આ ચૂંટણીમાં લગભગ એક કરોડ 70 લાખ લોકો પોતાના મતાધિકારનો ઉપયોગ કરશે.
કોલંબો, 21 સપ્ટેમ્બર. શ્રીલંકામાં રાષ્ટ્રપતિની ચૂંટણી માટે આજે સવારે 7 વાગ્યાથી મતદાન શરૂ થઈ ગયું છે. 2022ના સૌથી ખરાબ આર્થિક સંકટ પછી શ્રીલંકામાં આ પ્રથમ રાષ્ટ્રપતિની ચૂંટણી છે. આ ચૂંટણીમાં લગભગ એક કરોડ 70 લાખ લોકો પોતાના મતાધિકારનો ઉપયોગ કરશે. ચૂંટણી માટે દેશભરમાં 13,400થી વધુ મતદાન મથકો બનાવવામાં આવ્યા છે.
આર્થિક મંદી દરમિયાન શ્રીલંકાની સરકારને લોકોના રોષનો સામનો કરવો પડ્યો હતો. રાષ્ટ્રપતિની ચૂંટણી માટે 38 ઉમેદવારો મેદાનમાં છે. મુખ્ય સ્પર્ધા વર્તમાન પ્રમુખ રાનિલ વિક્રમસિંઘે, વિપક્ષી નેતા સાજીથ પ્રેમદાસા અને ડાબેરી નેતા અનુરા કુમારા દિસાનાયકે વચ્ચે છે.
સાંજે 5 વાગ્યા સુધી મતદારો પોતાના અધિકારનો ઉપયોગ કરી શકશે. રવિવારે ચૂંટણીના પરિણામો જાહેર થશે. 75 વર્ષીય વિક્રમસિંઘેએ જુલાઈ 2022માં ચાર્જ સંભાળ્યો હતો. તેમના પુરોગામી ગોટાબાયા રાજપક્ષેને આર્થિક મંદી દરમિયાન વિરોધને પગલે દેશ છોડીને ભાગી જવું પડ્યું હતું. બાદમાં તેમણે રાજીનામું આપવું પડ્યું હતું.
