2028. Apparently, that’s enough to cover everything that went wrong at the World Cup.
Women’s chief coach on holiday just before the World…
— sreejesh p r (@16Sreejesh) August 24, 2026
કોચ ટૂર્નામેન્ટ પહેલાં રજા માણી રહ્યા હતા
શ્રીજેશે મહિલા ટીમના મામલાનો પણ ઉલ્લેખ કર્યો. તેમણે સવાલ ઉઠાવ્યો કે વર્લ્ડ કપ પહેલાં તૈયારીના અંતિમ તબક્કામાં મહિલા ટીમના મુખ્ય કોચ રજા પર કેવી રીતે જઈ શકે. તેમણે ખેલાડીઓની પ્રશંસા કરતાં કહ્યું કે ટીમે અપેક્ષા કરતાં સારું પ્રદર્શન કર્યું, પરંતુ જવાબદારી નક્કી થવી જોઈએ. પૂર્વ ભારતીય ગોલકીપરે કહ્યું કે જ્યારે ટીમ કોઈ મોટી ટીમ સામે હારે છે ત્યારે તેને ‘શીખવાનો અનુભવ’ કહેવામાં આવે છે, જ્યારે એશિયન ટીમો સામેની જીતને મોટી સફળતા તરીકે રજૂ કરવામાં આવે છે.
તેમણે પૂછ્યું, ‘શું આપણે એવી ટીમ બનાવી રહ્યા છીએ જે માત્ર સારી હોકી રમે કે એવી ટીમ જે દુનિયાની શ્રેષ્ઠ ટીમોને હરાવવામાં સક્ષમ હોય?’
શ્રીજેશે લખ્યું- શીખવા, સારી હોકી અને ભવિષ્યની ટૂર્નામેન્ટ્સની આડમાં છુપાવવાનું બંધ કરો. વર્લ્ડ કપ કોઈ રિહર્સલ નથી. આ વર્લ્ડ કપ છે. તો મુશ્કેલ સવાલ કોણ પૂછશે? જવાબદારીની માંગ કોણ કરશે? અને સૌથી મહત્વની વાત, શું ખરેખર કોઈને તેની પરવા છે?
