Qalb Urdu AI: પાકિસ્તાન તરફથી AI ને લઈને મોટા સમાચાર આવ્યા છે. વાસ્તવમાં પાકિસ્તાને ChatGPT ના મુકાબલે ઉર્દૂ ભાષાનું AI ચેટબોટ “કલ્બ” (Qalb) લોન્ચ કર્યું છે. તેને અમેરિકામાં અભ્યાસ કરી રહેલા એક પાકિસ્તાની વિદ્યાર્થી તૈમૂર હસને બનાવ્યું છે. આ AI મોડલની ખાસ વાત એ છે કે તે વિશ્વની સૌથી મોટી ઉર્દૂ-વિશિષ્ટ AI સિસ્ટમ છે. આ ચેટબોટના લોન્ચિંગ બાદથી જ તે ટેકનોલોજી જગતમાં ચર્ચાનો વિષય બન્યું છે. ચાલો વિગતે તેની વિશેષતાઓ વિશે જાણીએ.
કેમ ચર્ચામાં છે Qalb AI?
રિપોર્ટ્સ મુજબ, Qalb AI ને ૧.૯૭ અબજ ટોકન્સના મોટા ડેટાબેઝ પર ટ્રેન કરવામાં આવ્યું છે. તેને ૭ થી વધુ આંતરરાષ્ટ્રીય સ્ટાન્ડર્ડ્સ પર પરખવામાં આવ્યું છે અને તે હાલના ઘણા ઉર્દૂ AI મોડલ્સ કરતા વધુ સારું પ્રદર્શન કરે છે. આ મોડલને બિઝનેસ, સ્ટાર્ટઅપ્સ, શિક્ષણ સાથે જોડાયેલા પ્લેટફોર્મ અને અવાજથી કંટ્રોલ થતા AI એજન્ટ્સ માટે ખાસ ડિઝાઇન કરવામાં આવ્યું છે. આ AI મોડલને અમેરિકામાં અભ્યાસ કરતા તૈમૂર હસને તેના કોલેજ રૂમમેટ જવાદ અહેમદ અને મુહમ્મદ અવૈસની મદદથી બનાવ્યું છે.
કોણ છે તૈમૂર હસન?
તૈમૂર હસન એક વિદ્યાર્થીની સાથે સાથે અનુભવી યુવા ઉદ્યોગસાહસિક પણ છે જેમણે ૧૩ સ્ટાર્ટઅપ્સ શરૂ કર્યા અને બાદમાં વેચ્યા. માઇક્રોસોફ્ટ કપના ભૂતપૂર્વ વિજેતા હસને ફાસ્ટ યુનિવર્સિટીમાંથી કોમ્પ્યુટર સાયન્સમાં સ્નાતક કર્યું અને હવે ઓબર્ન યુનિવર્સિટીમાં માસ્ટર્સ કરી રહ્યા છે. તેમના મતે AI ટેકનોલોજી હવે મોટા બજેટ કે મોટી ટીમો સુધી સીમિત નથી. “સાચી વિચારધારા સાથે, એક નાની ટીમ પણ એવા પ્રોડક્ટ્સ બનાવી શકે છે જે લાખો લોકોને શિક્ષિત કરે, કામને ઓટોમેટ કરે અને સારી સેવા આપે.”
ChatGPT ના મુકાબલે ક્યાં ઉભું છે Qalb AI?
Qalb AI ને પાકિસ્તાનમાં AI ના ઉપયોગની રીત બદલવાના હેતુથી બનાવવામાં આવ્યું છે. ટેકનિકલ વિગતો પર જઈએ તો, Qalb AI એ ઉર્દૂ બેન્ચમાર્ક પર ૯૦.૩૪ નો સ્કોર હાંસલ કર્યો છે. આમ, તે તેના અગાઉના ઉર્દૂ AI કરતા ૩.૨૪ પોઈન્ટ્સથી વધુ સારું છે. ChatGPT ની વાત કરીએ તો, તે કુલ ૮૦ ભાષાઓમાં ઉપલબ્ધ છે અને ઉર્દૂ તેમાંથી એક છે. જોકે ChatGPT ને માત્ર ઉર્દૂ ભાષા માટે ટ્રેન કરવામાં આવ્યું નથી અને તે મુખ્યત્વે પશ્ચિમી ડેટા સેટ પર પ્રશિક્ષિત છે. Qalb AI ઉર્દૂ બોલનારાઓ અને ઉર્દૂ ભાષામાં કામ કરતા દેશો માટે ઉપયોગી થઈ શકે છે પરંતુ તેને ChatGPT ના મુકાબલે મૂકી શકાય નહીં કારણ કે ChatGPT એક ગ્લોબલ પ્રોડક્ટ છે અને કોઈ એક ભાષા પર ફોકસ કરતું નથી. આવા સંજોગોમાં Qalb AI ને પાકિસ્તાન માટે વધુ સારું માની શકાય છે, જોકે વૈશ્વિક અભિગમ અને ડેટા સાથે ChatGPT રેસમાં ઘણું આગળ છે.
