Air Canada LaGuardia Crash: અમેરિકામાં સોમવારે એક વિમાન એરપોર્ટ પર ઉભેલા વાહન સાથે અથડાવાને કારણે અકસ્માત સર્જાયો છે. કેનેડાના મોન્ટ્રિયલથી આવી રહેલા એર કેનેડા એક્સપ્રેસના રિજનલ જેટે ન્યૂયોર્કના લા ગાર્ડિયા એરપોર્ટ (LaGuardia Airport) પર લેન્ડિંગ દરમિયાન એક ગાડીને ટક્કર મારી દીધી. આનાથી જેટ અને વાહન બંનેને ભારે નુકસાન થયું છે. અકસ્માત બાદ એરપોર્ટ બંધ કરવાની ફરજ પડી છે. જોકે, આ દુર્ઘટનામાં કોઈને ઈજા કે મૃત્યુના સમાચાર નથી. અકસ્માત સમયની કેટલીક ઓડિયો ક્લિપ્સ સોશિયલ મીડિયા પર વાયરલ થઈ છે, જેમાં અધિકારીઓની ગભરામણ સ્પષ્ટ દેખાય છે.
ન્યૂયોર્ક ફાયર ડિપાર્ટમેન્ટ દ્વારા જારી કરવામાં આવેલા નિવેદનમાં જણાવવામાં આવ્યું છે કે લા ગાર્ડિયા એરપોર્ટના રનવે પર એક વિમાન અને ગાડી વચ્ચે ટક્કર થઈ છે. ત્યારબાદ રાહત અને બચાવ કામગીરી હાથ ધરવામાં આવી છે. ફ્લાઇટ ટ્રેકિંગ વેબસાઇટ Flightradar24 મુજબ, CRJ-900 વિમાને રવિવારે સાંજે લગભગ 24 માઈલ પ્રતિ કલાકની ઝડપે તે ગાડીને ટક્કર મારી હતી.
એરપોર્ટને કરવામાં આવ્યું બંધ
અમેરિકાના ફેડરલ એવિએશન એડમિનિસ્ટ્રેશન (FAA) એ વિમાન સાથે જોડાયેલી આ કટોકટીની સ્થિતિને કારણે લા ગાર્ડિયા આવતી તમામ ફ્લાઇટ્સ રોકવાનો આદેશ જારી કર્યો હતો. એરપોર્ટ બંધ રાખવાનો નિર્ણય સ્થાનિક સત્તાવાળાઓએ લેવો પડ્યો હતો. FAA ની નોટિસમાં જણાવાયું છે કે ઇમરજન્સીને કારણે એરપોર્ટને કામચલાઉ ધોરણે બંધ કરવામાં આવ્યું છે.
સોશિયલ મીડિયા પર આ અકસ્માતના ઘણા વીડિયો અને ઓડિયો ક્લિપ્સ સામે આવ્યા છે. આ વીડિયોમાં ટક્કર બાદ કેનેડાના વિમાનનો આગળનો ભાગ (Nose) ઉપરની તરફ ઉઠેલો જોવા મળે છે. એરપોર્ટ પરથી સામે આવેલી તસવીરો પરથી સ્પષ્ટ થાય છે કે અકસ્માતમાં વિમાનને ઘણું નુકસાન થયું છે.
ઓડિયો ક્લિપની ચર્ચા
ન્યૂયોર્કના લા ગાર્ડિયા એરપોર્ટ પર ટક્કર બાદ ATC (એર ટ્રાફિક કંટ્રોલ) નો ઓડિયો પણ સોશિયલ મીડિયા પર શેર કરવામાં આવ્યો છે. આ કથિત ઓડિયોમાં એક વ્યક્તિને એમ કહેતા સાંભળી શકાય છે કે “મારાથી ભૂલ થઈ ગઈ.” ઓડિયોની શરૂઆતમાં ATC માં હાજર કોઈ વ્યક્તિ એમ કહેતી સંભળાય છે કે આપણે થોડા સમય માટે બંધ રહેવાના છીએ.
ઓડિયોમાં એક અવાજ ATC અધિકારીને એમ કહેતો સંભળાય છે કે “આ જોવું બિલકુલ સારું નહોતું.” વળતા જવાબમાં અધિકારી કહે છે, “હા, મને ખબર છે કે આપણે પહેલા એક ઇમરજન્સીનો સામનો કરી રહ્યા હતા અને મારાથી ભૂલ થઈ ગઈ.” એક અન્ય ક્લિપ પણ સામે આવી છે, જેમાં તે સમયની ગભરામણ સ્પષ્ટ સંભળાય છે જ્યારે એક ATC અધિકારીને “પ્લીઝ રોકો” કહેતા સાંભળી શકાય છે.
