Sharmila Dhankhar: ગરીબીથી ગોલ્ડ સુધીનો સફર, શર્મિલા ધનખડની સંઘર્ષભરી સફળતાની પ્રેરણાદાયી કહાની
Sharmila Dhankhar: હરિયાણાની પેરા એથ્લીટ શર્મિલા ધનખડે કોમનવેલ્થ ગેમ્સ 2026માં એવો ઇતિહાસ રચ્યો છે, જેની ભારતને છેલ્લા 20 વર્ષથી રાહ હતી. 20 વર્ષના તપ બાદ ભારતને મહિલા શોટ પુટ F57માં શર્મિલા ધનખડે 9.81 મીટરનો સિઝનનો બેસ્ટ થ્રો કરીને ગોલ્ડ મેડલ અપાવ્યો છે. આ સાથે તેઓ કોમનવેલ્થ ગેમ્સમાં પેરા એથ્લેટિક્સમાં ભારત માટે ગોલ્ડ જીતનારી પ્રથમ ખેલાડી બની છે.
પરંતુ શર્મિલાની કહાની માત્ર એક ગોલ્ડ મેડલની નથી. આ તો તે ભાગ છે, જે પર્વતની ટોચ પર પહોંચ્યા પછી વાદળોમાંથી દેખાય છે, પરંતુ તેની પાછળ હજારો માઇલનો સંઘર્ષ છુપાયેલો છે. ગરીબી, પોલિયો, ઘરેલુ હિંસા અને આર્થિક તંગી જેવી અનેક મુશ્કેલીઓનો સામનો કરીને તેમણે આજે આ મુકામ હાંસલ કર્યો છે. રમતગમતે તેમનું જીવન બદલી નાખ્યું છે અને આજે તેઓ લાખો લોકો માટે પ્રેરણા બની ચૂક્યા છે. આવો જાણીએ ગોલ્ડ પાછળની શર્મિલા ધનખડ વિશે.
કોણ છે શર્મિલા ધનખડ?
- શર્મિલા ધનખડ હરિયાણાના મહેન્દ્રગઢ જિલ્લાના રહેવાસી છે.
- તેમને બે વર્ષની ઉંમરે પોલિયો થયો હતો, જેના કારણે તેમના એક પગ પર અસર પડી હતી.
- તેઓ મહિલા શોટ પુટ અને ડિસ્કસ થ્રોની પેરા ખેલાડી છે.
- F57 વર્ગ એવા ખેલાડીઓ માટે હોય છે, જેમના શરીરના નીચેના અંગોમાં નબળાઈ, અપૂર્ણતા અથવા ચાલવા-ફરવામાં મુશ્કેલી હોય છે.
34 વર્ષની ઉંમરે રમતની શરૂઆત કરી
- શર્મિલાએ 34 વર્ષની ઉંમરે રમતની શરૂઆત કરી.
- 2021માં તેમણે પેરા નેશનલ ચેમ્પિયનશિપમાં રાષ્ટ્રીય રેકોર્ડ સાથે ગોલ્ડ જીત્યો હતો.
- 2022 બર્મિંગહામ કોમનવેલ્થ ગેમ્સ અને 2023 એશિયન પેરા ગેમ્સમાં તેઓ ચોથા સ્થાને રહ્યા હતા.
- આ જ વર્ષે દુબઈમાં યોજાયેલી ફઝ્ઝા ઇન્ટરનેશનલ પેરા એથ્લેટિક્સ ચેમ્પિયનશિપમાં તેમણે શોટ પુટમાં ગોલ્ડ અને ડિસ્કસમાં બ્રોન્ઝ મેડલ જીત્યો હતો.
ગરીબી અને ઘરેલુ હિંસાથી ભરેલું રહ્યું જીવન
- શર્મિલાનું બાળપણ અત્યંત ગરીબીમાં પસાર થયું.
- તેમની માતા દ્રષ્ટિહીન હતાં અને પિતા ખેડૂત હતાં.
- 19 વર્ષની ઉંમરે તેમના લગ્ન થયા, પરંતુ પ્રથમ લગ્નજીવનમાં તેમને ઘણા વર્ષો સુધી ઘરેલુ હિંસા સહન કરવી પડી.
- અંતે તેઓ પોતાની બે દીકરીઓ સાથે પિયરમાં પરત ફરી અને નવી જિંદગીની શરૂઆત કરી.
પતિએ આપ્યો સાથ, ઘર વેચીને પૂરું કર્યું સપનું
- બીજા લગ્ન બાદ તેમના પતિ અજીત સિંહે તેમને પેરા રમતગમતમાં આવવા માટે પ્રેરિત કર્યા.
- કોચ ટેક ચંદ અને દેવેન્દ્રના માર્ગદર્શન હેઠળ તેમણે તાલીમ લીધી.
- આર્થિક તંગીને કારણે 2023માં પરિવારે રેવાડીમાં આવેલું પોતાનું ઘર વેચીને ભાડાના મકાનમાં રહેવું પડ્યું, જેથી તેમની રમત ચાલુ રહી શકે.
- હવે તેમનું સપનું ફરીથી પોતાનું ઘર ખરીદવાનું છે.
દીકરીઓ માટે જુએ છે મોટું સપનું
- શર્મિલાની બે દીકરીઓ પણ રમતગમત સાથે જોડાયેલી છે.
- મોટી દીકરી અંજુ અન્ડર-16 જેવલિન થ્રોની ખેલાડી છે, જ્યારે નાની દીકરી લક્ષ્મી અન્ડર-14 હાઈ જમ્પમાં ભાગ લે છે.
- શર્મિલા ઇચ્છે છે કે તેમની દીકરીઓ એવું જીવન જીવે, જે તેમને ક્યારેય મળી શક્યું નહીં. તેમનું માનવું છે કે રમતગમત બાળકોનું ભવિષ્ય બદલી શકે છે.
