Cortical Labs Doom 2026: 2022 માં ઓસ્ટ્રેલિયાની બાયોટેક કંપની Cortical Labs એ પેટ્રી ડિશમાં રાખેલા 8 લાખ મગજના કોષોને કોમ્પ્યુટર સાથે જોડીને 1970 ના દાયકાની પ્રખ્યાત ગેમ ‘Pong’ રમતા શીખવ્યું હતું. હવે વર્ષો પછી, તેમણે પોતાની ટેકનોલોજીને વધુ આગળ વધારી છે. તેમનું કહેવું છે કે તેમની નવી CL1 સિસ્ટમ વિશ્વનું પ્રથમ એવું બાયોલોજિકલ કોમ્પ્યુટર (Biological Computer) છે, જેમાં તમે સીધો કોડ ચલાવી શકો છો અને તે હવે ‘Doom’ ગેમ પણ રમી શકે છે.
Pong સરળ હતી, Doom ઘણી મુશ્કેલ
ટીમે સમજાવ્યું કે Pong એકદમ સરળ ગેમ હતી. તેમાં બોલ ઉપર જાય તો પેડલ ઉપર જાય – આ એક સીધો ઇનપુટ-આઉટપુટ સંબંધ હતો. પરંતુ Doom બિલકુલ અલગ છે:
તે ફર્સ્ટ-પર્સન શૂટિંગ ગેમ છે, જેમાં ખેલાડીએ દુશ્મનોને મારતા-મારતા અલગ-અલગ જગ્યાએ ફરવું પડે છે.
Doom ની દુનિયા ન્યુરોન્સ (Neurons) ને સમજાવવી એ એક મોટો પડકાર હતો કારણ કે તે સંપૂર્ણપણે અવ્યવસ્થિત અને 3D છે.
સૌથી મોટી મુશ્કેલી ડિજિટલ ગેમની દુનિયાને વીજળીના સંકેતોમાં (Electrical Signals) બદલવાની હતી, જેથી જીવંત કોષો તેને સમજી શકે.
Doom ગેમને જ કેમ પસંદ કરવામાં આવી?
Doom માત્ર તેની મુશ્કેલીને કારણે જ નહીં, પરંતુ તેની લોકપ્રિયતાને કારણે પણ પસંદ કરવામાં આવી છે. ઈન્ટરનેટ પર આ ગેમ પર અનેક પ્રયોગો થઈ ચૂક્યા છે. વૈજ્ઞાનિકોએ અગાઉ E. Coli બેક્ટેરિયા પાસે Doom રમાડ્યું છે, ઉંદરોને તેમાં ગન ચલાવતા શીખવ્યું છે અને ચોકલેટ બારમાં પણ આ ગેમ ચલાવવાની સિસ્ટમ બનાવી છે.
CL1 મશીનને કોઈ પણ Python થી ચલાવી શકે છે
Cortical Labs એ CL1 મશીન એવી રીતે બનાવ્યું છે કે કોઈ પણ વ્યક્તિ API અને સરળ Python કમાન્ડ દ્વારા તેમાં રહેલા જીવંત કોષો સાથે સંવાદ કરી શકે છે. ડેવલપર્સે ગેમની વીડિયો સ્ક્રીનને ઈલેક્ટ્રિકલ પેટર્નમાં બદલીને આ કોષો સુધી પહોંચાડી છે, જેથી કોષો ગેમની સ્થિતિ સમજી શકે છે.
કોમ્પ્યુટર અને AI ની દુનિયા કેવી રીતે બદલાશે?
ઉર્જાનો ઓછો વપરાશ: પરંપરાગત AI ચિપ્સ ઘણી વીજળી વાપરે છે, જ્યારે જૈવિક મગજના કોષો ખૂબ જ ઓછી ઉર્જામાં નિર્ણયો લઈ શકે છે.
વધુ સારા AI મોડલ્સ: આ પ્રયોગ વૈજ્ઞાનિકોને વાસ્તવિક બુદ્ધિ (Intelligence) કેવી રીતે કામ કરે છે તે સમજવામાં મદદ કરશે, જેનાથી વધુ સ્માર્ટ અને અનુકૂલનક્ષમ (Adaptable) AI બનાવી શકાશે.
રોગોનો અભ્યાસ: આ ‘મિની બ્રેઈન’ નો ઉપયોગ અલ્ઝાઈમર અને ઓટિઝમ જેવી ન્યુરોલોજીકલ બીમારીઓના ઈલાજ શોધવા અને દવાઓના પરીક્ષણ માટે થઈ શકશે.
બાયો-કોમ્પ્યુટિંગ: ભવિષ્યમાં એવા ‘હાઈબ્રિડ કોમ્પ્યુટર’ બની શકે છે જે સિલિકોન ચિપ્સ અને જીવંત કોષોના મિશ્રણથી ચાલશે.
