NEET PG Counselling 2024 : NEET PG 2024 ના પરિણામોમાં પારદર્શિતા અંગે સુપ્રીમ કોર્ટ 25 ઓક્ટોબરે સુનાવણી કરશે. ઉમેદવારોએ પરિણામ પ્રક્રિયામાં પારદર્શિતાના અભાવ અંગે પણ ચિંતા વ્યક્ત કરી છે. ઘણા વિદ્યાર્થીઓએ નેશનલ એલિજિબિલિટી કમ એન્ટ્રન્સ ટેસ્ટ (NEET) માં પરીક્ષાની પેટર્નમાં છેલ્લી ઘડીના ફેરફારો અને અન્ય અનિયમિતતાઓ અંગે ચિંતા વ્યક્ત કરી હતી.
NEET પરીક્ષાના માત્ર ત્રણ દિવસ પહેલા જ અચાનક ફેરફાર કરવા બદલ વિદ્યાર્થીઓએ નેશનલ બોર્ડ ઓફ એક્ઝામિનેશન ઇન મેડિકલ સાયન્સ (NBEMS) પર પોતાની નારાજગી વ્યક્ત કરી છે. તેમજ અસ્પષ્ટ માર્કિંગ પ્રક્રિયા જેવા મુદ્દાઓ પર વાંધો ઉઠાવવામાં આવી રહ્યો છે.
નેશનલ બોર્ડ ઓફ એક્ઝામિનેશન (NBE) એ 11 ઓગસ્ટના રોજ NEET PG 2024 ની પરીક્ષા યોજી હતી અને તેનું પરિણામ 23 ઓગસ્ટના રોજ જાહેર કરવામાં આવ્યું હતું. દરમિયાન, 19 વિદ્યાર્થીઓના જૂથે પરીક્ષાના સંચાલનમાં પારદર્શિતાના અભાવ અને છેલ્લી ઘડીના મનસ્વી ફેરફારો અંગે ચિંતા વ્યક્ત કરીને સુપ્રીમ કોર્ટમાં અરજી કરી હતી.
સોશિયલ મીડિયા પર વિદ્યાર્થીઓનો ગુસ્સો!
NEET કાઉન્સેલિંગનું શેડ્યૂલ બહાર પાડવામાં પણ વિલંબ થાય છે. આ અંગે પરેશાન વિદ્યાર્થીઓએ સોશિયલ મીડિયા પ્લેટફોર્મ X પર પોતાનો ગુસ્સો ઠાલવ્યો છે. તેમણે મેડિકલ કાઉન્સેલિંગ કમિટી (MCC) તરફથી સ્પષ્ટતાના અભાવ અને કાર્યવાહીમાં વિલંબ અંગે નારાજગી વ્યક્ત કરી છે.
NEET PG 2024 કાઉન્સેલિંગ રજીસ્ટ્રેશન હાલમાં ચાલી રહ્યું છે, પરંતુ અધિકારીઓ દ્વારા હજુ સુધી સંપૂર્ણ કાઉન્સેલિંગ શેડ્યૂલની જાહેરાત કરવામાં આવી નથી. સમગ્ર દેશમાં 50 ટકા ઓલ ઈન્ડિયા ક્વોટા (AIQ) MD અને MS બેઠકો માટેની કાઉન્સેલિંગ પ્રક્રિયા MCC દ્વારા હાથ ધરવામાં આવે છે. એવી અપેક્ષા રાખવામાં આવે છે કે NEET કાઉન્સિલિંગનું શેડ્યૂલ બુધવાર, ઑક્ટોબર 16ના રોજ રિલીઝ થઈ શકે છે.
ઈન્ડિયન મેડિકલ એસોસિએશનની ચિંતા, આરોગ્ય મંત્રીને લખ્યો પત્ર
ઇન્ડિયન મેડિકલ એસોસિએશન (IMA) એ પણ NEET PG 2024 કાઉન્સેલિંગ પ્રક્રિયામાં વિલંબ પર ચિંતા વ્યક્ત કરી છે, જેણે મહત્વાકાંક્ષી વિદ્યાર્થીઓ માટે અનિશ્ચિતતાની સ્થિતિ ઊભી કરી છે. કેન્દ્રીય આરોગ્ય અને પરિવાર કલ્યાણ મંત્રી જેપી નડ્ડાને લખેલા પત્રમાં, IMAએ કાઉન્સેલિંગ પ્રક્રિયાને મુલતવી રાખવા અંગે વધતી ચિંતા તરફ ધ્યાન દોર્યું હતું. જે હાલમાં ભારતની સર્વોચ્ચ અદાલતમાં ચાલી રહેલા કેસને કારણે અટકી પડેલ છે. એસોસિએશને કોર્ટમાં સુનાવણી વચ્ચે યોગ્ય અને મધ્યમ માર્ગ શોધવાનું સૂચન કર્યું હતું.
દરમિયાન, યુનાઇટેડ ડોક્ટર્સ ફ્રન્ટ એસોસિએશન (UDFA) એ આરોગ્ય પ્રધાન જેપી નડ્ડાને NEET PG 2024 કાઉન્સેલિંગ પ્રક્રિયામાં વિલંબમાં હસ્તક્ષેપ કરવાની અપીલ કરી છે. એસોસિએશને મંત્રાલયને તાત્કાલિક પગલાં લેવાની વિનંતી કરી છે કારણ કે ચાલુ વિલંબને કારણે NEET PGના 2 લાખથી વધુ ઉમેદવારો તણાવ અને ચિંતાની સ્થિતિમાં મુકાઈ ગયા છે
