9/11 WTT Attack Saudi Link: અમેરિકામાં થયેલા 9/11 આતંકવાદી હુમલાને લઈને હવે મોટો ખુલાસો થયો છે. ગુપ્ત ફાઇલો જાહેર થવાથી જાણવા મળ્યું છે કે જે શંકાસ્પદ વ્યક્તિની હાઇજેકર્સ સાથેના ગાઢ સંબંધોને કારણે FBIએ પૂછપરછ કરી હતી, તેના સાઉદી અધિકારીઓ સાથે પણ ગાઢ સંબંધો હતા. BBCએ તપાસ અહેવાલના આધારે આ ખુલાસો કર્યો છે. BBCના અહેવાલમાં અગાઉ ક્યારેય ન જોવામાં આવેલા વીડિયો ફૂટેજની તપાસના આધારે કહેવામાં આવ્યું છે કે આ શંકાસ્પદ આરોપીને 9/11 આતંકવાદી હુમલાના ઘણાં સમય બાદ અલ-કાયદાના આતંકવાદી અનવર અલ-અવલાકી સાથે પેન્ટબૉલ રમતા જોવામાં આવ્યો હતો.
BBCના જણાવ્યા અનુસાર વીડિયો ફૂટેજમાં ઉમર અલ-બાયૌમીને અલ-કાયદાના આતંકવાદી અવલાકીને ગળે લગાવતા જોઈ શકાય છે. જોકે ઉમર અલ-બાયૌમીએ વર્ષો સુધી આ વાતનો ઇનકાર કર્યો હતો કે તેના અલ-કાયદા સાથે સંબંધો છે. આ ઉપરાંત, અન્ય એક વીડિયો ક્લિપમાં બંનેને સાઉદી અરેબિયાના ઇસ્લામિક બાબતોના મંત્રાલયના એક અધિકારી સાથે સાન ડિયેગોની નજીક પેન્ટબૉલ રમતા જોઈ શકાય છે.
FBI પાસે પુરાવા હતા છતાં સાઉદીનું કૃત્ય કેમ છુપાવાયું?
અહેવાલ અનુસાર, આ વીડિયો ફૂટેજ FBIને 2001માં 9/11 આતંકવાદી હુમલાના થોડા જ દિવસો બાદ મળી ગયા હતા. આ ફૂટેજ એવા પુરાવાનો ભાગ છે જેને 9/11 પીડિતોના પરિવારોએ સાઉદી અરેબિયા વિરુદ્ધ 1 ટ્રિલિયન ડૉલરના કેસમાં રજૂ કર્યો છે. પરિવારોનો આરોપ છે કે ઉમર અલ-બાયૌમીએ હુમલા કરનારા 19 હાઇજેકર્સમાંથી બેની મદદ કરી હતી. સાઉદી અરેબિયાએ વારંવાર કોઈપણ પ્રકારની સંડોવણીનો ઇનકાર કર્યો છે.
અલ-કાયદાના ભવિષ્યના નેતા સાથે પેન્ટબૉલ
બાયૌમી 1994માં સાઉદી અરેબિયાથી સાન ડિયેગો આવ્યો હતો અને તેણે કહ્યું હતું કે તે ત્યાં અંગ્રેજી શીખવા આવ્યો છે. બાદમાં કોર્ટના રેકોર્ડમાંથી જાણવા મળ્યું હતું કે તેણે પોતાનો અભ્યાસ લગભગ છોડી દીધો હતો અને તેના બદલે ધાર્મિક કાર્યક્રમોનું આયોજન કરવામાં લાગી ગયો હતો. BBCના અહેવાલ અનુસાર, 1997 અથવા 1998ની શરૂઆતમાં શૂટ કરવામાં આવેલા ફૂટેજમાં બાયૌમી, અલ-કાયદાના ભવિષ્યના આતંકવાદી અવલાકી અને અન્ય લોકો મિલિટરી-સ્ટાઇલ પેન્ટબૉલ કોમ્બેટમાં ભાગ લેતા દેખાય છે. કેટલાક લોકોએ મિલિટરી જેવા કપડાં પહેર્યા હતા, જ્યારે કેટલાક લોકો લડાઈ માટે આગળ વધતી વખતે ‘અલ્લાહુ અકબર’ના નારા લગાવી રહ્યા હતા.
BBCએ પોતાના અહેવાલમાં જણાવ્યું છે કે 11 સપ્ટેમ્બરના હુમલા બાદ બાયૌમીની તપાસ કરી રહેલા FBI એજન્ટોને જણાવવામાં આવ્યું હતું કે કેટલાક લોકો આ સેશનનો ઉપયોગ જિહાદની તાલીમ માટે કરતા હતા. બીજી તરફ, અવલાકીના ઉગ્રવાદી કાર્યો વિશે મોટા પાયે જાણકારી સામે આવે તે પહેલાં જ તેના અલ-કાયદાના લોકો સાથે સંબંધો હતા. અન્ય એક ક્લિપમાં જાન્યુઆરી 1998માં બાયૌમીને અવલાકીને ગળે લગાવતા દર્શાવવામાં આવ્યો છે. અન્ય ફૂટેજમાં સાઉદી અધિકારીઓ અને ઇસ્લામિક બાબતોના મંત્રાલય સાથે જોડાયેલા ધાર્મિક લોકો સાથે તેની મુલાકાતો દર્શાવવામાં આવી છે.
